استانادا وتكەن «بىرگە تازا قازاقستان» كۇزگى ەكولوگيالىق ايلىعى جانە جالپىقالالىق سەنبىلىك اياسىندا پرەزيدەنت ساياباعىندا اق قايىڭدار توعايى پايدا بولدى. جالپىقالالىق سەنبىلىككە 27 مىڭنان اسا ادام قاتىستى.
سەنبىلىك كەزىندە پرەزيدەنت ساياباعى اۋماعىندا 400-گە جۋىق اعاش وتىرعىزىلدى. ونىڭ ىشىندە 250 دانا اق قايىڭ, 150 دانا ءسىبىر شىرشاسى بوي كوتەردى.
سونداي-اق قالانىڭ بارلىق اۋداندارىندا جالپى اۋدانى 2,8 ملن شارشى مەتردەن استام اۋماقتى قامتىعان ساياباقتار مەن گۇلزارلار تازارتىلىپ, مىڭعا جۋىق اعاش وتىرعىزىلدى. ەلوردالىق پوليگونعا 460 تونناعا جۋىق قوقىس-قالدىق جينالىپ, شىعارىلدى.
اعاش وتىرعىزۋ ءىس-شاراسىنا قالا ءماسليحاتىنىڭ دەپۋتاتتارى, اكىمدىك, اmanat پارتياسىنىڭ وكىلدەرى, قالالىق قوعامدىق كەڭەستىڭ, رۋحاني-ءدىني بىرلەستىكتەردىڭ مۇشەلەرى, ۋسپەن سوبورىنىڭ, ارداگەرلەر كەڭەسىنىڭ, بەيبىتشىلىك جانە كەلىسىم سارايى, تاۋەلسىزدىك سارايى, «جاس سارباز» اسكەري-پاتريوتتىق كلۋبىنىڭ قىزمەتكەرلەرى, سپورتشىلار, ارتىستەر مەن ەرىكتىلەر قاتىستى.
«بۇگىن ءبىز سەنبىلىككە, اعاش وتىرعىزۋعا قاتىستىق, بەيبىتشىلىك جانە كەلىسىم سارايىنىڭ جانىنداعى ساياباققا 400 اعاش وتىرعىزدىق, وسى شارانى قالالىق اكىمدىك پەن اۋداندىق اكىمدىكتەر ۇيىمداستىردى. ەكىنشى جىل قاتارىنان قالامىزدى كوگالداندىرۋعا قاتىسىپ كەلەمىز» دەدى كوركەم گيمناستيكادان حالىقارالىق دارەجەدەگى سپورت شەبەرى, قالالىق فەدەراتسيانىڭ ۆيتسە-پرەزيدەنتى جانە گيمناستيكا مەكتەبىنىڭ ديرەكتورى اننا اليابەۆا.
سەنبىلىك قىسقى كەزەڭگە دايىندىققا جانە اباتتاندىرۋ, كوگالداندىرۋ جانە سانيتارلىق تازالاۋ جۇمىستارىن جۇرگىزۋگە باعىتتالعان. قوعامنىڭ نازارىن ەكولوگيالىق مادەنيەتتى قالىپتاستىرۋ مەن تابيعاتتى ساقتاۋدىڭ ماڭىزدىلىعىنا اۋدارۋ باستى ماقسات بولىپ تابىلادى.
سونداي-اق ەلوردا تۇرعىندارى مەن ۇيىمدارى ايلىق كەزىندە تۇرعىن ءۇي ايماقتارى مەن اۋلا اۋماقتارىن سانيتارلىق تازالاۋ جۇمىستارىن جۇرگىزۋگە شاقىردى.
جالپى, «بىرگە تازا قازاقستان» ەكولوگيالىق ايلىعى اياسىندا استانا قالاسىندا 4 كوممۋنالدىق سەنبىلىك وتەدى, ءار سەنبى سايىن 15 قازانعا دەيىن 10 مىڭنان استام جاسىل جەلەك وتىرعىزۋ جوسپارلانعان.
