ۇلى جەڭىستىڭ 70 جىلدىعى قارساڭىندا قالالىق ارداگەرلەر كەڭەسىنىڭ ۇيىمداستىرۋىمەن الماتى اۋدانى اۋماعىنداعى «ايدار» شاعىن ورتالىعىندا سوعىس جانە ەڭبەك ارداگەرلەرىمەن كەزدەسۋ ءوتتى.
اتالمىش شاراعا قالالىق ءماسليحاتتىڭ دەپۋتاتى قارشىعا قۇلمۇقانوۆ, قالالىق ارداگەرلەر كەڭەسىنىڭ توراعاسى امانكەلدى سىزدىقوۆ, الماتى اۋداندىق ارداگەرلەر كەڭەسىنىڭ توراعاسى سايلاۋبەك بايبولوۆ قاتىسىپ, ءسوز سويلەدى.
– بۇگىنگى ۇرپاقتىڭ باقىتتى بولاشاعى مەن بەيبىت ءومىرى جولىندا قان مايداندا جاۋمەن بەتپە-بەت سوعىسىپ, كەۋدەسىن وققا توسەپ, ەرلىك ۇلگىلەرىن كورسەتكەن اتالار ەسىمى ەشقاشان دا ۇمىتىلمايدى. ەل تاۋەلسىزدىگىنە دە سىزدەردىڭ ەرەن ەڭبەكتەرىڭىز بەن ىنتىماق, بىرلىكتىڭ ارقاسىندا قول جەتكىزدىك. سول ءۇشىن, سىزدەرگە مىڭ العىس! – دەدى ا.سىزدىقوۆ.
برۋسيلوۆسكي كوشەسىندەگى 2-ۇيدە ورنالاسقان «ايدار» شاعىن ورتالىعىندا وسىندا تۇراتىن ارداگەرلەردىڭ بوس ۋاقىتتارىن ءتيىمدى وتكىزۋگە بارلىق جاعداي قاراستىرىلعان. ولار مۇندا شاحمات,
دويبى ويناپ, گازەت-جۋرنالدار وقيدى. سوندىقتان دا قولى بوس ارداگەرلەر كۇن سايىن ورتالىققا اسىعادى.
كەزدەسۋگە كەلگەن سوعىس ارداگەرلەرى اۋباكىر ۋاليەۆ, ءابدىراحمان ساپاروۆ قان مايدانداعى قىرعىن تۋرالى اڭگىمەلەي كەلە, وزدەرىن وسىنداي قامقورلىققا بولەپ, ۇنەمى كومەك قولىن سوزىپ, قۇرمەت كورسەتىپ كەلە جاتقان ازاماتتارعا العىستارىن جەتكىزدى.
اتالمىش شاراعا الماتى اۋدانىندا تۇراتىن جيىرما ءبىر مايدانگەر, سونىمەن بىرگە ەڭبەك ارداگەرلەرى مەن تىل ەڭبەككەرلەرى – بارلىعى جەتپىس ادام شاقىرىلىپتى. كەش سوڭىندا ۇيىمداستىرۋشىلار ارداگەر اتا-اجەلەرگە سىيلىقتار تاپسىردى.
گۇلبارشىن وكەشقىزى
