اۆتورىنان اينىمايتىن استانا
بۇگىن – ەجەلگى ەسىل جۇرتقا ەلوردا كەلىپ قونعان كۇن.
تاۋەلسىز قازاقستان 1997 جىلدىڭ 10 جەلتوقسانىندا ءوز استاناسىن جەر ۇيىعى جەتىسۋدىڭ ورىنەن سايىن سارىارقانىڭ تورىنە كوشىردى.
بۇل ۇلت تاريحىنداعى ۇمىتىلماستاي تاڭبالانعان دارەجەلى داتالاردىڭ ءبىرى بولۋعا ءتيىس.
الاش بالاسىنىڭ ابىرويىن اسقاقتاتقان استانا اڭىزى قالاي باستالعانىن قايتالاپ ايتۋدىڭ ارتىقتىعى جوق شىعار.
ەندەشە, ەپتەپ ەسكە تۇسىرەيىك.
«قازاق ادەبيەتى» گازەتىندە مەنىڭ قازاق مەملەكەتتىك ۋنيۆەرسيتەتىندە بىرگە وقىعان كۋرستاسىم دوسىمحان قاپاسوۆتىڭ اقمولانى قازاقتىڭ كىندىك قالاسىنا اينالدىرۋ قاجەتتىگى جايىندا ماسەلە كوتەرگەن كولەمدى ماقالاسى جارىق كورگەندە قالىڭ كوپشىلىكتىڭ سىڭار ەزۋلەپ كۇلگەندەي سىڭايدا قابىلداعانى جاسىرىن سىر ەمەس. دەموكراتيا دەمەۋىمەن, جاريالىلىق جەلەۋىمەن جەلىككەندەر نە دەمەي جاتقان كەز ەدى ول. جەلدىڭ قاي جاقتان سوعىپ تۇرعانىن اڭعارماعان اڭقاۋ باسىمىز مۇنى الگى ارىپتەسىمىزدىڭ اياق استىنان امەريكا اشقانداي ورىنسىز وي-ۇسىنىسىنا بالاپ قويا سالعانبىز.
كوپ كەشىكپەي كوڭىلدەگى كۇدىك ومىردەگى شىندىققا اينالا باستادى.
ماسەلەنىڭ ءمانىسىن پارلامەنت تالقىلاعاندا ءبىر-اق بىلدىك. سويتسەك, العاشىندا الۋان پىكىر تۋدىرعان, ارتىنان امالسىز مويىندالعان وسىناۋ وراسان باعالى يدەيانىڭ ناعىز يەسى – ەلباسىمىز نۇرسۇلتان نازارباەۆ ەكەن.
جاڭاعا قاشاندا جاتىرقاي قارايتىن الەۋمەت ءاۋ باستا ءارتۇرلى ءاڭگىمەلەردى گۋلەتتى.
– ەگەمەندىكتىڭ ەلەڭ-الاڭىندا ەكونوميكاسى قۇلدىراعان ەلدە كەم-كەتىگىن بۇتىندەر باسقا شارۋا قۇرىپ قالعانداي…
– ارۋداي سىلانعان الماتىنى جازدا ماساسى, قىستا اقىرعان ايازى بۋاتىن اقمولاعا ايىرباستاپ…
– ايعا شاپقان ارىستانداي… دوسقا كۇلكى, دۇشپانعا تابا بولماساق جارار ەدى…
ال, ەندى رەسەيدىڭ كەيبىر كەراۋىز اقپارات قۇرالدارى اتاسىنىڭ قۇنى كەتكەندەي كەكەتىپ-مۇقاتقان كەزدەردە اۋىل اراسىنداعى ايتىس-تارتىستاردان تارتىنىپ, سىرتتان سىناۋشىلارعا قارسى بىرىگە قالاتىنىمىزدى قايتەرسىڭ.
نامىسىن قايراعان نازارباەۆ العان بەتىنەن قايتپادى. اللا ابىروي بەرىپ, باستاعان ءىسىن باياندى ەتتى. ويداعى ارمانى ورىندالدى. دۇنيە جۇزىنە قازاقتىڭ قايسار حالىق ەكەنىن دالەلدەدى.
استانا اۆتورىنان اۋمايدى.
الار اسۋى بيىك.
ابىروي-داڭقى اسپانداپ تۇر.
بەس قۇرلىققا بەلگىلى بەدەلى بار.
اينالاسىنا تاتۋلىق اۋراسىن تاراتادى.
بەيبىتشىلىكتىڭ ىرگەتاسىن بەكەمدەيدى.
امبيتسياسى الاتاۋداي.
ەن جاھانداعى ەڭ جاس ەلوردا ەكەنىنە قاراماستان اينالاسىنا ارعى-بەرگىنىڭ ءبارىن بىلەتىن اق ساقالدى ابىزدىڭ اقىلىن ايتادى.
ەقىۇ-نىڭ ءسامميتىن, ازيانىڭ قىسقى ويىندارىن, تاعىسىن تاعى
تالاي حالىقارالىق القالى جيىنداردى اتقارىپ تاستادى.
ەندى ەكسپو-نىڭ كورمەسىن وتكىزبەك.
قازاقستاننىڭ ىشكى-سىرتقى ساياساتىنا قاتىستى ساليقالى شەشىمدەردىڭ بارلىعى وسىندا قابىلدانادى.
وركەنيەت ۇردىسىمەن وركەندەگەن ەلىمىزدىڭ وزگە وڭىرلەرىنە ۇلگى-ونەگە كورسەتەدى.
ويتكەنى, ول – وتانىمىزدىڭ باستى ورداسى.
ەلباسى ەرلىگى مەن ورلىگىنىڭ انىقتاما سۇراماس ايعاعى.
استانا – ادەمى, تازا, قاۋىپسىز, اقىلدى, سول سەبەپتى ادامنىڭ تۇرعىسى كەلەتىن قالا.
مەيىربان جاندار مەكەنى.
ەندەشە, ەرتەڭى نۇرلى ەلوردامنىڭ ەڭسەسى ەرتەگى باتىرلارىنداي بيىكتەي بەرسىن!
تالعات باتىرحان