بۇگىن, 24 قىركۇيەك, استانا قالاسىندا «TSE CrossFit» دەپ اتالاتىن كروسسفيت زالى پايدالانۋعا بەرىلدى. ەلوردا تۇرعىندارى اراسىندا سلاۋاتتى ءومىر سالتىن قالىپتاستىرۋ جانە جۇرەك قان تامىرلارى اۋرۋلارىنىڭ الدىن الۋدى كوزدەيتىن جاڭا ۇلگىدەگى جاتتىقتىرۋ زالى استانا قالاسى اكىمدىگىنىڭ قولداۋىمەن اشىلىپ وتىر.
– كروسسفيت – وتە قىزىقتى ءارى ادامنىڭ دەنساۋلىعى مەن دەنە دايارلىعىن جان-جاقتى دامىتۋعا باعىتتالعان سپورت. ياعني, اۋىر اتلەتيكا, گيمناستيكا جانە جەڭىل اتلەتيكا سەكىلدى ءۇش ءتۇرلى سپورت ءتۇرىنىڭ ءبىر بويىنا جيناقتاعان جاتتىعۋ بولىپ ەسەپتەلەدى. ول جەردە اۋىر شتانگادان باستاپ, جۇگىرۋ, شىعىرشىق, قايىق ەسۋ, ۆەلوسيپەد سەكىلدى سپورتتىڭ بارلىق تۇرلەرى بار. سپورتتىڭ بۇل تۇرىمەن اينالىسقان ادام ءبىر مەزەتتە دەنەنى جاتتىقتىرۋدىڭ سان تۇرلەرىن مەڭگەرىپ شىعادى. ەڭ باستىسى, ادام دەنساۋلىعى ءۇشىن وتە پايدالى. اسىرەسە, جۇرەك قانتامىر اۋرۋلارىنىڭ الدىن الۋعا پايداسى زور, – دەيدى «دوستىق كروسسفيت» ورتالىعىنىڭ نەگىزىن قالاۋشى, ءارى ورتالىقتىڭ سپورت دارىگەرى مەيرام كوشەنوۆ.
شارا بارىسىندا بەلگىلى بوديبيلدەر ءامىر داۋلەتوۆ, سپورت دارىگەرى مەيرام كوشەنوۆ سەكىلدى ماماندار «دۇرىس جانە سالاۋاتتى تاماقتانۋ جولدارى», «دەنساۋلىق ساقتاۋ جولدارى جانە قاۋپسىز كروسسفيت» تاقىرىبىندا ارنايى سەمينارلار وتكىزدى. تۇستەن كەيىن استانالىق اۋەسقوي كروسسفيتشىلەرى اراسىندا «TSE Open Cup – 2016» اتتى جارىس ۇيىمداستىرىلدى.
بۇركىت نۇراسىل
