Сурет сыры
1976 жылдың күзі Арқа төсіне құт-береке ала келген болатын. Диқандар мен механизаторлар, егіс алқабынан элеваторға астық тасыған шопырлар, халық байлығын ысырапсыз жинап алуға көмекке келген солдаттар мен студенттерді де тың төсінен көресіз. «Егін орағы – екпінді майдан!» деп ұрандата шырқаған өнерпаздар да, диқандарға жан-жақты қызмет көрсетуге келген автоклуб, автолавка дейсіз бе, не керек, барша жұрт қырман басын еңбек әуеніне бөлейді. Осынау бір думанды шақта Қазақ телевизиясының көшпелі редакциясы Целиноград облыстық телеарнасынан Арқа төсіндегі 6 облыстағы егін орағының барысын көрсететін аптасына 6 күн бойы жарты сағат «Алтын дән-76», «Урожай-76» телебағдарламасын жүргізуді дәстүрге айналдырған болатын. Кешкісін 21.30-да басталып, тың төсіндегі дүбірлі еңбектің барысын, әсіресе, 6 облыстың қамбаға құйылып, Отанға тапсырған астығының мөлшерін обкомның бірінші хатшылары қалт жібермей көретін. Ол кездері олардың арасындағы іштей бәсеке-жарысы ғажап болатын. Сол жылы Торғай облысы тұңғыш рет бітік өнім өсіріп, мемлекетке 116 миллион пұт астық тапсырып, мерейлері үстем болған-ды. Егін бітік шыққан жылы Қазақстан Компартиясы Орталық Комитетінің бірінші хатшысы Дінмұхамед Ахметұлы Қонаев астықты өлкені аралап, диқандарға жолығып, шаруашылық басшыларымен жиын өткізіп тұруды дәстүрге айналдырған. Суреттен алқаптың арғы басынан келе жатқан механизаторды тосып тұрған Димаш Ахметұлы мен Целиноград аудандық партия комитетінің бірінші хатшысы Евгений Золотаревты көреміз. Осы жылы Қазақстан Отан қоймасына 1 миллиард пұт астық тапсырды. Биыл Қазақ телевизиясына 60 жыл толып отыр. Сол мерейлі датаға орай осы сурет оқырманға жол тартса дедік.
Қажы ҚОРҒАНҰЛЫ,
ардагер-журналист