قازاقستاننىڭ ەڭبەك سىڭىرگەن قايراتكەرى, ءانشى, اكتريسا ايگۇل يمانباەۆانىڭ «ا.ي. تەاترى» تاعى ءبىر جاڭا قويىلىمنىڭ پرەمەراسىن وتكىزدى. ف.م.دوستوەۆسكيدىڭ «كروتكايا» اتتى پوۆەسى جەلىسىندە قازاق تىلىنە اۋدارىلىپ قويىلعان «مومىنداردىڭ زىندانى» قويىلىمىنىڭ تۇساۋكەسەرى ەلوردادا ءا.مامبەتوۆ اتىنداعى مەملەكەتتىك دراما جانە كومەديا تەاترىندا كەسىلدى. پرەمەراعا ەلوردا جۇرتشىلىعى جانە ونەر مەن ادەبيەت, قوعام قايراتكەرلەرى قاتىستى.
پسيحولوگيالىق درامانىڭ قويۋشى-رەجيسسەرى – سانكت-پەتەربۋرگ قالاسىنان كەلگەن رينات قياكوۆ, قويۋشى-سۋرەتشىسى – الان سايمين, حورەوگراف – الفيا اگيشەۆا, دىبىس رەجيسسەرى – جۇلدىز تەلعوجاەۆا. ۇزاقتىعى 1 ساعات 40 مينۋتقا سوزىلعان كامەرالىق قويىلىمنىڭ پرەمەراسى باستالار الدىندا تەاتر ديرەكتورى ايگۇل يمانباەۆا كىرىسپە ءسوز ايتتى.
– بۇل – ومىردەگى ۇلكەن ماحابباتىنان قايعىلى جاعدايدا ايىرىلعان باس كەيىپكەردىڭ رۋحاني قايتا تۇلەۋىن زەرتتەۋ شىعارماسى. ءبىزدى مازالايتىنى – دوستوەۆسكيدىڭ تۋىندىلارىنداعى ءجيى كوتەرىلەتىن ماسەلە: نەگە ادامدار قۇندىلىعىن ءتۇسىنۋ ءۇشىن قولىندا بار ەڭ قىمباتىنان ايىرىلۋى كەرەك؟ سپەكتاكلدەگى باس كەيىپكەر دە ءدال وسىلاي ۇلكەن قايعىدان كەيىن رۋحاني تازارىپ, قايتا تۋعان. شىن ءسۇيۋ مەن سەزىمنەن كۇيۋدىڭ اراسى ءبىر-اق قادام. شىعارمانىڭ باس كەيىپكەرى ءوز اسىلىن ماڭگىلىككە جوعالتقاندا عانا رۋحاني تۇلەۋدى باستان كەشىرەدى. بۇل كامەرالىق قويىلىمدى 4 ادام عانا وينايدى. اكتەرلەر – ءوزىمنىڭ شاكىرتتەرىم, – دەدى تەاتر باسشىسى.
درامالىق قويىلىمدا ويناعان جاس اكتەرلەردىڭ شەبەرلىگىنە ءسوز جوق. دەگەنمەن شىعارما يدەياسىن جەتكىزۋدە رەجيسسەرلىك جۇمىستى ءالى دە جەتىلدىرۋ قاجەتتىلىگى بايقالدى. بيىل قۇرىلعانىنا 13 جىل تولاتىن تەاتردىڭ تاعى ءبىر جاقسى جاڭالىعى – وسى جىلى 5-11 ماۋسىم ارالىعىندا ۇجىمنىڭ تاتارستاننىڭ قازان قالاسىندا جىلدا وتەتىن حالىقارالىق ناۋرىز فەستيۆالىنە قاتىسۋعا جولداما الۋى. قازاقستاننان باراتىن ءبىراز مەملەكەتتىك تەاترلار قاتارىندا «ا.ي. تەاترى» دا تابىلىپ, ونەر ۇجىمى بۇل فەستيۆالدە ا.چەحوۆتىڭ «شيە باعى» شىعارماسىنىڭ جەلىسىندە قويىلعان «باق» سپەكتاكلىن ساحنالايدى.
