سايلاۋ الدىنداعى قۇرىلتايلار شەرۋىن Amanat پارتياسى اياقتادى. باسەكەلەس پارتيالار دا, ساراپشىلار قاۋىمى دا, قاراپايىم ادامدار دا بۇل قۇرىلتايدى تاعاتسىزدانا كۇتكەنى راس. بيلىك پارتياسىنىڭ كىمدەردى ۇمىتكەرلىككە ۇسىناتىنى, سايلاۋشىلارعا قانداي ۋادە بەرەتىنى, سايلاۋ الدىنداعى ناۋقاندى قالاي وتكىزەتىنى ءدۇيىم ەلدى ەلەڭدەتتى.
قۇرىلتايدى ىسكەرلىك سيپاتتا وتكىزۋدى ويلاعانمەن, بۇرىنعى Nur Otan-نان قالعان ۇرانشىلدىق كوڭىل كۇي ايقىن سەزىلىپ تۇردى. جيىننىڭ تىزگىنىن ۇستاعان تەلەجۇرگىزۋشى ماقسات تولىقباي «ۇرانداعان قۇرىلتايلاردىڭ زامانى ءوتتى. ءبىز قازىر سوزبەن ەمەس, ىسىمىزبەن ۇلگى بولايىق» دەگەنىمەن ۇرانشىلدىقتان ارىلا الماعان سپيكەرلەر دە بولدى.
ەكس-ءماجىلىسشى ەدىل جاڭبىرشين: «اۋىل – انامىز, تاريحىمىز, مادەنيەتىمىز. اۋىل – ءبارىمىزدى تەربەتكەن بەسىگىمىز! ونىڭ تازا اۋاسى مەن سامال جەلى, جۋسانى مەن جۋاسىنىڭ ءيىسى, تۇيەسىنىڭ بوزداعانى مەن قويىنىڭ ماڭىراعانى تابيعاتتىڭ ۇيلەستىرىپ قويعان «وركەسترى» ىسپەتتى. وسىنداي كەرەمەت, «جەردىڭ جۇماعى» سوڭعى جىلدارى قۇلازىپ, توزىپ بارادى. قازىر حالقىمىزدىڭ 40 پايىزى اۋىلدا تۇرادى. الداعى 5 جىلدا Amanat پارتياسى اۋىلدىڭ ينفراقۇرىلىمىن دامىتۋعا جۇيەلى جۇمىس جۇرگىزەدى. قازاقستان مىقتى بولادى – اۋىلدار مىقتى بولسا! ءادىل مەملەكەت قۇرۋدىڭ العىشارتىنىڭ ءبىرى – اۋىلدى اياعىنان تۇرعىزۋ. جۇرەگىمىزدە دە, ويىمىزدا دا «ادىلدىك», «اۋىل» دەگەن قاسيەتتى سوزدەر تاسقا ويىلعان ويۋ قۇساپ تۇرسىن!» دەپ ۇرانسوزگە تولى بايانداماسىن وقىدى.
ودان كەيىن ءسوز كەزەگىن العان ەكس-مينيستر اسحات ايماعامبەتوۆتى مودەراتور «زاماناۋي ساياساتكەردىڭ كورنەكتى وكىلى» دەپ تانىستىردى.
«ەلدە ساياسي ترانسفورماتسيا بولماسا, ءبىز جۇيەلى سيپاتتاعى ماسەلەلەردى شەشە المايمىز. ءبىز قازىر ۇلكەن وزگەرىستەردى كورىپ وتىرمىز. سونىڭ ءبىرى – سايلاۋ. وزگەرۋ, جاڭارۋ ءۇشىن بىزگە سەنىمدىلىك كەرەك. سەنىمدىلىككە ناقتى ناتيجەمەن, ناقتى ىسپەن عانا جەتە الامىز. ءبىز قازىر ادەمى سلايدتاردان, سوزدەر مەن باياندامالاردان شارشادىق, بىزگە ناقتى ىستەر عانا كەرەك» دەدى ول ءوز تاجىريبەسىنەن مىسال كەلتىرىپ.
مىنبەدەگىلەر ءسوز سويلەپ بولعان سوڭ, پارتيانىڭ اتقارۋشى حاتشىسى ەرنۇر بەيسەنباەۆ پارتيالىق تىزىمگە 90 ادام كىرگەنىن حابارلادى. بارلىق ۇمىتكەرلەر ساحناعا شاقىرىلىپ, پارتيا توراعاسى ەرلان قوشانوۆتىڭ بايانداماسىن تۇرەگەپ تۇرىپ تىڭدادى. توراعا زالدىڭ ەرەكشە اتموسفەراسىنا, سپيكەرلەردىڭ جۇرەكجاردى لەبىزىنە نازار اۋداردى.
