ەلوردادا ۆانداليزم اكتىلەرىمەن جانە قوعامدىق ءتارتىپتى بۇزۋشىلارمەن كۇرەس ءجۇرىپ جاتىر. كەزەكتى ۆاندالدار تابىلىپ, جاۋاپكەرشىلىككە تارتىلدى, دەپ حابارلايدى astana-akshamy.kz.
ناۋرىز ايىنىڭ باسىندا تۇنگى ۋاقىتتا نۇرماعانبەتوۆ كوشەسى, 27/1 مەكەنجايىندا 35 جاستاعى ەر ادام كىرەبەرىستىڭ پلاستيكالىق ەسىگىن سىندىرىپ, بوتەننىڭ مۇلكىنە قاساقانا زاقىم كەلتىردى.
پوليتسيا قۇقىق بۇزۋشىنىڭ جەكە باسىن انىقتادى. ول قر اقبتك 147-1-بابى 1-بولىگى بويىنشا اكىمشىلىك جاۋاپكەرشىلىككە تارتىلدى. سوت وعان 20 اەك (73 840 تەڭگە) ايىپپۇل سالدى.
وسىعان ۇقساس وقيعا تاڭعى ساعات تورتتە شالكودە كوشەسىندە بولدى: 35 جاستاعى ەر ادام يندۋستريالدى تۇرعىن الابىنداعى جىلى ايالدامانىڭ ىشىندە دۇكەننىڭ الدىڭعى ەسىگىنىڭ تەرەزەسىن سىندىرعان.
اكىمشىلىك قۇقىق بۇزۋشىلىق جاساعانى ءۇشىن وعان 73 840 تەڭگە كولەمىندە ايىپپۇل سالىندى.
«استانادا ەرىكتىلەر, بەلسەندىلەر, بەلگىلى سپورتشىلار, ۇەۇ وكىلدەرى, قالا تۇرعىندارىنىڭ قولداۋىمەن «توقتا, ۆاندال» اكتسياسى جالعاسۋدا. اكتسيا اياسىندا قالادا كۇندىزگى جانە تۇنگى رەيدتەر وتكىزىلىپ, تۇرعىندار اراسىندا قوعامدىق ءتارتىپتى ساقتاۋ جانە قالا مۇلكىنە ۇقىپتى قاراۋ قاجەتتىلىگى تۋرالى ءتۇسىندىرۋ جۇرگىزىلۋدە», – دەپ حابارلادى ەلوردا اكىمدىگى.
اكتسيانىڭ ماقساتى – ءۆانداليزمنىڭ كەز كەلگەن جاعدايىن بولدىرماۋ جانە ەلوردادا تازالىق پەن ءتارتىپتى ساقتاۋ.
2024 جىلدىڭ باسىنان بەرى ەلوردادا ءۆانداليزمنىڭ 66 فاكتىسى انىقتالدى. قۇقىقبۇزۋشىلاردىڭ ءبارى جاۋاپقا تارتىلدى.
ءۆانداليزمنىڭ الدىن الۋ جۇمىستارى قالالىق پروكۋراتۋرا مەن پوليتسيا دەپارتامەنتىنىڭ ۇيلەستىرۋىمەن جۇرگىزىلەدى.
