ەلىمىزدە الەۋمەتتىك جەلىنىڭ الەۋەتى ارتىپ كەلەدى. كۇنى كەشە پارلامەنتتە قارالعان قىلمىستىق جانە قىلمىستىق ءىس جۇرگىزۋ كودەكستەرىندە بۇل ماسەلە شەت قالماعان. ياعني, الەۋمەتتىك جەلىدە بىرەۋدى عايباتتاعاندارعا 500 ايلىق ەسەپتىك كورسەتكىش كولەمىندە ايىپپۇل سالۋ قاراستىرىلعان. ءسىزدىڭ ويىڭىزشا, ارناۋلى ساراپتاما نەگىزىندە جۇزەگە اساتىن بۇل شارا قانشالىقتى ءتيىمدى بولماق؟
ءادىل اگيتاەۆ, س.عىلماني مەشىتىنىڭ نايب يمامى:
– الەۋمەتتىك جەلىدە بىرەۋدى عايباتتاعاندارعا 500 ايلىق ەسەپتىك كورسەتكىش كولەمىندە ايىپپۇل سالۋ قاراستىرىلۋدا ەكەن. يسلام دىنىندە دە عايبات تۋرالى كوپ ايتىلادى. ونىڭ جاماندىعى جايلى قۇران كارىمنىڭ «ءاي, يمان كەلتىرگەندەر! كوپتەگەن ويلاردان اۋلاق بولىڭدار, ويتكەنى, كەيبىر ويلار كۇنا بولىپ تابىلادى. ءبىر-ءبىرىڭدى اڭدىماڭدار, ءارى ارقالارىڭدا ءبىر-بىرىڭە عيبا جاساماڭدار» دەگەن اياتى بار. پايعامبار حاديستەرىنىڭ بىرىندە دە: «ەي, تىلىمەن يمان ەتىپ, جۇرەگىمەن سەنبەگەندەر, مۇسىلمانداردى سىرتىنان وسەكتەمەڭدەر جانە ولاردىڭ كەمشىلىگىن ىزدەمەڭدەر. كىم دە كىم مۇسىلمان باۋىرىنىڭ ايىبىن اشپاق بولسا, اللا ونىڭ ءوزىنىڭ ايىبىن اشادى. اللا تاعالا كىمنىڭ ايىبىن اشار بولسا, ول كىسىنى ۇيىندە وتىرىپ-اق ابىرويىنان ايىرادى» دەگەن. ونداي ادام اقىرەتتە دە جازاسىز قالمايدى.
جانار ادىلحانقىزى, ستۋدەنت:
– سوڭعى دەرەكتەرگە سۇيەنسەك, ەلىمىزدە 5,6 ميلليون ادام الەۋمەتتىك جەلىلەردى كۇندەلىكتى پايدالانادى ەكەن. ەڭ تانىمال الەۋمەتتىك جەلىلەردىڭ قاتارىنا «موي مير», «ودنوكلاسسنيكي», «ۆ كونتاكتە» جانە «Facebook» -ءتى جاتقىزۋعا بولادى. ال, 350 مىڭنان استام ادام ۇيالى تەلەفونمەن «mail.ru agent»-ءتى تۇتىنادى. وسى رەتتە ايتا كەتكەن ءجون, پسيحولوگ ماماندار الەۋمەتتىك جەلىنىڭ الەگى وتىرىك سويلەۋدەن باستالادى دەيدى. ءاربىر ەكىنشى ادام ءوزى جايىندا وتىرىك مالىمەت جازىپ, ەسىمى مەن جاسىن, وتباسىلىق جاعدايىن, ءتۇر-الپەتىن, ءبىلىمى مەن جۇمىسىنا قاتىستى جالعان اقپار بەرەدى. الەۋمەتتىك جەلىدە بىرەۋدى عايباتتاعاندارعا عانا ەمەس, ءوزى تۋرالى وتىرىك اقپارات بەرگەندەردى دە جازالاسا دەگەن ۇسىنىسىم بار.
نۇرجان پىرماعانبەت, زاڭگەر:
– مەنىڭ ويىمشا, بۇل – وتە دۇرىس باستاما. ءارى بۇل رەتتە ەشكىمنىڭ قۇقىنا قول سۇعىلمايدى. كەرىسىنشە, ازاماتتاردىڭ ءبىر-ءبىرىنىڭ ار-وجدانىنا, كىسىلىك بەدەلىنە دەگەن قۇرمەتىن قالىپتاستىراتىن بولادى. جۇرت ويلاعانداي زاڭ جۇزىندەگى مۇنداي شەكتەۋ جاپپاي مىندەت ەمەس, ادامداردىڭ ءىس-ارەكەتتەرىن رەتتەۋ ءۇشىن عانا قولدانىلادى ەمەس پە؟! بۇل الەۋمەتتىك جەلىدە وتىراتىندارعا عانا ەمەس, قوعامنىڭ بارلىق مۇشەسىنە قاتىستى ماسەلە ەكەنىن ۇمىتپاعان ءجون.
