اۋدان ارداگەرلەرى ارداقتالدى
تاۋەلسىزدىك مەرەكەسى قارساڭىنا الماتى اۋدانى اكىمدىگىنىڭ ءماجىلىس زالىندا اۋداندىق ارداگەرلەر كەڭەسىنىڭ قۇرىلعانىنا 10 جىل تولۋىنا وراي سالتاناتتى شارا ءوتتى.
الدىمەن ءسوز العان اۋداندىق ارداگەرلەر كەڭەسىنىڭ توراعاسى سايلاۋبەك بايبولوۆ جينالعانداردى مەرەيتويمەن قۇتتىقتاپ, ارداگەرلەر كەڭەسىنىڭ تاريحىنا توقتالدى. ونىڭ ايتۋىنشا, وسى ون جىل ىشىندە اۋدان زەينەتكەرلەرىنىڭ سانى ءۇش ەسە ءوسىپ, بۇگىنگى تاڭدا جيىرما بەس مىڭعا جەتىپ وتىر. اۋداننىڭ ارداگەرلەر ءبىرلەستىگى العاشىندا «اقساقالدار القاسى» دەپ اتالىپ, ونى بۇگىندە دۇنيەدەن وتكەن, ەڭبەك ارداگەرى سايدالى سۇلەيمەنوۆ باسقارعان. 2004 جىلدىڭ مامىر ايىندا الماتى اۋدانىنىڭ ارداگەرلەر كەڭەسى قۇرىلىپ, العاشقى توراعاسى بولىپ جاسقايرات ەسەنوۆتىڭ, كەيىننەن ومار جاقىپوۆتىڭ سايلانعانىن ايتا كەلە, توراعا سول كەزدە ارداگەرلەر كەڭەسى جۇمىسىنىڭ جاندانۋىنا اۋدان اكىمدىگى كوپ قولداۋ كورسەتكەنىن ەرەكشە اتاپ ءوتتى.
2004 جىلى اۋداندىق كەڭەستىڭ 16 باستاۋىش ۇيىمى بولسا, بۇگىنگى تاڭدا ولاردىڭ سانى 105-كە جەتكەن. ءار باستاۋىش ۇيىمدا 600-دەن اسا زەينەتكەر بار. سوڭعى بەس جىلدىڭ توڭىرەگىندە 60 باستاۋىش ۇيىم قۇرىلدى.
– ەلوردامىزدا زەينەتكەرلەردىڭ جەنىلدىكپەن جول جۇرۋىنە جىل سايىن بيۋدجەتتەن 974 ميلليون تەڭگە جۇمسالادى. اعىمداعى جىلى ەكى جارىم مىڭ زەينەتكەر مەن از قامتىلعان وتباسى 4,5 ميلليون تەڭگە كولەمىندە الەۋمەتتىك كومەك السا, جەر ۇيدە تۇراتىندارعا كومىر الۋعا 622 مىڭ تەڭگە ءبولىندى. استانا كۇنىنە وراي 1300 ادام سىياقىعا يە بولىپ, تومەن زەينەتاقى الاتىن 720 زەينەتكەر مەن تۇرمىسى ناشار 55 وتباسى ازىق-تۇلىك جيناقتارىمەن قامتىلدى, – دەدى س.بايبولوۆ.
ودان كەيىن ءسوز العان رەسپۋبليكالىق ارداگەرلەر ۇيىمى ورتالىق كەڭەسىنىڭ توراعاسى ومىرزاق وزعانباەۆ ماسكەۋدە وتكەن ارداگەرلەر ۇيىمدارىنىڭ كەزدەسۋىندە قازاقستاندىق ارداگەرلەر كەڭەسىنىڭ جۇمىسىنا وڭ باعا بەرىلگەنىن ايتا كەلە, بۇل مەرەيتويدىڭ ەلىمىزدە كەڭ كولەمدە, اۋقىمدى اتالىپ وتەتىن ۇلىق مەرەكەمەن تۇسپا-تۇس كەلۋىن جاقسىلىققا جورىدى. سوناۋ سۇراپىل سوعىس كەزىندەگى ەرلىكتەرىمەن, بەيبىت ومىردەگى, تىڭ يگەرۋ جىلدارىنداعى جان اياماس ەڭبەگىمەن ەرەكشە قۇرمەتكە يە بولىپ ءجۇر. مىنە, ەگدە تارتسا دا ەل يگىلىگى جولىندا ايانباي تەر توگىپ جۇرگەن قاريالارعا باعالى سىيلىقتار تاپسىردى.
گۇلبارشىن وكەشقىزى