استانا قالاسى اكىمىنىڭ سايتى «استانا تاڭداۋى» بايقاۋىنىڭ ارقاسىندا كازنەتتە رەكورد جاسادى. قالالىق اكىمدىكتىڭ رەسمي ينتەرنەت رەسۋرسى astana.kz سايتىندا 10 كۇننىڭ ىشىندە 25000-نان استام پايدالانۋشى پايدا بولدى.
قالا تۇرعىندارىنىڭ مۇنشا نازار اۋدارۋىنا سەبەپ بولعان قالانىڭ 15 جىلدىعىنا ورايلاستىرىلعان باستى ءىس-شارانىڭ ءبىرى – الەۋمەتتىك سالاداعى ۇزدىك قىزمەتكەرلەردى تاڭدايتىن «استانا تاڭداۋى» بايقاۋى بولىپ وتىر.
جالپىقالالىق «استانا تاڭداۋى» بايقاۋىنىڭ باستى ماقساتى – قالالىقتاردىڭ پىكىرىنشە, ۇزدىك ۇستازدى, قوعامدىق كولىك ءجۇرگىزۋشىسىن, ينسپەكتور مەن دارىگەردى, ەنەرگەتيك پەن جولشىنى جانە قۇرىلىسشىنى انىقتاپ, سولارعا داۋىس بەرۋ. داۋىس بەرۋدىڭ اياقتالۋىنا نەبارى 5 كۇن قالدى. مامانداردىڭ بولجامى بويىنشا, وسى كەزەڭدە پورتالعا كىرۋشىلەر سانى 40 مىڭ ادامعا دەيىن جەتۋى مۇمكىن. بۇگىندە كازنەتتەگى بىردە-ءبىر ينتەرنەت الاڭى 2 اپتادا ءۆيرتۋالدى كىرۋشىلەر سانىنىڭ وسىنشاما قارقىندى وسۋىمەن بۇل كورسەتكىشكە تەڭەسە المايدى, – دەپ اتاپ كورسەتەدى استانانىڭ 15 جىلدىق مەرەكەسىن ازىرلەۋ جانە وتكىزۋ جونىندەگى ۇيىمداستىرۋ كوميتەتى شتابىنىڭ مەديا توبى. استانا اكىمدەگى سايتىنداعى داۋىس بەرۋ جۇيەسى بەلگىلى ءبىر ءۇمىتكەرگە ەلەكتروندى مەكەن-جايدا تەك ءبىر داۋىس بەرۋگە عانا مۇمكىندىك تۋعىزادى. وسى تۇرعىدان العاندا داۋىس بەرۋلەر ناتيجەسى بارىنشا شىنايى, ادىلەتتى جانە ناعىز ءوز ءىسىنىڭ كوشباسشىسىن ايقىنداۋعا باعىتتالعان. داۋىستىڭ كوپشىلىگى مۇعالىمدەر مەن دارىگەرلەرگە بەرىلگەن. ءاربىر تۇرعىن ءوز ۇستازىن ەڭ ۇزدىك دەپ سانايدى. قازىردىڭ وزىندە مۇعالىمدەرگە 2000-نان استام داۋىس بەرىلدى. بۇگىندە داۋىس سانى بويىنشا ءاربىر اتالىمدا الەۋەتتى كوشباسشى انىقتالدى. دەگەنمەن, 5 كۇندە جاعداي تۇبەگەيلى وزگەرۋى مۇمكىن, دەپ سانايدى ۇيىمداستىرۋشىلار. جالپىقالالىق «استانا تاڭداۋى» بايقاۋىنىڭ جەڭىمپازدارى حالىقتىڭ سۇيىسپەنشىلىگىنە يە بولۋمەن قاتار, ماتەريالدىق سىيلىقتار مەن جۇلدەلەر الادى.
ەركەجان ساتىمبەك
