بۇگىن قازاقستان رەسپۋبليكاسىنىڭ عىلىم جانە جوعارى ءبىلىم مينيسترلىگى ءتىل ساياساتى كوميتەتى ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ ۇيىمداستىرۋىمەن قازاق تىلىندەگى بىرەگەي جوبا – كورۋ قابىلەتى ناشار ادامدارعا ارنالعان ەكراندى دىبىستاپ وقىپ بەرەتىن يننوۆاتسيالىق قۇرالدىڭ تانىستىرىلىمى ءوتتى, دەپ حابارلايدى astana-akshamy.kz.
ءتىل ساياساتى كوميتەتىنىڭ توراعاسى, بەلگىلى عالىم ەربول تىلەشەۆ مەملەكەتتىك «ەستيتىن ۇكىمەت» قاعيداسى مۇلتىكسىز ورىندالعانىن, ونىڭ ءبىر دالەلى – وسى كەلەلى ءىس ەكەنىن اتاپ ءوتتى. اقپاراتتى دىبىستاپ جەتكىزەتىن قۇرالدىڭ كومەگىمەن قازاق ءتىلىنىڭ باسەكەگە قابىلەتتىلىگى ارتا تۇسەدى. كوكتەمنىڭ العاشقى ايىمەن جەتكەن جاعىمدى جاڭالىقتىڭ ارقاسىندا ەكراندىق وقۋ جۇيەسى ارقىلى باعدارلامانى قولدانۋشىلار بۇدان بىلاي انا تىلىندەگى اقپاراتپەن ەركىن سۋسىنداي الادى.
كوزى ناشار كورەتىن ادامدارعا ارنالعان بۇل جاڭا جوبا «ءتىل-قازىنا» ۇلتتىق عىلىمي-پراكتيكالىق ورتالىعىنىڭ بازاسىندا دايىندالعان. ورتالىقتىڭ باس ديرەكتور م.جۇمابايدىڭ ايتۋىنشا, Android سمارتفوندارعا ارنالعان نۇسقا جاريالاندى. IOS ءۇشىن ارنايى قوسىمشانى ءىT ماماندار ساراپتامادان وتكىزۋ ۇستىندە, جاقىن ارادا قولدانىسقا بەرىلەدى.
تانىستىرىلىم بارىسىندا قازاقستان رەسپۋبليكاسى پارلامەنتى ءماجىلىسىنىڭ دەپۋتاتى كەنجەعۇل سەيىتجان بۇل كوپتەن كۇتكەن ارمان كۇن ەكەنىن تەبىرەنە باياندادى: «وسى كۇننىڭ كۋاسى بولىپ وتىرعانىما قۋانىشتىمىن. قانشا جىل قازاق تىلىندەگى ەكران ديكتورى جوق ەكەنىن قىنجىلىپ جۇرەتىنبىز. شەت ەلدە ءبىلىم العان ازامات رەتىندە اعىلشىن, جاپون تىلىندەگى وسىنداي قۇرالدىڭ كومەگىنە جۇگىنىپ, ديپلوم جۇمىسىن دا جازعانمىن. ال انا تىلىمىزدە جوق بولعانى مۇمكىندىكتى شەكتەيتىن. مۇنداي قۇرال كەرەك دەپ دەپۋتاتتىق ساۋال دا جىبەرگەنبىز. بۇگىن شىنىندا دا قاتتى قۋانىپ وتىرمىز», -دەدى ول.
ينكليۋزيۆتى ءبىلىم بەرۋ مامانى, نازارباەۆ ۋنيۆەرسيتەتىنىڭ ءاسسيستيۆتى تەحنولوگيالار جانە اقپاراتتىڭ قولجەتىمدىلىگى جونىندەگى ساراپشى-مەنەدجەرى, جوبانى تەستىلەۋشى زيات ابدىقايىموۆ پەن زاڭگەر, كورۋ قابىلەتى ناشار ساراپشى مامان, جوبانى تەستىلەۋشى مۇساعالي داۋىلوۆ ەلىمىزدەگى مۇنداي تۇڭعىش قۇرىلعىنىڭ مازمۇنى مەن ماڭىزىنا ايرىقشا توقتالدى.
الەمدىك ستاندارتتار نەگىزىندە جاسالعان قازاق تىلىندەگى ەكران ديكتورىنىڭ كومەگىمەن (سىلتەمەسى: https://screenreader.tilqazyna.kz/) پايدالانۋشىلار بۇدان بىلاي ۆەب-بەتتەرمەن, ەلەكتروندىق حات جانە قۇجاتپەن دەمدە تانىسىپ, اقپارات اعىنىمەن قازاق تىلىندە تانىسىپ, تسيفرلىق تەحنولوگيانىڭ يگىلىگىن ءوز قاجەتىنە جاراتا الادى.
