ТҮРІКТЕРДЕН ТӘЛІМ АЛДЫ
Елбасының «Қазақстан жолы 2050: бір мақсат, бір мүдде, бір болашақ» атты халыққа арнаған дәстүрлі Жолдауы ел дамуының жаңа міндеттерін айқындап берді. Президент сыбайлас жемқорлыққа қарсы жаңа стратегияны қалыптастыру және оны іске асыруды жалғастырудың қажеттігіне тоқталды.
Өздеріңізге белгілі, Қаржы полициясы академиясы 1999 жылдан бастап қаржы полициясы және кеден органдарына арнаулы мамандар даярлайды.
Сыбайлас жемқорлыққа қарсы жаңа стратегияны қалыптастыру және оны іске асыру мақсатында академия бірқатар шараларды жүзеге асыруда. Мәселен, таяуда елордаға Түркия Ұлттық полициясы Бас штабының қызметкерлері келді. Бас штабтың Заңсыз табыстарға қарсы күрес басқармасы бастығының орынбасары Сейфулла Буджак пен бөлім бастығы Огузжан Мутлу жедел қызметкерлердің біліктілігін арттыру курстарына қатысты. «Заңсыз жолмен алынған пайданы және оның ізін жасыруды тексеру» тақырыбында лекция ұйымдастырылып, тренингтер өткізілді.
Шара барысында жалған пластикалық карталарды жасау тәсілдері, заңсыз жолмен алынған табысты айқындау, тәуекелділікті талдау, ақшаны жылыстатуды заңдастыру әдістері, мемлекеттік сатып алу саласындағы сыбайлас жемқорлық қылмыстарды ашу жолдары қарастырылды.
Осы білім ордасында сондай-ақ, «Қазақстан Республикасының ведомстволық жоғары оқу орындарында заманауи кәсіби білім берудің өзекті мәселелері мен даму болашағы» талқыға түсті. Оқу үдерісін жетілдіру мақсатында қолға алынған біліктілікті арттыру курстарына профессорлық-оқытушылық құрам қатысты. Басқосуда білім берудің ғылыми-ұйымдастырушылық мәселелері, тәрбие жұмыстарын жетілдіру, заң білімін заманауи кезеңінде модернизациялау мәселелері көтерілді.
Әйгерім АБЖАТОВА,
Қаржы полициясы академиясының бас маманы