كەشە «قازمەديا ورتالىعىندا» قوعامدىق «باس رەداكتورلار كلۋبى» بىرلەستىگى رەسەيدىڭ «مۋز-تۆ» ارناسىنىڭ باس ديرەكتورى ارمان داۋلەتياروۆپەن كەزدەسۋ ۇيىمداستىردى. جۇزدەسۋ بارىسىندا نەگىزگى اڭگىمە – 5 ماۋسىم كۇنى «استانا ارەنا» ستاديونىندا دۇرىلدەپ وتەتىن «مۋز-تۆ- 2015. گراۆيتاتسيا» سىيلىعىن تاپسىرۋ ءراسىمى توڭىرەگىندە ءوربىدى. سونداي-اق, جينالعانداردى كورشى مەملەكەتتى مويىنداتقان قانداسىمىزدىڭ ارالاساتىن ورتاسى, ونىڭ قازاقستانداعى شوۋ-بيزنەس, سونىڭ ىشىندە قازاق انشىلەرى تۋرالى ويى جانە ت.ب. سۇراقتار قىزىقتىردى.
«قازاقستانعا ۇنەمى الىپ-ۇشىپ كەلەمىن. وزگە ەلدە تۋسام دا, وسىندا ءوزىمدى ۇيىمدە جۇرگەندەي سەزىنەمىن. جالپى, قازاقستاندا نەمەسە وزگە ەلدەردە ماڭىزدى مادەني نەمەسە سپورتتىق شارالار وتكىزىلەتىن بولسا ءارى ونداي شارالاردا قازاقستاندىقتار توپ جارىپ جاتسا, دوستارىم وعان شىن قۋانىپ, مەنىمەن بايلانىستىرىپ وتىرادى. وسى كەزدەسۋگە ارنايى دايىندالعان جوقپىن. جۇرەگىمنىڭ تۇكپىرىندە, ءتىلىمنىڭ ۇشىندا نە تۇر, سونى ايتامىن دەپ كەلدىم. ەركىن وتىرىپ, سىرلاسايىق» دەگەن ارمان داۋلەتياروۆ ءارى قاراي ءوزى باسقاراتىن تەلەارنانىڭ ەلوردادا ۇيىمداستىرىپ وتىرعان اۋقىمدى مۋزىكالىق شاراسى قازاقستانعا نە بەرەتىنىن باياندادى.
ونىڭ ايتۋىنشا, «مۋز-تۆ» سىيلىعى سەكىلدى تەلەارنانىڭ ءارى مەملەكەتتىڭ بەدەلىن كوتەرەتىن الەمدىك دەڭگەيدەگى شوۋدىڭ استانادا وتكىزىلۋى قازاقستاننىڭ دا الەمگە تانىلۋىنا اسەرىن تيگىزەدى. «سىيلىقتى تاپسىرۋ ءراسىمىن تىكەلەي ەفير ارقىلى 100 ميلليون ادام تاماشالايدى. بيىل ونى كورەتىندەر قازاق مۋزىكا ونەرىمەن بارىنشا سۋسىندايدى. قاتىسۋشىلار قىزىل كىلەممەن ءجۇرىپ وتكەندە دە, جەڭىمپازدارعا سىيلىقتى تاپسىرۋ بارىسىندا دا قۇرمانعازىنىڭ كۇيلەرى, ەرمەك سەركەباەۆ پەن الىبەك دىنىشەۆتىڭ ورىنداعان اندەرى سەكىلدى تەك قازاق مۋزىكاسى وينالادى. وسىلايشا, ول ءبىراز ادامنىڭ قۇلاعىنا جەتەدى» دەدى ول.
