ءاسيما بيمەندينا, قر پارلامەنت ءماجىلىسىنىڭ دەپۋتاتى
ەلىمىز تاۋەلسىزدىك العان 23 جىلدا تالاي بيىكتى باعىندىرىپ, كوپتەگەن جەتىستىككە جەتتى, بولاشاققا سەنىمدى قادامدار جاسادى, قازاق اتىمىز الەمگە تانىلدى. ايبىندى قالامىز استانا – اسقارالى اسۋلارىمىزدىڭ ايعاعى. ەلىمىزدە وتكەن حالىقارالىق شارالار ابىرويىمىزدى اسىردى.
ەلباسى كەشە تاۋەلسىزدىك كۇنىنە ارنالعان سالتاناتتى جيىندا سويلەگەن سوزىندە «نۇرلى جول» جاڭا ەكونوميكالىق ساياساتى جاي عانا باعدارلاما ەمەس, الەمدىك سىن-قاتەرلەرگە قارسى دايىندالعان قورعانىس قۇرالى ەكەنىن ەرەكشە اتاپ ءوتتى. جاھاندىق ەكونوميكامەن ساناسا وتىرىپ, بايىپپەن جاسالعان باعدارلاما ەلدەگى بارلىق وڭىرلەر ءۇشىن جاڭا مۇمكىندىكتەرگە جول اشادى.
ەلباسى كەلەسى جىلى ۇلكەن دەڭگەيدە تويلاناتىن مەرەيلى داتالارعا توقتالدى. سونىڭ ىشىندە قازاق حاندىعىنىڭ قۇرىلۋىنىڭ 550 جىلدىعىن ەرەكشە اتاۋعا بولادى. بۇل تاريحىمىز تۇگەندەلەتىن, ۇلتتىق بولمىسىمىز ۇلىقتالاتىن, ەلدىگىمىزدىڭ ىرگەسىن نىعايتاتىن ماڭىزدى مەرەكە بولماق. ءبىز – بيىك باسپالداقتاردان, تاريحي وتكەلدەردەن وتكەن تەكتى حالىقپىز. سوندىقتان وسىنداي ۇلى تويدى وتكىزۋگە دايىن بولۋىمىز كەرەك, دارىپتەۋىمىز كەرەك, ءوزىمىزدى وزگەلەرگە دالەلدەۋىمىز كەرەك. ەلباسى نىقتاپ تاپسىرمالار بەردى. ەندى رۋحى جوعارى ەلىمىز مۇنداي كۇندى اسقاقتاتىپ اتاپ وتەدى دەپ ويلايمىن.
قازاقستاننىڭ بۇگىنگىدەي بەرىك ەل بولۋىندا ۇلتتار اراسىنداعى ىنتىماقتىڭ ءرولى زور. كەلەر جىلى قازاقستان حالقى اسسامبلەياسىنىڭ 20 جىلدىعى تويلانادى. بىرلىگىمىز بەكەم بولسا, كەلەشەگىمىز – كەمەل.
