«…ҮШІНШІ СӨЗБЕН» САХНА ЖАБЫЛАДЫ
М.Горький атындағы мемлекеттік академиялық Орыс драма театрының Алехандро Касонаның пьесасы негізінде сахналаған «Жабайы. Үшінші сөз» қойылымы мәңгілік махаббат пен жастық тақырыбын арқау еткен.
Астананың мерейтойы – ел өміріндегі ең айтулы іс-шара. Осы бір думанға толы күнді әрбір қазақстандық асыға күтуде десек, артық айтпаймыз. Өйткені, бұл күндері астаналықтар мерейлі салтанат пен ойын-сауыққа, өнер мен мәдениет туындыларына қанығып, сусындамақ.
Мереке күндері елорда мәдени іс-шаралар бағдарламаларына толы болмақ. Астананы мерейтойымен отандық мәдениет қайраткерлерінен бөлек, шетелдік театрлар да құттықтау үшін ат басын бұруда. Осы тұрғыда, қаладағы М.Горький атындағы мемлекеттік Орыс драма театры 28-29 маусымда жоғарыда аталған испан мелодрамасының премьерасын ұсынбақ.
Театрдың кейінгі он жылдықта шығармашылығы тасада қалған танымал испан драматургінің пьесасын таңдауы тегін емес. Себебі, автордың пьесалары әдемі лирикалық ноталарға, романтикалық пафосқа және бүгінгі заман ағымымен үндесетін жастардың ішкі көңіл-күйін көрсететін уақиғаларға толы.
Қойылым таулы аймақта өскен қарапайым Паблоның шулы қаланың алдамшы, қатыгездікке толы, өзіне таныс емес, бұрын-соңды көрмеген ғажайып сезіммен бетпе-бет келу өмірін баян етеді. Соңында бақытқа кенелу үшін кейіпкерлер көптеген қиындықтарды өткереді. Себебі, «киімге қарап» қарсы алатын «дамыған» қала өмірінде Паблоны жабайы деп санайды. Ал, оның шынайылығы көптеген түсініспеушіліктер мен күлкілі оқиғаларға әкеліп соғады. Барлығымызға аян, адамгершілік пен шынайылық қасиетті бойымызға сіңіргеннен гөрі, жақсы іс-әрекеттерге бейімделу оңай. Бірақ, адам баласы қай жерде болса да, ерте ме, кеш пе, оның санасында қарапайым бір түсінік қалыптасады. Ол өмір, өлім және махаббат деген үш сөзден құралады.
Қойылымның қоюшы-режиссері – Қазақстанның еңбек сіңірген әртісі Бекпулат Парманов, қоюшы-суретшісі – мәдениет қайраткері Қанат Мақсұтов. Сахнадағы шығарма көрерменге романтикалық, мерекелік көңіл-күй сыйламақ. М.Горький атындағы мемлекеттік Орыс драма театры
осымен 112-маусымын аяқтайды.
Асхат Райқұл