Жуырда С.Сейфуллин мұражайында «Сұңқар Сәкен» кітабының тұсаукесер рәсімі өтті. Жаңа туынды ақын мұражайы қызметкерлерінің жинақтауымен жарыққа шыққан. Салтанатты кешке елордалық зиялы қауым өкілдері мен кітапсүйер көпшілік қатысты.
Басқосуда мұражай директоры, ақын Несіпбек Айтұлы сөз сөйлеп, ұлт қайраткерінің тарихи тұлғасы жөнінде әңгімеледі. «Бұл жинаққа Сәкеннің замандасы, үзеңгілесі Ілияс Жансүгіровтен бастап, інілері Қасым Аманжоловтың, Сырбай Мәуленовтің және орта буын, кейінгі толқын ақындардың көрнекті қаламгерге арнаған өлең-жыр, толғаулары топтастырылды. Арда ақынның 120 жылдық мерейтойына орай әзірге мың данамен оқырманға жол тартқан ғибраты мол бұл кітап Сәкен Сейфуллинге өлеңнен орнатылған тағы бір ескерткіш деп білеміз» деді ол.
Ақын Нұрғожа Ораз Сәкен өлеңдерін саралап, шығармашылығын әңгімеледі. «Ол заманының қысымынан кең көсіліп жаза алмады, айналасы «Маяковскийге еліктеп, өлеңнің мәнерін бұзды» деп орынсыз айыптады. Алдағы уақытта оның тек лирикалық өлеңдерін жинақтап, жарыққа шығару керек» деген ұсынысын да білдірді Н.Ораз. Сенат депутаты Оралбай Әбдікәрімов анасы келін болып түскенде ауылға қонақ болып келген серіні көргенін асқан ілтипатпен еске алып отыратынын айтты.
Қазақстанның еңбек сіңірген қайраткері Қасен Абаев орыс тіліндегі арнауын тарту етіп, отандық суретшілердің «Сұңқар Сәкен» тақырыбындағы картиналарын жинақтап, елордада көрме ұйымдастыруға уәде етті. Белгілі әнші, Қазақстанның еңбек сіңірген әртісі Серік Оспанов «Сәкеннің музыкалық мұрасы» атты еңбектің көп ұзамай жарыққа шығатынын сүйіншіледі.
Тағы бір айта кетерлігі, бүгінде Қарағанды облысының әкімдігі Сәкен Сейфуллиннің 120 жылдық мерейтойына әзірлік жұмыстарын бастап кеткен. Астана қаласының әкімі Иманғали Тасмағамбетов те аталмыш шараны елордада өз деңгейінде атап өтуге арнайы тапсырма берген.
Нұргүл АХАНҚЫЗЫ
