تاياۋدا قالا كوشەلەرىندە ەرەكشە اكتسيا وتكىزىلدى. جول-پاترۋلدىك پوليتسيا قىزمەتكەرلەرى جاس ينسپەكتورلارمەن بىرگە جول ەرەجەسىن بۇزعان اتا-انالار مەن بالالارعا ايىپپۇلدىڭ ورنىنا ەسكەرتۋ جاساپ, جول قاۋىپسىزدىگى ەرەجەلەرىن ساقتاۋ قاجەتتىلىگىن ءتۇسىندىردى. قاجەتتى اقپاراتپەن جارنامالار ۇلەستىردى.
جول ءجۇرۋ ەرەجەسىن بۇزۋشىلارعا جول قاۋىپسىزدىگىن ساقتاماۋى سالدارىنان اپاتقا ۇشىراعان جۇرگىنشىلەر تۋرالى بەينەوروليكتەر كورسەتىلدى.
مامانداردىڭ پىكىرىنشە, بەينەروليكتەردى كورسەتۋ ەرەسەكتەرگە اكىمشىلىك ايىپپۇلدان گورى تيىمدىرەك ىقپال ەتكەنىن ايتادى.
№2 مەكتەپ-ليتسەيدىڭ جانىنان پوليتسەيلەر توقتاتقان اتا-انالار دا وسى پىكىرمەن كەلىستى. ولار جولدىڭ بەلگىلەنبەگەن جەرىنەن وتكەن وز ارەكەتتەرىنە «جاياۋ جۇرگىنشى وتكەلى مەكتەپتەن الىس, ونىڭ ۇستىنە قاتتى اسىعىپ تۇر ەدىك» دەگەن ءۋاج ايتتى. الايدا, بەينەروليكتەردى كورگەننەن كەيىن ۋاقىتتىڭ جەتىسپەۋشىلىگى مەن باسقا دا سەبەپتەر جول قوزعالىسى ەرەجەلەرىن بۇزۋعا نەگىز ەمەستىگىنە كوز جەتكىزدى.
«جول ءجۇرۋ مادەنيەتىن بالا كەزىنەن ۇيرەتۋ قاجەت, ءاربىر جول ءجۇرۋ مۇشەسى ءوزىنىڭ جاۋاپكەرشىلىگىن سەزىنۋ كەرەك. ونىڭ جولداعى تارتىپسىزدىگى باسقا ادامداردىڭ ومىرىنە جانە دەنساۋلىعىنا قاۋىپ تۋعىزاتىنىن ءتۇسىنۋ كەرەك» دەيدى استانا قالاسى ىىد ءاپب ەرەكشە تاپسىرمالار جونىندەگى اعا ينسپەكتورى لاريسا كراسنيكوۆا.
ونىڭ ايتۋىنشا, جىل باسىنان بەرى جاياۋ جۇرگىنشىلەردىڭ كىناسىنەن بولعان 78 جول وقيعاسىندا 7 ادام قازا تاۋىپ, 72-ءسى ءتۇرلى جاراقاتتار العان. جولدىڭ ءجۇرۋ بولىگىنەن قاۋىپسىز وتۋ ەرەجەلەرىن بۇزعانى ءۇشىن 14,5 مىڭنان استام جاياۋ جۇرگىنشىگە 134,5 ملن تەڭگە كولەمىندە ايىپپۇل سالىندى.
ال, پوليتسيا قىزمەتكەرلەرى جول قاۋىپسىزدىگى ەرەجەلەرىن بۇزعانى ءۇشىن قر «اكىمشىلىك قۇقىق بۇزۋشىلىقتار تۋرالى» كودەكسىنىڭ 473-بابىنا سايكەس جاياۋ جۇرگىنشىلەرگە بەس ايلىق ەسەپتىك كورسەتكىش كولەمىندە اكىمشىلىك ايىپپۇل سالىناتىنىن, ەرەجەنى ءجيى بۇزاتىندار ون بەس ايلىق ەسەپتىك كورسەتكىش مولشەرىندە ايىپپۇل تولەيتىنىن نەمەسە ءۇش تاۋلىككە اكىمشىلىك قاماۋعا الىناتىنىن ەسكەرتەدى.
ساعي ورال
