استانا اكىمىنىڭ العىسىن الدى
ەلوردادا قازاقستان حالقىنىڭ XVIII تىلدەر فەستيۆالىنىڭ اياسىندا ەل تاۋەلسىزدىگىنىڭ 25 جىلدىعىنا ارنالعان مەرەكەلىك شارا ءوتتى.
قر پارلامەنتى ءماجىلىسىنىڭ دەپۋتاتتارى, زيالى قاۋىم وكىلدەرى, ءتىل جاناشىرلارى جينالعان شارادا مەملەكەتتىك ءتىلدىڭ ناسيحاتى مەن دامۋىنا, ونىڭ قولدانىس اياسىنىڭ كەڭەيۋىنە ولشەۋسىز ۇلەس قوسقان بىرقاتار ادامعا استانا قالاسى اكىمىنىڭ العىس حاتى تابىستالدى.
استانا قالاسى تىلدەردى دامىتۋ باسقارماسى ۇيىمداستىرعان كەشتە ءسوز العان اتالمىش باسقارمانىڭ باسشىسى تىلەۋعالي قىشقاشباەۆ تىلدەر فەستيۆالىنىڭ شەڭبەرىندە وتكەن, الدا وتەتىن شارالارعا توقتالدى. ونىڭ ايتۋىنشا, الداعى سەيسەنبى, 27 قىركۇيەك كۇنى جاستار تەاترىندا «وتان وتباسىدان باستالادى» اتتى مەرەكەلىك كەش ءوتىپ, وندا وسى كەشتەگىدەي انا ءتىلىمىزدىڭ مەرەيى وسىرىلەدى. سونداي-اق, قازاق ءتىلىن جاستاردىڭ قارىم-قاتىناس تىلىنە اينالدىرۋ ماقساتىندا 28 قىركۇيەكتە ارنايى اكتسيا ۇيىمداستىرىلادى.
استانا ەلىمىزدىڭ ەلورداسى اتانعالى باس قالادا مەملەكەتتىك ءتىلدىڭ ءورىس الۋىنا جاۋاپتى باسقارماعا بىرنەشە ادام جەتەكشىلىك ەتتى. استانادا قازاق ءتىلىنىڭ كەڭ قانات جايۋىنا ولاردىڭ قوسقان ەڭبەگى از ەمەس. سونداي ادامداردىڭ قاتارىندا حالىق اقىنى قونىسباي ءابىلدىڭ, قوعام قايراتكەرى ورازكۇل اسانعازىنىڭ, ش.شاياحمەتوۆ اتىنداعى تىلدەردى دامىتۋ جانە ۇيلەستىرۋ رەسپۋبليكالىق ورتالىعىنىڭ ديرەكتورى ەربول تىلەشوۆتىڭ ەسىمدەرىن اتاۋعا بولادى. كەشتىڭ سالتاناتتى بولىمىندە استانا قالاسى اكىمىنىڭ العىس حاتى الدىمەن وسى ازاماتتارعا تاپسىرىلدى.
قالا باسشىسىنىڭ العىسىن العانداردىڭ قاتارىنان جازۋشى, مەملەكەتتىك سىيلىقتىڭ لاۋرەاتى, قوعام قايراتكەرى الدان سمايىل, تەلەدراماتۋرگ, پۋبليتسيست-جازۋشى, قر ءتىل كوميتەتىنىڭ العاشقى توراعاسى, قازاقستاننىڭ ەڭبەك سىڭىرگەن قايراتكەرى, كۇنى كەشە عانا حالىقارالىق «الاش» ادەبي سىيلىعىمەن ماراپاتتالعان سۇلتان ورازالى, مەملەكەتتىك ءتىل قوزعالىسىنىڭ توراعاسى, ەكونوميكا عىلىمدارىنىڭ دوكتورى سايلاۋ باتىرشاۇلى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى, الاشتانۋشى عالىم ديحان قامزابەكۇلى تابىلدى.
سونداي-اق, استانا قالاسى تىلدەردى دامىتۋ باسقارماسىنىڭ ارداگەر قىزمەتكەرلەرى سۆەتلانا سۇلەيمەنوۆا, قالامقاس قانتەەۆا, كوپبوسىن بەكماعامبەت جانە وسى باسقارمادا 10 جىلدان بەرى قىزمەت اتقارىپ كەلە جاتقان نۇرزيلا قاسقاتاەۆا, قۇرالاي اقسەيىتوۆا, گاۋھار ەلەمباەۆا, اينۇر نۇرمانوۆا, تالعات ەرماعامبەتوۆ اتالمىش ماراپاتتىڭ يەسى اتاندى.
سالتاناتتى شارا مەرەكەلىك كونتسەرتكە ۇلاستى.
امانعالي قالجانوۆ