ايەلدەردى اسپەتتەيتىن الماناح
جاقىندا استانا قالاسى اكىمدىگىنىڭ قولداۋىمەن «جاڭا زامان: تابىس كىلتى» باسپا جوباسىنىڭ شەڭبەرىندە, قازاق جانە ورىس تىلدەرىندە «استانا: ايەل كەلبەتى» يلليۋستراتسيالانعان تانىستىرىلىمدىق الماناعى جارىق كورەدى. وسىعان بايلانىستى كىتاپتى باسپاعا دايىنداپ جاتقان توپتىڭ جەتەكشىسى ەليتا ۆلاديميروۆنا وسوكينانى اڭگىمەگە تارتقان ەدىك.
– الماناحتى شىعارۋداعى ماقساتتى ايتىپ وتسەڭىز.
– بيىل استانانىڭ 15 جىلدىق مەرەيتويى ەكەنىن بىلەسىزدەر. الماناح وسىناۋ مەرەيلى داتاعا ارنالىپ وتىر. وندا ساياسات پەن بيزنەستە, عىلىم مەن سپورتتا, ونەردە, وقۋ-اعارتۋ سالاسىندا جانە مەديتسينادا جۇرگەن ايەلدەردىڭ ءومىرى مەن ەڭبەگى جايلى باياندالادى. قازىرگى تاڭدا نازىك جاندىلار قاي ىستە بولسىن بەلسەندىلىكپەن كورىنۋدە. ءبىزدىڭ ماقساتىمىز – استاناداعى ەڭبەكتە ۇلكەن جەتىستىكتەرگە جەتىپ, اسقاق ارماندارىن جۇزەگە اسىرعان ايەلدەردى ەل نازارىنا شىعارۋ.
– الماناح تاراۋ, ءبولىمدەرگە بولىنگەن بە؟
– بولىنگەن. اتاپ ايتساق, الماناحتا «ەلوردا ايەلدەرى: ءححى عاسىر», «داڭق گالەرەياسى», «جانسەرىگىم, جولداسىم, جۇلدىزىم», «زامان ايەلدەرى» تاراۋلارى بار. بۇل تاراۋلاردا ايەلدەردىڭ باسقارۋ, ەكونوميكالىق جانە الەۋمەتتىك سالانى دامىتۋ, قازاقستاننىڭ كەلەشەگى – وسكەلەڭ ۇرپاق تاربيەسى ىستەرىنە قوسىپ جاتقان ۇلەسى جونىندە ايتىلادى. سونىمەن بىرگە, وتان مەن قالا تاريحىنىڭ بەتتەرىندە ءوز اتىن قالدىرعان داڭقتى ايەلدەردىڭ تاعدىرى تۋرالى سىر شەرتىلەدى.
استانادا ءومىر ءسۇرىپ, قىزمەت ەتىپ جۇرگەن, ومىردە ۇلكەن جەتىستىكتەرگە قول جەتكىزىپ, ءوزىنىڭ سالاسىندا بەدەلگە يە بولعان تاماشا زامانداستارىمىز ءجونىندە ايتىلاتىن «زامان ايەلدەرى» تاراۋى كىتاپتىڭ ەڭ كولەمدى بولىگىن قۇرايدى. وعان «ۇكىمەت ادامدارى», «ەلوردا ماقتانىشى», «تابىستى ايەل», «ايەل – انا» بولىمدەرىن ەنگىزدىك.
سونداي-اق, نازىك ايەل جانىمەن اۋىر جۇك كوتەرىپ, قاشاندا ەرىنە, بالالارىنا تىرەك بولا بىلگەن ايەل-انا, ايەل-جار, ايەل-سەرىك, ايەل-مۋزا تۋرالى ءسوز بولادى.
– كىتاپقا قانشا ايەلدىڭ ەنگىزىلگەنى تۋرالى جانە تارالىمى جايلى, ونىڭ ناقتى جارىققا شىعاتىن ۋاقىتىمەن حاباردار ەتسەڭىز.
– تارالىمى 1000 دانا بولاتىن كىتاپقا ءجۇز شاقتى ايەل ەنگىزىلگەن. ول وقىرماننىڭ قولىنا الداعى كۇز ايلارىنىڭ بىرىندە تيمەك.
ەركەجان ساتىمبەك