«مۇنىڭ بارلىعى ءبىزدىڭ ءبىر مۇددە, ءبىر ماقساتقا جۇمىلعان بىرلىگىمىزدىڭ بەلگىسى دەپ بىلەمىن. وسى جەردە جالىنداعان جاستارىمىز كوپ. جاڭا عانا جاس پارتيالاسىمىز سەرىك ەسماتوۆتى تىڭدادىق. ءومىردىڭ اۋىر سىناعىنا مويىماي, بارىمىزگە مۇقالماس جىگەر مەن قايسارلىقتىڭ ۇلگىسىن كورسەتكەن ازامات. جەڭىمپازداردىڭ رۋحى ءدال وسىنداي بولادى. ءبىز الداعى سايلاۋعا وسىنداي رۋحپەن, وسىنداي جىگەرمەن بارا جاتىرمىز!» دەدى ول.
ودان ءارى ە.قوشانوۆ باعدارلامانىڭ باستى باسىمدىقتارىنا قىسقاشا توقتالدى.
«ءبىزدىڭ باسقالاردان ايىرماشىلىعىمىز زور. ءبىز ءوز كۇشىمىزگە سەنىمدىمىز. Amanat-تىڭ 800 مىڭنان اسا مۇشەسى بار. ارتىمىزدا قالىڭ قول تۇر. Amanat ءبىر سايلاۋدىڭ نەمەسە ءبىر ناۋقاننىڭ پارتياسى ەمەس. ءبىز 365 كۇن بويى, 24 ساعات ءۇزىلىسسىز, تىنىمسىز جۇمىس ىستەپ كەلەمىز» دەي كەلە, الداعى سايلاۋدا Amanat-تىڭ كوشباسشى پارتيا ەكەنىن ءسوزسىز دالەلدەيمىز دەپ اياقتادى.
«Amanat» پارتياسى ماسليحاتتارعا 3821, ماجىلىسكە 119 ۇمىتكەر ۇسىندى. ۇمىتكەرلەردىڭ قۇرامى 75 پايىزعا جاڭارىپتى. ولاردىڭ ۇشتەن ءبىرىن ايەلدەر, بەستەن ءبىرىن جاستار قۇرايدى. پارتيالىق ءتىزىم بويىنشا ۇسىنىلعان 90 ادامنىڭ ىشىندە 68-ءى – قازاق, 13-ءى – ورىس, 9-ى – وزگە ۇلت وكىلى. سونىڭ ىشىندە بۇرىن تاراتىلعان ءماجىلىستىڭ 24 ەكس-دەپۋتاتى بار, 6-ۋى – پرەزيدەنتتىك جاستار كادر رەزەرۆىنىڭ مۇشەسى. بۇرىنعىلاردان ەرلان سايروۆ, ايدوس سارىم, امانجول التاەۆ, ايگۇل قۇسپان, كونستانتين اۆەرشين, ناتاليا دەمەنتەۆا, ارتۋر پلاتونوۆ, البەرت راۋ, پاۆەل كازانتسەۆ, ۆەرا كيم, يۋليا كۋچينسكايا, ەكاتەرينا سمىشلياەۆا بولسا, جاڭالاردان ەكس-مينيستر اسحات ايماعامبەتوۆ تۇر. ءبىر مانداتتى وكرۋگتەر بويىنشا ۇمىتكەرلەر تىزىمىنە استانا قالاسىنان داۋلەت تۇرلىحانوۆ, ەرىك جولجاقسىنوۆ, اباي وبلىسىنان نۇرتاي سابيليانوۆ, ماڭعىستاۋ وبلىسىنان ەدىل جاڭبىرشين كىرىپتى.
90-نىڭ 62-ءسى – «جاڭا ادامدار», ولاردىڭ ىشىندە جۋرناليست ماقسات تولىقباي, بوكسشى فيرۋزا شاريپوۆا, شاحماتشى دينارا سادۋاقاسوۆا, گيمناستشى ءاليا يۋسۋپوۆا, شەنەۋنىكتەردەن اقپارات جانە قوعامدىق دامۋ ءمينيسترىنىڭ بۇرىنعى ورىنباسارى الەكساندر دانيلوۆ, قارجى ءمينيسترىنىڭ ورىنباسارى تاتيانا ساۆەلەۆا, بۇرىنعى دەپۋتات, بلوگەر مۇرات ابەنوۆ, بلوگەر عالىم بايتۇق, بەلگىلى ايتىسكەر اقىن رينات زايىتوۆ بار.
