كەشە استاناداعى «كورمە» ورتالىعىندا تاۋەلسىزدىكتىڭ 25 جىلدىعىنا ارنالعان «Eurasian Book Fair-2016» اتتى ەۋرازيا حالىقارالىق كىتاپ كورمەسى سالتاناتتى جاعدايدا اشىلدى. وعان مەملەكەتتىك حاتشى گۇلشارا ابدىقالىقوۆا قاتىستى.
– بيىل ەلىمىز ءۇشىن تاريحي بەلەس – تاۋەلسىزدىكتىڭ 25 جىلدىق مەرەيتويى. بۇل كەزەڭ قازاقستان تاريحى ءۇشىن داۋىرلىك وقيعالارمەن ولشەنەتىن بەيبىتشىلىك پەن كەلىسىمنىڭ شەجىرەسىنە اينالدى. ەل تاۋەلسىزدىگىنىڭ شيرەك عاسىرلىق بەلەسى اسا جاۋاپتى تاريحي مىندەتتى ورىنداۋ كەزەڭىمەن تۇسپا-تۇس كەلىپ وتىر. بيىلعى جىلى ەلباسى نۇرسۇلتان نازارباەۆ ۇسىنعان بەس ينستيتۋتسيونالدى رەفورمانى جۇزەگە اسىرۋدىڭ پراكتيكالىق كەزەڭى باستالدى. ونىڭ تۇپكىلىكتى ارمان-مۇراتى ورتاق, ياعني بولاشاعى ءبىرتۇتاس ۇلت قۇرۋ ەكەنىن اتاپ ءوتۋىمىز كەرەك. مەملەكەت باسشىسىنىڭ سىندارلى ساياساتىنىڭ ارقاسىندا قازاقستان الەم ەلدەرىمەن ەكونوميكالىق قانا ەمەس, مازمۇنى تەرەڭ تاريحي, مادەني بايلانىس ورناتتى. وسىنىڭ دالەلى – بۇگىنگى وتكىزىلىپ وتىرعان ءى ەۋرازيا حالىقارالىق كىتاپ كورمە-جارمەڭكەسى, – دەدى مەملەكەتتىك حاتشى.
ودان كەيىن بەلارۋس رەسپۋبليكاسى اقپارات ءمينيسترىنىڭ ءبىرىنشى ورىنباسارى يگور لۋتسكي مەن رەسەيدەگى «گيلديا كنيجنيكوۆ» كوممەرتسيالىق ەمەس سەرىكتەستىگىنىڭ پرەزيدەنتى بوريس ەسەنكين كىتاپ كورمەسى تۋرالى سالماقتى ءسوز قوزعادى.
الەمنىڭ كوپتەگەن ەلدەرىنىڭ وكىلدەرى باس قوسقان جيىندا كورمەگە قاتىسىپ وتىرعان مەملەكەتتەردىڭ كىتاپ شىعارۋ جانە پوليگرافيا سالاسىنداعى جەتەكشى باسپا ۇيلەرىنىڭ ونىمدەرى مەن جاڭا تەحنولوگيالارى ۇسىنىلدى. راسىن ايتۋ كەرەك, بۇگىندە كىتاپتى بەزەندىرۋ مادەنيەتى جاقسى دامىعان. بىراق جاستاردىڭ كىتاپ وقۋعا دەگەن ىنتاسى ءسال-ءپال بولسا دا ازايعان. شارانىڭ باستى ماقساتى دا جاستاردىڭ كىتاپقا دەگەن ىنتاسىن وياتىپ, قۇرمەتىن ارتتىرۋدى كوزدەگەن.
كورمەنىڭ العاشقى كۇنىندە رەسەي مەن بەلارۋس ەلىنەن كەلگەن باسپاگەرلەر اكەلگەن جاڭا كىتاپتاردىڭ تۇساۋى كەسىلدى. سونىمەن بىرگە, ەلورداداعى ۇلتتىق مۋزەي دە تاريحىمىزعا ارنالعان تانىمدىق كىتاپتاردىڭ كورمەسىن وتكىزدى. شارانىڭ باستى ۇيىمداستىرۋشىسى سانالعان «فوليانت» باسپاسى تالانتتى جازۋشى راحىمجان وتارباەۆتىڭ «شىڭعىس حاننىڭ كوز جاسى» مەن «ءبىزدىڭ اۋىلدىڭ امازونكالارى» اتتى كىتاپتاردىڭ تۇساۋكەسەرىن جاسادى.
ءبىز كىتاپ كورمەسى اياسىندا باسپا سالاسىنىڭ بىلىكتى مامانى, بەلگىلى جازۋشى الىبەك اسقاروۆتىڭ پىكىرىن تىڭداعان ەدىك.
– جالپى, حالىقارالىق كىتاپ كورمەسىن وتكىزۋ – كىتاپ وقيتىن, كىتاپقا قۇرمەتى بار مەملەكەتتىڭ يگىلىكتى ءىسى دەپ ايتۋعا بولادى. جىل سايىن ماسكەۋدە وتەتىن حالىقارالىق كىتاپ كورمەسىنە قاتىسىپ ءجۇرمىز. باسپاگەرلەر بۇگىندە كىتاپ ءوندىرىسى قانداي دەڭگەيدە دامىپ بارا جاتقاندىعىن ءبىلىپ وتىرعان ءجون. سوعان وسىنداي جيىننىڭ ىقپالى كوپ. الدىمەن كىتاپ وقىرمانعا جەتۋ كەرەك. ونىڭ مازمۇنى مەن كەلبەتى دە ءبىر بولۋ قاجەت. الداعى جىلى «ەكسپو-2017» حالىقارالىق كورمەسىنە وراي ۇلكەن كىتاپ جارمەڭكەسى وتكىزىلەدى. بۇگىنگى شارا سونىڭ الدىنداعى تاجىريبە سەكىلدى. باستىسى, جاستار كىتاپ وقىسا ەكەن, – دەيدى قالامگەر.
كىتاپ جارمەڭكەسى 12 قاراشاعا دەيىن جالعاسادى.
ازامات ەسەنجول
