ەلوردا اكىمى جەڭىس قاسىمبەك الماتى اۋدانىنىڭ تۇرعىندارىمەن كەزدەستى. «اشىق ميكروفون» فورماتىندا وتكەن كەزدەسۋدە اكىمگە ساۋال قويعىسى كەلگەن بارلىق تۇرعىنعا مۇمكىندىك بەرىلدى. ءۇش ساعاتتان اسا ۋاقىتقا سوزىلعان جيىندا اۋدان تۇرعىندارى الەۋمەتتىك نىساندار, ينجەنەرلىك جەلىلەر, جولدار مەن تروتۋارلار, اۋلالار مەن قوعامدىق كەڭىستىكتەر سالۋ, اباتتاندىرۋ, جىلى ايالدامالار, بەينەباقىلاۋ كامەرالارىن ورناتۋ, جاڭا مارشرۋتتاردى ىسكە قوسۋ, ينتەرنەت, ينفراقۇرىلىم نىساندارى جانە ت. ب. ماسەلەلەردى كوتەردى.
«مۇنداي جۇزدەسۋلەر تۇراقتى تۇردە وتكىزىلەدى. ونىڭ ىشىندە قالانىڭ وزگە دە اۋداندارىنىڭ, ەلدى مەكەندەردىڭ تۇرعىندارىمەن كەزدەسەمىز. وسى ورايدا نەگىزگى ماسەلەلەرگە توقتالىپ وتەيىن. قالادا سۋمەن, جىلۋمەن, ەلەكترمەن قوسىمشا جابدىقتاۋ قاجەتتىلىگى بار. كەلەسى جىلىتۋ ماۋسىمى باستالعانعا دەيىن №3 جىلۋ-ەلەكتر ورتالىعىن, ەكى گاز جىلۋ ستانساسىنىڭ قۇرىلىسىن اياقتاۋدى تاپسىردىم. بۇل نىساندار جىلۋمەن جابدىقتاۋ كولەمىن ەداۋىر ارتتىرۋعا, سول سياقتى قۇرىلىسى ءجۇرىپ جاتقان اۋدانداردى جىلۋمەن قامتۋعا مۇمكىندىك بەرەدى. سونىمەن قاتار بيىل اۋىز سۋ ستانساسىن (3-سسس) تولىق قۋاتىمەن ىسكە قوسۋدى جوسپارلاپ وتىرمىز, بۇل سۋ بەرۋ ماسەلەسىن دە شەشەدى. دەگەنمەن بىرنەشە جىلدان كەيىن بۇل دا جەتكىلىكسىز بولادى. سول سەبەپتى قالانىڭ باس جوسپارىنىڭ جوباسىنا ەلوردانىڭ تىرشىلىگىن دۇرىس قامتاماسىز ەتۋگە مۇمكىندىك بەرەتىن بىرقاتار نىساننىڭ قۇرىلىسىن ەنگىزەمىز» دەدى قالا باسشىسى.
كەزدەسۋدە تۇرعىندار №15 قالالىق ەمحانا مەن №13 مەكتەپ («پرومىشلەننىي» ەلدى مەكەنى) بويىنشا وزەكتى ماسەلەلەردى كوتەردى.
«ەمحانا بويىنشا بيىل جوبالاۋ جۇمىسىن باستايمىز, سودان كەيىن قۇرىلىسىنا كىرىسەمىز. مەكتەپ بويىنشا بيىل جاڭا عيماراتتىڭ قۇرىلىسىن باستاۋدى جوسپارلاپ وتىرمىز. سول سياقتى كوكتەم مەزگىلىنىڭ كەلۋىمەن اۋدانداردى اباتتاندىرۋ, جولدار مەن تروتۋارلار, اۋلالار مەن قوعامدىق كەڭىستىكتەر سالۋ جانە تاعى باسقا باعىتتار بويىنشا جۇيەلى جۇمىستاردى جالعاستىرامىز. كەزدەسۋ بارىسىندا كوتەرىلگەن ماسەلەلەردى شەشۋ جۇمىستارىن قولعا الدىق, ولاردىڭ ورىندالۋ بارىسى تۋرالى تۇرعىنداردى حاباردار ەتەمىز» دەدى جەڭىس قاسىمبەك.
