ە.راحماديەۆ اتىنداعى مەملەكەتتىك اكادەميالىق فيلارمونيا «Viva musica!» توپتاماسىنان كونتسەرت ۇسىندى. ونىڭ بارىسىندا ونەر ۇجىمىنىڭ سيمفونيالىق وركەسترى كەش قوناعى, ديريجەر الان كيركوپتىڭ (مالتا رەسپۋبليكاسى) جەتەكشىلىگىمەن ونەر كورسەتتى.
كەش باعدارلاماسىنا ليۋدۆيگ ۆان بەتحوۆەننىڭ №5 سيمفونياسى, يوگاننەس برامستىڭ سكريپكا مەن ۆيولونچەلگە ارنالعان قوس كونتسەرتى جانە تىلەس قاجىعاليەۆتىڭ «قىز قۋ» شىعارماسى ەنگىزىلدى. قوس كونتسەرتتىڭ ورىنداۋشىلارى – حالىقارالىق جانە رەسپۋبليكالىق بايقاۋلاردىڭ لاۋرەاتتارى سالتانات ورىنباەۆا (سكريپكا) مەن باقىتجان جانتۇرعانوۆ (ۆيولونچەل).
قازاقتىڭ كورنەكتى كومپوزيتورى تىلەس قاجىعاليەۆتىڭ مۇراسى – قازاقتىڭ كاسىبي مۋزىكاسىن بايىتىپ, ۇلتتىق سيمفونيالىق جانە كامەرالىق مۋزىكانىڭ ايرىقشا بەلگىسى. ونىڭ وركەسترلىك تۋىندىلارىن الەمنىڭ ءارتۇرلى ەلدەرىندە ورىندالعان. اتاپ ايتقاندا, 2007 جىلى لوندون كورولدىك فيلارمونيا وركەسترى رەپەرتۋارىنا ەنگەن. اعىلشىن ءباسپاسوزى «قىز قۋ» پەساسى تۋرالى «…شەتسىز-شەكسىز دالادا جەلمەن جارىسا ەمىن-ەركىن شاۋىپ جۇرگەن جاس شاباندوزداردى ەلەستەتەتىن, قيالدى تولقىتاتىن بوياۋلار مەن قۋاتقا, ادەمى, كوزگە كورىنەتىن دەرلىك دىبىستارعا تولى» دەپ جازدى.
