Айжан ЖДАНОВА, Рухани келісім форумы баспасөз қызметінің жетекшісі
– Астанада 17-18 қазан күндері өтетін «Бейбітшілік, келісім және руханият мәдениеті» халықаралық ғылыми-тәжірибелік конференциясына биыл кімдер келеді?
– Форумға 17 елдің өкілдері келеді. Олардың қатарында әлемге аты танымал мемлекет, қоғам қайраткерлері, ғалымдар бар. Атап айтқанда, Рамазан Абдулатипов, Вильгельм Аугустат, Бүкіл әлемдік Рухани мәдениет форумның тең төрағасы, «Мәдениет арқылы әлем-Еуропа» халықаралық ассоциациясының президенті, Этика институтының директоры, Джонатан Гранофф (АҚШ), РФ Президенті жанындағы жеке құқық зерттеу орталығының атқарушы директоры Юрий Андреевич сынды тұлғалар бар. Сонымен қатар, форум жұмысын насихаттайтын шетелдік журналистер мен жазушылар да жетерлік. «Астана ақшамы» газеті форумның бүған дейін өту барысын жария еткен мақалалар топтамасын Аргентинада насихаттаған Сусанна Робертс, украиналық әріптесіміз Наталья Вареник, Грузиядағы «Вечерний Тбилиси» газетінің бас редакторы Вадим Анастасиади секілді қаламы қарымды әріптестеріміз форум арқылы қазақ еліндегі толеранттылықты насихаттайды.
– Осы форум қандай мақсат-мүддені көздейді?
– Қазақстан халқы ассамблеясы және Бүкіл әлемдік Рухани мәдениет форумы ұйымдастырған алқалы жиын ортақ мүддеге әлемдегі бейбітшілікке, рухани ізгілікке, қайырымдылыққа үндейді. Өзіңіз білетіндей, 18 қазан Қазақстандағы Рухани келісім күні ретінде мерекеленеді. Шараның 17-18 қазанда өту себебі сондықтан. Дәл осы күні ел аумағында қайырымдылық шаралары өтіп, дастарқан жайылмақ. Ал, Рухани Келісім күнінің тарихына келер болсам, Қазақстанның егеменді, зайырлы және демократиялы ел ретінде пайда болғанына бір жыл толмай тұрып, 1992 жылдың қазан айында, Алматыда Президент Н.Ә.Назарбаевтың бастауымен І Бүкіл әлемдік Рухани келісім конгресі өткізілді. Конгресс әртүрлі конфессиялар, рухани мектептер мен қоғамдық қозғалыстардың өкілдерін жинады. «Діни сыйластық үшін! Іріткісіз айырмашылықтар үшін! Мейірімділік жолында бірге қызмет ету үшін!» – бұл ұстанымдар Рухани келісім конгресінің жұмысына негіз болды. Конгресте қабылданған манифесте оның қатысушылары 18 қараша күнін жанжалдар мен қақтығыстарға мораторий,
адамдар арасында өзара түсіністік, рақымшылық және жақыныңа көмек көрсету күні деп жариялауға шақырды. Бүкіл әлемдік Рухани келісім конгресінің бастамасымен қазақстандық күнтізбеге қоғамдық маңызы бар күн – Рухани келісім күні енгізілді.
– Ал, бүкіл әлемдік Рухани Мәдениет Форумы қашан өтеді?
– Бүкіл әлемдік Рухани мәдениет форумы тұңғыш рет 2010 жылдың қазан айында Астана қаласында өткен болатын. Биылғы кездесу барысында форумның екінші конференциясын қай елде өткізетініміз шешіледі. Қазақстан Республикасының Президенті тарапынан қолдау тапқан бұл іс-шара әлемнің 70 елінен 500-ден аса интеллектуалды элита өкілдерін жинады. Форум әлемнің
назарын жан дүние мен моральдық ұстанымдардың әбден тоқырауын жеңудің маңыздылығына аударды. Аталған мәселелер әртүрлі мәдениет пен діндердегі адамдардың рухани бірігуі жекеленген мемлекеттердің ғана емес, әлемнің ірі аудандарының тұрақты әрі бекем дамуын қамтамасыз ететін стратегиялық фактор екендігімен өзекті. Өкінішке қарай, осы уақытқа дейін адамзат әлемдік шиеленісті мәселелерді шешуде күш қолдану әрекеттеріне жиірек жүгінуде. Бұл тұрғыдан алғанда, шетін мәселелердің шешімін
табудың ең оңтайлы жолы – сұхбаттасу, ой алмасу. Осы орайда, бұл форумның берері мол.
Еркежан КӨПТІЛЕУҚЫЗЫ
