بار ءومىرىن دەنساۋلىق ساقتاۋ سالاسىنا ارناپ, ۇزاق جىلدار بويى جەمىستى ەڭبەك ەتىپ, حالىقتىڭ ىستىق ىقىلاسى مەن العىسىنا بولەنىپ جۇرگەن دارىگەرلەر از با ارامىزدا. سولاردىڭ ءبىرى – ۇجىمىمىزدىڭ ماقتانىشى, ءوز ءىسىنىڭ مامانى ءلاززات اياشەۆا.
جاستايىنان ەڭبەكقور بولىپ وسكەن ءلاززات حايبراحمانقىزى سەگىزىنشى سىنىپتى اياقتاعان سوڭ ءوز قالاۋىمەن اتباسار مەديتسينالىق ۋچيليششەسىنە وقۋعا ءتۇسىپ, ونىڭ مەدبيكە ءىسى ءبولىمىن ۇزدىك باعامەن ءبىتىرىپ شىعادى. ەڭبەك جولىن تسەلينوگراد قالاسىنىڭ جەدەل مەديتسينالىق جاردەم بەرۋ اۋرۋحاناسىنىڭ قابىلداۋ ءبولىمىنىڭ مەدبيكەسى قىزمەتىنەن باستايدى. 1982 جىلى مەدۋچيليششەنىڭ جولداماسىمەن تسەلينوگراد مەملەكەتتىك مەديتسينا ينستيتۋتىنا ءتۇسىپ, 1988 جىلى «ەمدەۋ ءىسى» فاكۋلتەتىن ويداعىداي اياقتايدى. ينستيتۋتتا وقىپ جۇرگەن كەزىنىڭ وزىندە مەدبيكە جۇمىسىن جالعاستىرىپ, تاجىريبە جيناقتاي بىلگەن ءلاززات حايبراحمانقىزى ءبىر جىلدىق ينتەرناتۋرادان كەيىن №6 قالالىق اۋرۋحانعا ينفەكتسيونيست دارىگەر قىزمەتىنە قابىلدانادى. ال 1993 جىلدان بەرى ول قالالىق جۇقپالى اۋرۋلار اۋرۋحاناسىندا ينفەكتسيونيست, جيىرما جىلدان استام ۋاقىتتان بەرى وسى مەكەمەدە ەڭبەك ەتىپ كەلەدى.
2001جىلدان باستاپ ۋلترادىبىستى دياگنوستيكالاۋ دارىگەرى ماماندىعىن مەڭگەرگەن ل.اياشەۆانىڭ سول سالادان 2011 جىلدان بەرى ءبىرىنشى بىلىكتىلىك ساناتى بار. ول راديوتسيوندى جانە ساۋلەلى دياگنوستيكا سالاسىندا جاڭا تەحنولوگيلاردى ءوز جۇمىسىندا بەلسەندى پايدالانۋدا. تاجريبەسىن ۇنەمى تەوريامەن جالعاستىرىپ, ءبىلىم ساپاسىن ءار ۋاقىتتا نىعايتىپ وتىراتىن بىلىكتى مامان سانكت-پەتەربۋرگ, قازان, بىرنەشە رەت الماتى قالالارىندا وقىپ, جۇقپالى اۋرۋلاردىڭ دياگنوستيكاسىن ناق انىقتاۋ, گەپاتالوگيانىڭ تاڭداۋلى ماسەلەلەرى سەكىلدى تاقىرىپتار بويىنشا ءبىلىم دارەجەسىن جەتىلدىرىپ قايتتى.
جان-جاقتى بىلىكتى مامان ءارى ادامگەرشىلىگى مول ازاماتشا رەتىندە دە ءوزىن تانىتا بىلگەن ءلاززات حايبراحمانقىزىن اۋرۋحانا اكىمشىلىگى 2012 جىلدىڭ شىلدە ايىنان باستاپ بولىمشە مەڭگەرۋشىسى لاۋازىمىنا تاعايىندادى. سول جىلدان بەرى ول حالىقارالىق ەۋروازياتتىق ينفەكتسيونيستەر قوعامىنىڭ مۇشەسى بولسا, 2010 جىلدان بەرى – قالالىق №2 اۋرۋحانانىڭ تۇراقتى ينفەكتسيونيست كەڭەسشى دارىگەرى.
ەرتەلى-كەش تىنىمسىز ەڭبەك ەتىپ جانعا داۋا, جۇرەككە جىلۋ بەرىپ جۇرگەن ابزال جان مەملەكەتتىك «سالاماتتى قازاقستان» باعدارلاماسىن ورىنداۋدى باستى باعىت دەپ بىلەدى. ۇجىمداعى جاس ماماندار اراسىندا دا, ناۋقاستار اراسىندا دا ناسيحات جۇمىستارىن بەلسەندى جۇرگىزۋدە. سالاۋاتتى ءومىر سالتىن قالىپتاستىرۋ دەنساۋلىق ساقتاۋ ءىسىنىڭ باستى مىندەتى دەپ سانايدى. «اۋىرىپ ەم ىزدەگەنشە, اۋىرماۋدىڭ جولىن ىزدە» دەگەن قاعيدانى ۇنەمى قولدانىپ وتىرادى. بىرنەشە رەت راديو, تەلەديداردان سۇحبات بەرىپ, جەرگىلىكتى گازەت-جۋرنالدارعا ماقالالارى باسىلىپ شىقتى. اۋرۋحانامىزدىڭ قوعامدىق ومىرىنەن دە تىس قالىپ كورگەن ەمەس, سپورتتىق ءىس-شارالارعا بەلسەنە قاتىسىپ تۇرادى.
ل.اياشەۆا – «نۇر وتان» پارتياسىنىڭ بەدەلدى مۇشەسى. ەڭبەگىنە وراي بىرنەشە رەت استانا قالاسىنىڭ دەنساۋلىق ساقتاۋ دەپارتامەنتىنىڭ, اۋرۋحانا اكىمشىلىگىنىڭ قۇرمەت گراموتالارىمەن ماراپاتتالعان. 2012 جىلى ادال ەڭبەگى ءۇشىن «شاپاعات» ءتوس بەلگىسىمەن ماراپاتتالدى.
كوكەناي تاشيموۆا,
قالالىق جۇقپالى اۋرۋلار اۋرۋحاناسىنىڭ سالاۋاتتى ءومىر سالتىن
ناسيحاتتاۋ دارىگەرى
