«اۋزىنداعى ساعىزىن لاقتىرىپ تاستاعانداردى ۇستاپ, ساۋساق تاڭبالارىن الىڭدار. الدىمەن ەسكەرتۋ جاساڭدار. ەكىنشى رەت قايتالاسا ايىپپۇل سالۋ كەرەك. ءۇشىنشى رەت ۇستالسا, ءۇش كۇنگە قاماڭدار»…
مەملەكەت باسشىسىنىڭ ەلوردا تازالىعىن ساقتاۋعا قاتىستى بۇل تاپسىرماسىنىڭ ايتىلعانىنا اتتاي التى اي بولدى.
ءتارتىپ ساقشىلارىنا قاراتىپ ايتىلعان تاپسىرما قانشالىقتى ورىندالىپ ءجۇر؟ كوشە تازالىعىن ساقتاماعانى ءۇشىن قولىنا كىسەن كيگەن جان بار ما؟ قاراپايىم حالىقتىڭ بۇعان دەگەن كوزقاراسى قانداي؟
قالا تازالىعىن ساقتاماعاندار قانداي جازاعا تارتىلىپ ءجۇر؟
قۇرالاي قارينا, استانا قالاسى ءىىد اكىمشىلىك پوليتسيا باسقارماسىنىڭ ءبولىم باستىعى:
جىل باسىنان بەرى اكىمشىلىك قۇقىق بۇزۋشىلىق تۋرالى كودەكستىڭ 330-بابىندا كورسەتىلگەندەي, ۇساق بۇزاقىلىققا قاتىستى 2232 حاتتاما تولتىرىلدى. حاتتاما نەگىزىندە ءتيىستى ايىپپۇلدار سالىندى, سونىمەن قاتار, 64 ادام قاماۋعا الىندى.
ال, اباتتاندىرۋ ەرەجەسىن بۇزۋشىلىققا, ياعني قالا تازالىعىن ساقتاماعان جەكە تۇلعالار مەن مەكەمەلەرگە قاتىستى وسى ۋاقىت ارالىعىندا 11 511 ءىس تىركەلدى.
ءۇمىت بەكجانوۆا, عىلىمي ساراپتاما جانە تالداۋ ينستيتۋتىنىڭ اۋدارماشىسى:
كوشە تازالىعىن ساقتاماعانداردىڭ زاڭ الدىندا جاۋاپ بەرگەندەرىن كورىپ تە, ەستىپ تە ءجۇرمىن. ءبىر تانىسىم ايالدامادا تۇرىپ سومكەسىندەگى قوقىسىن جەرگە تاستاعانى ءۇشىن ايىپپۇل تولەپ, ارەڭ قۇتىلدى. ەگەر, كوپشىلىك ورىندا تازالىق ساقتاۋعا ادامنىڭ وزدىگىنەن ساناسى جەتپەيدى ەكەن, ونى زاڭمەن تاربيەلەۋدەن وزگە جول جوق.
كەزىندە ەڭ كريمينالدى بولىپ سانالاتىن امەريكانىڭ ءبىر قالاسىندا وسى ءتاسىلدى قولدانىپتى عوي. كۇندەلىكتى ومىردە بايقالا بەرمەيتىن وسىنداي ۇساق-تۇيەك قىلمىستاردى جويۋ ارقىلى قالانى تارتىپكە كەلتىرگەن. زاڭنىڭ جۇمىس ىستەگەنى دە دۇرىس. بىراق, ءدال وسى ماسەلەگە قاتىستى مەنىڭ ءبىر ايتارىم بار. حالىقتى تازالىققا شاقىرماس بۇرىن, قالانى قوقىس تاستايتىن جاشىكتەرمەن تولىق قامتاماسىز ەتىپ العانىمىز دۇرىس سياقتى. جاسىراتىنى جوق, كەيدە اكىمدىكتىڭ سايتىنا اۋلاسىندا قوقىس سالاتىن جاشىك جەتىسپەي تالاي تۇرعىن شىرىلداپ حابارلاسىپ جاتادى. ءتارتىبىن ۇلگىگە الىپ وتىرعان امەريكادا ادام كوپ جۇرەتىن قوعامدىق ورىنداردا ءار بەس مەتر سايىن قوقىس جاشىگى قويىلادى ەكەن. بۇل ۇيرەنەتىن ءۇردىس پە؟ ارينە!
