ТӘУЕЛСІЗДІК КҮНІ ЖОЛ ЖҮРУ – ТЕГІН
Тәуелсіздіктің ширек ғасырлық тойы «25 жұлдызды күн» акциясының аясында атап өтілуде. Мереке қарсаңындағы бастаманың бірі – қоғамдық көліктердің қала тұрғындары мен қонақтарын тегін тасымалдау.
Тәуелсіздік тойы – әрбір қазақстандық үшін ұлы мереке. Осынау ұлық мерекені жұртшылық жоғары көңіл-күймен атап өту үшін көптеген іс-шаралар қазірден бастап қолға алынуда. Соның бірі –астаналықтар Тәуелсіздік күні қоғамдық көлікте тегін жүру мүмкіндігіне ие болып отыр.
Бұл игі шара 16 желтоқсан күні ұйымдастырылады. Жалпы, желтоқсан айында 70-тен аса мәдени-бұқаралық шара өткізілмек.
Бүгінде «I love Astanа», «I love KZ» флешмобтары, әнұранды жатқа айту бойынша конкурс, жалпы республикалық достық сабағы және көптеген шаралар көптің көңілінен шығып жатыр. 15 желтоқсанда садақ атудан Тәуелсіздіктің 25 жылдығына арналған Астана қаласының чемпионаты өтеді. Ал елдің басты шыршасы 18 желтоқсанда жағылады.
Сонымен қатар, Жаңа жыл қарсаңында астаналықтарға жаппай шаңғы фестиваліне қатысуға мүмкіндік бар. Осынау думанға толы айдың үздік құрылысшылары, кәсіпкерлері, педагогтары және ЖОО студенттері айрықша грамоталармен, алғыс хаттармен марапатталады.