استانادا پروكۋراتۋرانىڭ ارالاسۋىنان كەيىن ەلەكتر ەنەرگياسى ءۇشىن ارتىق تولەم جاساعان تۇرعىندارعا اقشالارى قايتارىلىپ جاتىر.
بيىل الەۋمەتتىك جەلىلەردە ەلوردا تۇرعىندارىنان ەلەكتر ەنەرگياسى ءۇشىن جوعارى شوتتار بەلگىلەنگەنى تۋرالى جاريالانىمدار جيىلەپ كەتتى. بۇل ماسەلە قالا پروكۋراتۋراسىندا ۋاكىلەتتى ورگانداردىڭ, اكىمدىكتىڭ جانە قىزمەت كورسەتۋشىلەردىڭ («استانا-اەك» اق جانە «استاناەنەرتۇتىنۋ» جشس) قاتىسۋىمەن تالقىلاندى.
انىقتالعانداي, ەنەرگيامەن جابدىقتاۋشى ۇيىمنىڭ دەرەكتەردى قابىلداپ-جيناقتاۋدى ءتيىستى ۇيىمداستىرماۋىنان تۇتىنىلعان ەلەكتر ەنەرگياسىنىڭ كولەمى دۇرىس ەسەپتەلمەگەن. كوپتەگەن استانالىقتارعا ورتاشا تاۋلىكتىك كولەم ەسەپتەلگەن. وسىلايشا ەسەپتەۋ قۇرالدارىنىڭ كورسەتكىشتەرىنە سايكەس ابونەنت ناقتى قابىلداعان ەنەرگيا مولشەرى ءۇشىن ەنەرگيا تولەمىن جۇرگىزۋ تۋرالى ازاماتتىق كودەكستىڭ 488-بابىنىڭ تالاپتارى بۇزىلعان.
سالدارىنان قالا تۇرعىندارىنا ۇلكەن مولشەردە ەسەپشوتتار كەلگەن, – دەلىنگەن باس پروكۋراتۋرا مالىمەتىندە.
ەسكە سالايىق, ءمان-جايدى انىقتاۋ ءۇشىن قالا تۇرعىندارى «استانا-اەك» اق مەن «استاناەنەرگوتۇتىنۋ» جشس-ءنىڭ تابالدىرىقتارىن توزدىرۋعا ءماجبۇر بولعان ەدى.
كوپتەگەن ادامداردىڭ قۇقىعى بۇزىلۋىن ەسكەرە وتىرىپ, قالا پروكۋراتۋراسى باس پروكۋراتۋرا ارقىلى تابيعي مونوپوليالاردى رەتتەۋ كوميتەتىنە قاداعالاۋ اكتىسىن ەنگىزدى. ۋاكىلەتتى ورگان ەلەكتر ەنەرگياسى ءۇشىن نەگىزسىز ەسەپتەۋگە جول بەرگەن سۋبەكتىلەرگە تەكسەرۋ جۇرگىزۋ تۋرالى ماسەلەنى قاراۋى قاجەت. بۇزۋشىلىقتار انىقتالعان جاعدايدا زاڭدا كوزدەلگەن دەن قويۋ شارالارىن قابىلدايدى. قازىرگى ۋاقىتتا «استانا-اەك» اق بىرنەشە ون مىڭداعان ابونەنتكە ەلەكتر ەنەرگياسىنىڭ كولەمىن قايتا ءبولدى. ەسەپتەۋلەردى تۇزەتۋ جۇمىستارى جالعاسىپ جاتىر جانە پروكۋراتۋرانىڭ باقىلاۋىندا, – دەلىنگەن ۆەدومستۆو مالىمەتىندە.
ايتا كەتەيىك, ەلەكتر ەنەرگياسى ءۇشىن ارتىق تولەم جاساعان تۇرعىندار مەن مەكەمەلەر تابيعي مونوپوليالاردى رەتتەۋ جونىندەگى قالالىق دەپارتامەنتكە ءوز بەتىمەن دە جۇگىنە الادى.
