«استانا» كونتسەرت زالىندا استانا قالاسى مادەنيەت باسقارماسى جانە بايقوڭىر اۋدانى اكىمدىگىنىڭ قولداۋىمەن «ءبىز ءارتۇرلىمىز, بىراق بارىمەن تەڭبىز» ۇرانىمەن «ينكليۋزيا حانىمى-2022» الەۋمەتتىك جوباسى ءوتتى. جوبانى ۇيىمداستىرۋشىلار – «مەيىرىمدىلىك كەرۋەنى-2020» ءىىى رەسپۋبليكالىق بايقاۋىنىڭ «مەيىرىم جولىندا» اتالىمىنىڭ لاۋرەاتى ۆالەنتينا تولماچەۆا جانە «قولجەتىمدى قازاقستان» جوباسىنىڭ ەرىكتىسى گۇلنار احمولدينا.
– بۇل جوبانىڭ نەگىزگى ماقساتى – 18-35 جاس ارالىعىنداعى رۋحى مىقتى قىزداردى ورتاعا بەيىمدەۋ. بارلىق قاتىسۋشىلار ەرىك-جىگەرىن, قايراتىن كورسەتكەنى ءۇشىن ماراپاتتالىپ, «ينكليۋزيا حانىمى-2022» انىقتالادى, – دەدى ءىس-شارانىڭ باسىندا بايقوڭىر اۋدانى اكىمىنىڭ ورىنباسارى شۇعىلا قۇدايبەرگەنوۆا.
شارا بارىسىندا ساحناعا 8 قاتىسۋشى شىعىپ, جۇرتشىلىققا ءوز تالانتىن كورسەتىپ, وزدەرىنىڭ ءومىر جولىن ايتىپ بەردى. مىنا اتالىمدار بويىنشا جۇلدەلەر تاپسىرىلدى: «ارتىستىگى شەبەر حانىم» – اننا ديك, «ءساندى حانىم» – اياۋلىم كارىمجان, «تالانتتى حانىم» – زارينا دانەبەكوۆا, «سۇيكىمدى حانىم» – اسەل قادىروۆا, «كەربەز حانىم» – نۇردينا قارتاي, «كورەرمەن كوزايىمى» – توتى دۇيسەمبينا, «كەمەڭگەر حانىم» – ءمادينا ازاماتوۆا. ال ايدانا قىستاۋباي «ينكليۋزيا حانىمى-2022» اتاندى.
«سايىستا, شىن مانىندە, وتە تالانتتى, كوزىندە وتى بار, ومىرگە قۇشتار جانداردى كوردىم. راسىندا, ەرەكشە ادامداردىڭ ەرىك-جىگەرى كوبىنە ءتورت قۇبىلاسى تۇگەل جانداردان دا مىقتى بولىپ جاتادى. ولار ءومىر جولىندا قيىندىق كەزدەسسە دە, شۇكىرشىلىك ەتۋدى بىلەدى. ءار كۇنگە, ءار ىسكە ريزاشىلىقپەن قارايدى. ءبىزدىڭ ولاردان ۇيرەنەرىمىز كوپ. ءوزىم بۇل كەشتەن ەرەكشە اسەر الدىم. مۇنداي جاندار تۋرالى الەم ءبىلۋ كەرەك. سوندىقتان ءدال وسىنداي «ينكليۋزيا حانىمى» سىندى جوبالار جالعاسىن تاۋىپ, كوپشىلىككە ۇلگى بولسا, موتيۆاتسيا سىيلاسا دەيمىن» دەدى استانا قالاسى ءماسليحاتىنىڭ دەپۋتاتى ءلاززات رازبەكوۆا-تولەۋحانوۆا.
بايان اسىلبەكوۆا
