ءبىزدىڭ كوبىمىز مۇگەدەكتەر تۇگىلى, جاي بەيتانىس ادامدارمەن قالاي-قارىم-قاتىناس ورناتىپ, قالاي سويلەسۋ كەرەكتىگىن ونشا بىلە بەرمەيمىز. ال ەرەكشە قامقورلىق قاجەت ەتەتىن مۇگەدەكتەرمەن كەزدەسكەندە, مۇلدەم ابدىراپ قالاتىنىمىز راس. مىنا ءبىر قالىپتاسقان ەرەجەنىڭ ەكەۋارا قولايسىزدىقتى جويىپ, جاقسى سويلەسۋگە سەپتىگى بار ەكەن. بۇل ەرەجەنى اقش-تىڭ مەملەكەتتىك قىزمەتشىلەرى قىزمەت بابىندا باسشىلىققا الادى ەكەن.
كوشەدە مۇگەدەك كورسەڭىز, باس سالىپ مۇسىركەپ, ماڭدايىنان سيپاۋعا ءتيىستى ەمەسسىز. شامادان تىس جاناشىرلىق تانىتۋدىڭ قاجەتى جوق. سول ارقىلى ءسىز ونى تەڭ كورمەي, كەمدىگىن كورسەتكەندەي ەرىكسىز قورلاۋىڭىز مۇمكىن.
– مۇمكىندىگى شەكتەۋلى اداممەن اڭگىمەلەسۋ كەزىندە, ونىڭ جانىنداعى قامقورشىسى نەمەسە سۋردواۋدارماشىعا قاراپ ەمەس, تىكەلەي وزىنە قاراپ تىلدەسىڭىز.
– ەگەر مۇگەدەكپەن قول الىسىپ تانىسۋ قاجەت بولسا, ەگەر ول ادامنىڭ قولى قيمىلدامايتىن نەمەسە پروتەز بولسا دا قولىن ۇستاپ يشارا جاساعاننىڭ ايىبى جوق.
– كوزى كورمەيتىن ادامدى كەزدەستىرسەڭىز, ءوزىڭىزدى جانە سىزبەن بىرگە كەلگەن ادامداردى مىندەتتى تۇردە داۋىستاپ اتىن اتاپ, تانىستىرىڭىز. ەگەر ءسىز وسىنداي توپ الدىندا سويلەسەتىن بولساڭىز, ءوزىڭىزدىڭ كىم ەكەندىگىڭىزدى, نە ماقساتپەن كەلگەنىڭىزدى ايتۋدى ۇمىتپاڭىز.
– ەگەر مۇگەدەككە كومەكتەسكىڭىز كەلسە, الدىمەن رۇقساتىن الىپ, نە ىستەپ, نە قويۋ كەرەگىن انىقتاپ الىڭىز.
– قانشا جەردەن مۇگەدەك بولسا دا تەڭ دارەجەدە, ءوز قاتارىڭىزداي قاراۋ كەرەك. ەگەر ءسىز ولاردى جاقسى بىلسەڭىز عانا سەن دەپ اتىمەن اتاعان ءجون. باسقا جاعدايدا ءسىز دەپ سىپايىلىق تانىتقان ءجون بولار.
– ولاردىڭ قولارباسى – ءوزىنىڭ ورنى, جەكە كەڭىستىگى. سول ارباعا سۇيكەنىپ نەمەسە باۋلارىن تارتقىلاپ, ءار جەرىن شۇقىلاۋ – ەرسى نارسە. بۇل ادامنىڭ ءوزىن تىنتكەندەي اسەر قالدىرادى.
– تىلىندە مۇكىسى بار ادامداردى مۇقيات تىڭداڭىز. ءسوزىن ءبولىپ, تۇزەتپەڭىز, ايتاتىن ويىن ءسىز اياقتاماڭىز. ەگەر ەشتەڭە ۇقپاساڭىز, وتىرىك كولگىرسىمەي, شىندىعىن ايتىڭىز. تۇسىنگەنىڭىزدى قايتالاڭىز, بۇل ادامعا سىزگە جاۋاپ بەرۋگە, ال ءسىز ونى تۇسىنۋگە كومەكتەسەدى.
– مۇگەدەكتەر ارباسىن نەمەسە بالداقتى اداممەن سويلەسكەندە, ءسال ەڭكەيىپ ءوزىڭىزدىڭ جانە ونىڭ كوزدەرى ءبىر دەڭگەيدە بولىپ, بەتىنە تىك قاراپ سويلەسۋ سىزگە وڭايىراق بولادى.
– ەستۋ قابىلەتى ناشار ادامنىڭ نازارىن اۋدارۋ ءۇشىن قولىڭىزدى سەرمەپ, نەمەسە يىعىنان ءتۇرتىپ نازارىن اۋدارتۋعا بولادى. قۇلاعى مۇكىستەردىڭ بارلىعى بىردەي ەرىنگە قاراپ, ءسوز تۇسىنە الماسا دا ونىڭ كوزىنە تىك قاراپ, انىق سويلەڭىز. جارىق جەردە بەت-ءجۇزىڭىزدىڭ قيمىلىن انىق كورەتىندەي بولسىن. سوندا تەز ۇعىنىسۋعا مۇمكىندىك بولادى.
