استانا قالاسىنىڭ كوممۋنيكاتسيالار قىزمەتىندە استانادا باعانى تۇراقتاندىرۋ ءۇشىن قابىلداناتىن شارالار تۋرالى استانا قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى جاڭاباەۆ ماقسات قايراتۇلى مەن استانا قالاسى بويىنشا ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتى باسشىسىنىڭ ورىنباسارى يلياسوۆ عالىمجان مولدابايۇلىنىڭ قاتىسۋىمەن بريفينگ ءوتتى, دەپ حابارلايدى astana-akshamy.kz.
الەۋمەتتىك ماڭىزى بار ازىق-تۇلىك تاۋارلارىنا ء(امات) باعانىڭ ءوسۋىن تەجەۋ, تۇراقتاندىرۋ جانە رەتتەۋ قۇرالدارىنىڭ ءبىرى – باعا بەلگىلەۋدىڭ بارلىق تىزبەگى بويىنشا دەلدالدىق سحەمالاردى انىقتاۋ بولىپ تابىلادى. «ساۋدا قىزمەتىن رەتتەۋ تۋرالى» قر زاڭىنىڭ 9-بابىنا سايكەس ىشكى ساۋدا سۋبەكتىلەرى ءامات باعاسىن قوسپاعاندا تاۋارلاردىڭ باعاسىن دەربەس انىقتايدى. 2023 جىلعى 15 ناۋرىزدان باستاپ «قر اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» قر زاڭى قابىلدانىپ, وعان سايكەس ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتتەرىنە ساۋدا سالاسىنداعى اكىمشىلىك قۇقىق بۇزۋشىلىق تۋرالى ىستەر بويىنشا ءىس جۇرگىزۋدى جۇزەگە اسىرۋعا ۋاكىلەتتىلىك بەرىلدى. ونىڭ ىشىندە 204-4-باپ بويىنشا ىشكى ساۋدا سۋبەكتىسىنىڭ «ساۋدا قىزمەتىن رەتتەۋ تۋرالى» قرز بەلگىلەگەن ءامات-قا ساۋدا ۇستەمەسىنىڭ 15% مولشەرىن ارتتىرعانى ءۇشىن. بۇل باپ بويىنشا «ساۋدا قىزمەتىن رەتتەۋ تۋرالى» قر زاڭىنىڭ 9-بابىن بۇزۋشىلىق انىقتالعان جاعدايدا اكىمشىلىك ءىس قوزعالادى جانە ىشكى ساۋدا سۋبەكتىسى «ەسكەرتۋ» تۇرىندە اكىمشىلىك جاۋاپكەرشىلىككە تارتىلادى. اكىمشىلىك جازا قولدانىلعاننان كەيىن ءبىر جىل ىشىندە قايتالاپ جاساعانى ءۇشىن كىشى كاسىپكەرلىك سۋبەكتىلەرىنە – 10, ورتا كس – 75, ءىرى كس – 300 اەك مولشەرىندە ايىپپۇل سالىنادى.
ساۋدا كوميتەتى مەن استانا قالاسى بويىنشا ەكونوميكالىق تەرگەۋ دەپارتامەنتىنەن كەلىپ تۇسكەن مالىمەتتەر بويىنشا وسى جىلدىڭ 1-توقسانىندا 32 كاسىپكەر «ساۋدا قىزمەتىن رەتتەۋ تۋرالى» قر زاڭناماسىن بۇزعانى ءۇشىن اقبتك-ءنىڭ 204-4-بابى بويىنشا اكىمشىلىك جاۋاپكەرشىلىككە تارتىلعان. 1 218 000 تەڭگە سوماسىنا 8 ايىپپۇل سالىنعان. بۇگىنگى تاڭدا ءامات باعاسىنىڭ ءوسۋىن تەجەۋ ءۇشىن بيۋدجەتتەن 13 ملرد. تەڭگە بولىنگەن. ءامات-نىڭ بارلىق 19 ءتۇرى بويىنشا 25 مىڭ توننا ونىمگە كەلىسىمشارت جاسالعان. باعانىڭ كوتەرىلۋ قاۋپى جوعارى بولعاندىقتان نەگىزگى ۇلەستى كوكونىس ونىمدەرى الىپ وتىر. قولدانىستاعى شارتتار بويىنشا وتكەن جىلعى 9 مىڭ توننا كوكونىس قورى بار. مامىر-شىلدە ايلارىنا كوكونىستەردى ەرتە جەتكىزۋ بويىنشا شامامەن 1 350 توننا كولەمىندە قوسىمشا كەلىسىمشارتقا قول قويۋ جوسپارلانۋدا. بۇدان باسقا اعىمداعى جىلدىڭ كۇزگى ناۋقانىنا فورۆاردتىق كەلىسىمشارتقا وتىرۋ ءۇشىن الدىن الا شارالار قابىلدانۋدا. بۇل كەلەسى جىلدىڭ ماۋسىمارالىق باعاسىن تەجەۋگە مۇمكىندىك بەرەدى.
