جىل سايىن كوكتەمدە قار سۋى ەرىپ, ماڭايداعى كولدەر مەن كولشىكتەر سۋعا تولعان سايىن استانانى تاسقىن سۋ باسىپ كەتۋ قاۋپى تۋادى. ونداي قاتەر بيىل دا جوق ەمەس. ونىڭ ۇستىنە بۇل قىستا ەلوردادا قار كوپ جاۋدى.
دەگەنمەن, استانا قالاسىنىڭ كوممۋنالدىق قىزمەتتەرى قازىر ونىڭ الدىن الۋ ماقساتىندا پارمەندى جۇمىستار جۇرگىزۋدە. ولار سۋدىڭ استىندا قالۋى قاۋپى كوبىرەك اۋدانداردا مونيتورينگ جۇرگىزىپ, سۋ كارىزدەرىن تازارتۋدى قولعا الدى. اسىرەسە, سۋ قويمالارىنا جاقىن جەرلەرگە ورنالاسقان نىساندار كوممۋنالدىق قىزمەتتىڭ ەرەكشە باقىلاۋىنا الىنعان. جالپى, ەلوردادا سۋ استىندا قالۋى مۇمكىن 27 ۋچاسكە بار.
بۇگىندە كەشەندى جوسپاردى ءتيىمدى تۇردە جۇزەگە اسىرۋ ماقساتىندا ارنايى قۇرىلعان توپ نوسەر سۋ كاناليزاتسياسى كوللەكتورلارىنىڭ باۋلىقتارىن, قابىلداعىشتارى مەن تورلارىن, سۋ وتكىزۋ ارنالارىن, قۇبىرلاردى, ارىقتاردى تازارتۋ جۇمىستارىن قاداعالاپ وتىر. ماسەلەن, الماتى اۋدانىندا قىسقى كەزەڭدە قاردىڭ 1,2 ملن تەكشە مەترى شىعارىلدى. اتالمىش جۇمىستارعا ارنايى 190 تەحنيكا بىرلىگى تارتىلعان. سونداي-اق, كوكتەمگى كەزەڭدە ەرىگەن سۋدى ەش قيىندىقسىز وتكىزۋ ماقساتىندا ارىق-ناۋا جەلىلەرىنىڭ 11,9 شاقىرىمى قار مەن مۇزدان تازارتىلعان.
قالا تۇرعىندارىنان 209 مارتە سۋ سورىپ الۋ تۋرالى ءوتىنىش تۇسكەن. ولاردىڭ ءبارى دەر كەزىندە قاناعاتتاندىرىلدى. مۇنداي تازارتۋ جۇمىستارى قازىر بارلىق اۋدانداردا ءجۇرىپ جاتىر.
استانا اكىمىنىڭ ورىنباسارى قوسمان ايتمۇحامەتوۆ قالانىڭ شەتكى ايماقتارىندا بولىپ, سۋ استىندا قالۋى مۇمكىن اۋداندارداعى جاعدايدى ءبىلدى. ونىڭ ايتۋىنا قاراعاندا, قالاداعى پروبلەمالى اۋدانداردىڭ سانى كوپ ەمەس. الايدا تۇرعىنداردىڭ وزىنە تيەسىلى اۋماقتان قاردى دەر كەزىندە شىعارماۋى سالدارىنان كوشەلەر مەن اۋلالاردا سۋ جينالىپ قالعان. مىسالى, كيرپيچنىي اۋدانىن, كوكسەڭگىر, ارقالى, قامىستى كوشەلەرىن سۋ ءبىرشاما باسقان.
جالپى العاندا, قالاداعى سۋ باسۋ قاۋپىنە قاتىستى جاعداي بىرقالىپتى. جۇرگىزىلىپ جاتقان شارالاردىڭ بارلىعى توتەنشە جاعدايدىڭ, قالا اۋماعىنداعى جەكە اۋدانداردىڭ سۋ استىندا قالۋىنىڭ الدىن الۋعا سەپتىگىن تيگىزىپ, كوكتەمگى كەزەڭدەگى ەرىگەن, تاسقىن سۋدى قاۋىپسىز تۇردە وتكىزۋ جۇمىستارىن ۇيىمداستىرۋدى قامتاماسىز ەتەدى.
