كولىك ينفراقۇرىلىمى – قالا تۇرعىندارىنىڭ مەملەكەتتىك ورگاندارعا جۇگىنىپ ءجيى كوتەرەتىن تاقىرىبى. بەلگىلى ءبىر اۋماقتا جولدىڭ جوقتىعى, بار جولدىڭ جارامسىزدىعى, كۇردەلى جوندەۋدى قاجەت ەتەتىن كوشەلەر, قوعامدىق كولىكتەردىڭ جۇمىسى… بۇلار – ەلوردالىقتاردىڭ قالا اكىمىنىڭ سايتىنا, سونداي-اق ءماسليحات دەپۋتاتتارىنا كۇن قۇرعاتپاي قوياتىن سۇراقتارى. وسىعان وراي ءماسليحات دەپۋتاتتارى اتالعان ماسەلەلەردى ءار توقسان سايىن پىسىقتاپ وتىرۋدى داستۇرگە اينالدىردى.
حالىق قالاۋلىلارى مەملەكەتتىك ورگاندارمەن بىرلەسىپ, قالانىڭ اۆتوجولدار جەلىسىن جانە تۇراقتى ينفراقۇرىلىم وبەكتىلەرىن دامىتۋ ماسەلەلەرى بويىنشا قوعامدىق تىڭداۋ وتكىزدى. جولاۋشىلار كولىگى ءجانە اۆتوموبيلدەر جولدارى باسقارماسىنىڭ باستىعى راشيد امانجولوۆ ەلوردانىڭ كولىك ينفراقۇرىلىمىن دامىتۋ بويىنشا جۇرگىزىلىپ جاتقان جۇمىس تۋرالى ەسەپ بەردى. بايانداماشى ەلوردانىڭ كولىك ستراتەگياسىن ىسكە اسىرۋ ماقساتىندا جاڭا اكىمشىلىك ورتالىقتا كىشى كولىك اينالما جولىنىڭ, جاڭا كوشەلەردىڭ قۇرىلىسى ءجۇرگىزىلەتىندىگىن اتاپ ءوتتى. قالانىڭ وڭ ءبولىگىندەگى كوشەلەردى قايتا جوندەۋگە, سونداي-اق جاڭادان قوسىلعان تۇرعىن الاپتاردى دامىتۋ باعدارلاماسىن ىسكە اسىرۋعا جەتە كوڭىل بولىنەتىنىن ايتتى. بۇدان بولەك, اۆتوتۇراق ماسەلەسىنە كەڭىنەن توقتالدى.
بۇگىندە ەلوردالىق جۇرگىزۋشىلەردىڭ باس اۋرۋى – اۆتوتۇراق ەكەنى جاسىرىن ەمەس. كولىگىن دوعارارعا جەر تاپپاعان جۇرگىزۋشىلەر كەيدە اۋلالار مەن جول شەتىنە قويۋعا ءماجبۇر. باسقارما باستىعى اتالعان ماسەلەنى شەشۋ ءۇشىن ارنايى جوبانىڭ جۇزەگە اسىرىلىپ جاتقاندىعىن ايتتى. ماماندار تاۋلىكتىڭ مەزگىلىنە بايلانىستى اۆتوكولىكتەر جينالىپ قالاتىن پروبلەمالىق ايماقتاردىڭ ءتىزىمىن انىقتادى. زەرتتەۋ كورسەتكەندەي, تۇنگى ۋاقىتتا – 7 ءىرى جانە كۇندىزگى ۋاقىتتا – 24 جەرگىلىكتى ايماق بار. وسىعان وراي اۆتوتۇراق جەتىسپەۋشىلىگى كۇندىزگى ۋاقىتتا -12,7 مىڭ, ال تۇنگى ۋاقىتتا – 48,9 مىڭ ورىندى قۇراپ وتىر. بۇل ماسەلەنى وڭتايلى شەشۋ ماقساتىندا قالانىڭ جاڭا اكىمشىلىك ورتالىعىندا 4950 كولىكتى سىياتىن 10 اۆتوتۇراق سالۋ جوسپارلانۋدا. ەڭ الدىمەن دوستىق كوشەسى بويىنداعى قورعانىس مينيسترلىگى ماڭىندا پاركينگتىڭ قۇرىلىسى باستالادى.
ءوز كەزەگىندە دەپۋتاتتار كوشەلەردەگى كولىك كەپتەلىسى, ءبىلىم بەرۋ مەكەمەلەرىنە ىشكى ورامدىق جانە كىرمە جولداردى ۇيىمداستىرۋ, قالانىڭ شەتكەرى ايماقتارىنا كولىك قاتىناسىن دامىتۋ ماسەلەلەرىن شەشۋدىڭ جولدارىن ۇسىندى. سونداي-اق, ءبىر توپ دەپۋتات جول قۇرىلىسىنىڭ جوبالارىن ءازىرلەۋ كەزىندە الداعى ۋاقىتتاعى پەرسپەكتيۆالاردى ەسكەرە وتىرىپ, بىرقاتار تۇزەتۋلەر ەنگىزۋ قاجەت ەكەندىگىنە نازار اۋداردى.ءويتكەنى, جولداردى سالۋ جانە كوشەلەردى كوگالداندىرۋ قۇرىلىسى جالپى جوسپارمەن ۇيلەسىمدى ءارى كەشەندى تۇردە جۇزەگە اسىرىلۋى ءتيىس. ءارى جەراستى كوممۋنيكاتسيالارى مەن قۇرىلىستارىن ەسكەرگەن ماڭىزدى. دەپۋتاتتار باسقارمانىڭ جۇمىسىنا وڭ باعا بەرىپ, ءسوز سوڭىندا قالانىڭ ەسكى بولىگىندەگى جولداردى جوندەۋ مۇمكىندىگىن تابۋدى تاپسىردى.
