كەشە قازاقستان رەسپۋبليكاسىنىڭ مەملەكەتتىك حاتشىسى گ.ابدىقالىقوۆانىڭ توراعالىعىمەن قازاقستان حالقى اسسامبلەياسى جىلىن ۇيىمداستىرۋ جانە وتكىزۋ جونىندەگى مەملەكەتتىك كوميسسياسىنىڭ كەڭەيتىلگەن وتىرىسى ءوتتى.
كەڭەس جۇمىسىنا مەملەكەتتىك كوميسسيانىڭ مۇشەلەرى, پارلامەنت دەپۋتاتتارى, مەملەكەتتىك ورگانداردىڭ وكىلدەرى, رەسپۋبليكالىق ەتنومادەني بىرلەستىكتەردىڭ باسشىلارى, قحا عىلىمي-ساراپتامالىق كەڭەسىنىڭ مۇشەلەرى, بۇقارالىق اقپارات قۇرالدارىنىڭ وكىلدەرى قاتىستى.
وتىرىستا قازاقستان رەسپۋبليكاسى پرەمەر-ءمينيسترىنىڭ ورىنباسارى, كوميسسيا توراعاسىنىڭ ورىنباسارى ب.ساپارباەۆ, قازاقستان رەسپۋبليكاسى كونستيتۋتسيالىق كەڭەسىنىڭ توراعاسى, كوميسسيا توراعاسىنىڭ ورىنباسارى ي.روگوۆ, قازاقستان حالقى اسسامبلەياسى توراعاسىنىڭ ورىنباسارى, قازاقستان حالقى اسسامبلەياسى حاتشىلىعىنىڭ مەڭگەرۋشىسى, كوميسسيا توراعاسىنىڭ ورىنباسارى ە.توعجانوۆ, مادەنيەت جانە سپورت ءمينيسترى ا.مۇحامەديۇلى, قر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ باسشىسى ە.باباقۇماروۆ بايانداما جاسادى.
وتىرىس بارىسىندا 2015 جىلعا ارنالعان مەرەيتويلىق ءىس-شارالاردى جۇزەگە اسىرۋ, قازاقستان حالقى اسسامبلەياسى جىلىن ۇيىمداستىرۋ جانە وتكىزۋ جونىندەگى ۇلتتىق ءىس-شارالار جوسپارىن ىسكە اسىرۋ, قازاقستان رەسپۋبليكاسى كونستيتۋتسياسىنىڭ 20 جىلدىعىنا ارنالعان ءىس-شارالاردى ۇيىمداستىرۋ بويىنشا دايىندىق بارىسى تۋرالى ماسەلەلەر قارالدى.
مەملەكەتتىك كوميسسيانىڭ مۇشەلەرى ۇيىمداستىرۋشىلىق-ادىستەمەلىك بىرىزدىلىكتى قامتاماسىز ەتۋگە جانە بارلىق ءىس-شارالاردى ۇيلەستىرۋگە باعىتتالعان قازاقستان حالقى اسسامبلەياسى جىلىن وتكىزۋ تۇجىرىمداماسىن بەكىتتى.
مەملەكەتتىك كوميسسيا قازاقستان حالقى اسسامبلەياسى جىلىنىڭ ەمبلەماسىنىڭ (لوگوتيپ) جانە قازاقستان حالقى اسسامبلەياسىنىڭ 20 جىلدىعىنا ارنالعان مەرەيتويلىق مەدال ەسكيزدەرىنىڭ ۇلگىلەرىن بەكىتتى.
سونىمەن قاتار, قر كونستيتۋتسياسىنىڭ 20 جىلدىعىن, قازاق حاندىعى قۇرىلعانىنىڭ 550 جىلدىعىن, جەڭىستىڭ 70 جىلدىعىن قوسا العاندا, 2015 جىلعا ارنالعان مەرەيتويلىق ءىس-شارالاردىڭ جوسپارلارىن ىسكە اسىرۋ بويىنشا مەملەكەتتىك ورگانداردىڭ جۇمىسىن ۇيلەستىرۋ جانە ءوزارا ءىس-قيمىلدارىن ۇيىمداستىرۋ ماسەلەلەرى تالقىلاندى.
وتىرىستىڭ قورىتىندىسى بويىنشا مەملەكەتتىك حاتشى جۇمىستى ۇيىمداستىرۋ بويىنشا بىرقاتار ناقتى تاپسىرمالار بەردى.