جالپى, «مۋز-تۆ- 2015. گراۆيتاتسيا» سىيلىعىنا دامەلى رەسەيلىك انشىلەر قازاقستان تۋرالى وڭ كوزقاراستا ەكەنىن ايتا كەلە ولاردىڭ دايىندىعىنان دا حابار بەردى. ماسەلەن, «نيكولاي باسكوۆ قازاق ءتىلىن ۇيرەنىپ جاتىر» دەگەن اقپاراتتى كوزىمىز شالعان ەدى, ارمان داۋلەتياروۆ ونى راستادى. سونداي-اق, ديما بيلاننىڭ تۋىسقان اپكەسى قازاقستاندا تۇراتىنى, «ديسكوتەكا اۆاريا» توبىنىڭ ءبىر ءسوليسى قازاقستاندا تۋعانى وعان ۇلكەن جاڭالىق بولعانىن جەتكىزدى.
بيىل جاڭادان قوسىلىپ وتىرعان «ۇزدىك قازاقستاندىق ءارتىس» اتالىمىندا جانار دۇعالوۆا, قايرات نۇرتاس, نۇرلان ابدۋللين, «مۋزارت» توبى جانە ءالي وقاپوۆ ونەر جارىستىرادى. ارمان داۋلەتياروۆتىڭ پىكىرىنشە, وسىلاردىڭ قاي-قايسىسى اتاۋلى سىيلىقتى الۋعا لايىق. «ونەر باسەكەسىنە ءتۇسىپ جاتقان قازاقستاندىق انشىلەرمەن ەتەنە تانىس ەمەسپىن. تەك قايرات نۇرتاسپەن قوسىلىپ ءان ايتقانىم بار. قايرات ماعان ۇنادى. دۋەتتى جازدىرتقاندا دا ۇلكەن قولداۋ كورسەتتى» دەدى ول بۇل جونىندە.
جانار دۇعالوۆا «Turkvision» بايقاۋىنا قاتىسقاندا ارمان داۋلەتياروۆ رەسەي اتىنان قازان قالاسىنا بارىپ, قازىلار القاسى مۇشەلەرىنىڭ قاتارىندا وتىرىپتى. «شىنىمدى ايتسام, باسىندا بايقاۋعا قازاقستاننان قاتىسىپ جاتقان ءانشى بارىن بىلمەپپىن. سونى بىلگەنىمدە, «قينالعان جامبىل جەرى وسى» جاعدايىنا تاپ بولدىم. «جانار جەڭىمپاز بولدى» دەگەندە قاتتى قۋانىپ, ورنىمنان تۇرىپ شاپالاقتادىم. ول ارەكەتىممەن وزگە قازىلارعا دا «سيگنال» بەردىم» دەيدى قانداسىمىز.
ونىڭ ويىنشا, قازاقستان مەن رەسەيدىڭ شوۋ-بيزنەسى سالىستىرۋعا كەلمەيدى. «ماعان قازاقستاندىق ارتىستەر نەگە «مۋز-تۆ-دان كورىنبەيدى؟» دەگەن سۇراق ءجيى قويىلادى. ول سۇراقتى ماعان ەمەس, انشىلەردىڭ وزدەرىنە قويۋ كەرەك. بۇل جەردە قازاقستاندىق انشىلەر «ا-ستۋديو» سياقتى رەسەي ەستراداسىنا شىعۋعا تالپىنۋى كەرەك, مەنىڭشە» دەدى ا.داۋلەتياروۆ.
سونىمەن, «مۋز-تۆ» ارناسى باس ديرەكتورىمەن كەزدەسۋ اسەرلى ءوتتى. بىردە اللا پۋگاچەۆامەن اڭگىمەلەسۋ ساتىندە بالا كەزىندە اناسىنان ەستىگەن «اق بوپە» ءانىن ايتىپ بەرگەنىنەن ونىڭ جۇرەگى قازاق دەپ سوعاتىنىنا يلاندىق. جۇزدەسۋ سوڭىندا ءسوز سويلەگەن «باس رەداكتورلار كلۋبى» قوعامدىق بىرلەستىگىنىڭ پرەزيدەنتى بيبىگۇل جەكسەنباي دا سونى مەڭزەپ, قوناققا ۇلتىمىزدىڭ اقيىق اقىنى مۇقاعالي ماقاتاەۆتىڭ ەلەكتروندى كىتابىن سىيلادى.
امانعالي قالجانوۆ
