Кеше елорданың түкпір-түкпірінде Қазақстан халқының бірлігі күні қызу тойланды. Ең үлкен мерекелік шара бас қаланың қақ төріне қоныс тепкен «Қазақ елі» монументі маңындағы алаңда өтті. Оған Елбасы Нұрсұлтан Назарбаев қатысты.
Сондай-ақ қала әкімдігінің алдындағы алаңда, қала іргесіндегі тұрғын үй алаптарында халықтық серуендер ұйымдастырылды. Күннің шуағымен жылынған жұртшылық мерекелік іс-шараларда өткен концерттерге, спорттық сайыстарға және түрлі шығармашылық байқауларға қатысып, көңіл күйлерін көтерді.
Тұңғыш Президент шаһар тұрғындары мен қонақтары алдында сөйлеген құттықтау сөзінде:
– Бабаларымыз бірліктің арқасында барлық қиындықты еңсеріп, біз үшін осындай Ұлы даланы сақтап қалды. Біз олардың арманын орындап, тәуелсіз Қазақстанды құрдық. Енді сол бірлігімізді сақтап, тәуелсіздігімізді құрметтеуіміз керек. Даму бағдарламаларымызды жүзеге асыру еліміздің болашағын одан әрі жарқын ете түседі, – деді.
Жиналған жұртшылық көрігі қызған думанды тамашалап мәз-мейрам. Астанадағы этномәдени орталықтар жеке бұрыштарын жасап, салт-дәстүрлеріне қатысты заттарын көрмеге шығарыпты. Аралап жүріп, татар-башқұрт мәдени орталығы ұсынған жәдігерлердің жанына жақындадық. Аталған ұйымның өкілі Ғалия Рахматуллина көпшілік тарапынан ұлттық киімдерге деген қызығушылық өте жоғары екенін айтады.
– Мысалы, татарлардың төбетей, кэлэпуш, кряшен, бөрек деп аталатын бас киімдерін сұраушылар көп. Бұлар бір-бірінен пішіндері арқылы ажыратылады, – дейді ол.
Ал армян мәдени орталығы жасаған бұрышта тағамның небір түрі толып тұр.
– Бұл – аганц атты тәттіміз. Оны бидай, мейіз және жаңғақты араластырып жасаймыз. Ал мына ас бастурма деп аталады. Мұны қазақтың сүр етімен салыстыруға болады. Әуелі етті тұзға салып, кейін кептіреміз. Дәмі керемет, – дейді армян жексенбілік мектебінің директоры Айастан Мнеян.
Алаңда елордаға әйгілі композитор, «Радима» беларус мәдени орталығының өкілі Дмитрий Останьковичті де жолықтырдық. Оның айтуынша, қазіргі таңда астанада 4 мыңдай беларус тұрады. Олардың бәрі әр мейрамды қазақстандықтармен бірге тойлауды дәстүрге айналдырыпты.
