АХМЕТОВА ЖЕҢІМПАЗ АТАНДЫ
«Астана Опера» театрының әншісі Салтанат Ахметова «Большая опера» атты тележобаның жеңімпазы атанды. Салтанат – академиялық концерт пен шоу элементтерін біріктірген «Россия К» теларнасының мега жобасына қатысқан тұңғыш қазақ әншісі.
Аталмыш жобаға Алмания, Ресей, Беларусь, Қазақстан, Әзербайжан, Өзбекстан және Армения вокалистері қатысты. Алайда, КСРО халық әртісі, опера сахнасының әлемдік жұлдызы Елена Образцова, РСФСР халық әртісі, сопрано Галина Калинина, мәскеулік «Геликон-Опера» музыкалық театрының көркемдік жетекшісі, Ресейдің халық әртісі Дмитрий Бертман, сондай-ақ Веналық операның интенданты Иоан Холендер қазылық еткен конкурстың мәресіне Салтанат пен бірге белоруссиялық Илья Сильчуков пен ресейлік Василиса Бержанская ғана жетті. Ал жеңімпазды телекөрермендер дауыс беру арқылы финалға шыққан үш үміткер арасынан таңдады. Беделді байқауда бағы жанған Салтанат Ахметова мұны кәсіптік тұрғыдан алғанда маңызды сынақ ретінде бағалады. Ол Көкшетаудағы Біржан сал атындағы музыка колледжін, Қазақ ұлттық музыка академиясының «жеке ән орындаушы» мамандығы бойынша Хорлан Қалиламбекованың сыныбын бітірген. Италияның вокал өнері академиясында іс-тәжірибеден өтіп, халықаралық дәрежедегі опера майталмандарының шеберлік дәрісін тыңдаған.
Айгүл УАЙСОВА