«استانا ەكسپو-2017» ۇك-نىڭ ۇيىمداستىرۋىمەن «ۇلتتىق اعاش ءوسىرۋ كۇنى» اكتسياسى ءوتتى. ءىس-شاراعا قاتىسۋشىلار جاڭادان اشىلعان «ەكسپو-2017» ساياجولىنا 1630 ءتۇپ كوشەت وتىرعىزدى. قوعام قايراتكەرلەرى مەن استانالىق مەكتەپ وقۋشىلارى وتىرعىزعان بۇل كوشەتتەر كۇنى ەرتەڭ تامىر جايىپ, قالا كوركىن اجارلاندىرا تۇسەرى كۇمانسىز.
يگىلىكتى ءىس-شارانى اشقان «استانا ەكسپو-2017» ۇك-نىڭ باسقارما توراعاسى تالعات ەرمەگياەۆ قۇتتىقتاۋ سوزىندە قاتىسۋشىلارعا ءساتتىلىك تىلەپ, ەرتەڭ-اق قازاقستاننىڭ ءاربىر قالاسىندا ءوز ەكسپو ساياجايى بولادى دەگەن سەنىمىن ءبىلدىردى:
– ءبىز سىزدەردىڭ ەڭبەكتەرىڭىزدى ەرەكشە باعالايمىز. الدىمىزداعى «ەكسپو-2017» كورمەسىنىڭ «بولاشاق ەنەرگياسى» تاقىرىبىن قولداۋ ارقىلى, ءبارىمىز ءبىر الاڭعا جينالىپ, مىنە, بۇگىن «ەكسپو ساياجولىن» اشۋعا قول جەتكىزىپ وتىرمىز. سول ءۇشىن سىزدەرگە العىس ايتقىم كەلەدى! استانا قالاسىندا «ەكسپو ساياجولىنىڭ» اشىلۋى بۇكىل ەلىمىزدە وسىنداي ساياجولداردىڭ پايدا بولۋىنا جول اشارى كۇمانسىز. ەرتەڭ بۇل جاسىل ەلىمىزدە وتكەن «ەكسپو – 2017» كورمەسىنىڭ بەلگىسى بوپ قالادى, – دەدى توراعا.
ءىس-شاراعا, سونداي-اق, قر سىرتقى ىستەر ءمينيسترىنىڭ ءبىرىنشى ورىنباسارى, «ەكسپو – 2017» كورمەسىنىڭ كوميسسارى راپيل جوشىباەۆ, بۇۇ-نىڭ قازاقستانداعى تۇراقتى ۇيلەستىرۋشىسى ستيۆەن تۋللا جانە «نازارباەۆ زياتكەرلىك مەكتەبى» اوۇ-نىڭ باسقارما ءتورايىمى كۇلاش ءشامشيدينوۆالار دا قاتىسىپ, ءوز تىلەكتەرىن ءبىلدىردى.
ەلشىلەر, ءماجىلىس دەپۋتاتتارى, كاسىپكەرلەر, قوعامدىق ۇيىم وكىلدەرى, قالا جاستارى مەن «نازارباەۆ
زياتكەرلىك مەكتەبى» وقۋشىلارى ءوز قولىمەن وتىرعىزعان ساياجول بويىنداعى التى قاتار جاس جەلەك مۋزىكا ۇنىنە قوسىلىپ, سامال جەلمەن جايقالا تەربەلەدى…
