ەلوردادا الەۋمەتتىك ماڭىزى بار ازىق-تۇلىك ونىمدەرىنىڭ باعاسىن تۇراقتاندىرۋ ءۇشىن بىرنەشە باعىت بويىنشا جۇمىستار جۇرگىزىلەدى. بۇل تۋرالى نۇر-سۇلتان قالاسىنىڭ اكىمى التاي كولگىنوۆ مالىمدەدى.
«قاتىسۋشىلاردىڭ سانىن جانە «اينالىم تەتىگى» جوباسى بويىنشا ساۋدا جەلىلەرىنە بولىنەتىن سومانى كوبەيتەمىز, ماۋسىمدىق جارمەڭكەلەر وتكىزەمىز, جەكە ينۆەستيتسيالار ەسەبىنەن ازىق-تۇلىك قاۋىپسىزدىگىن قامتاماسىز ەتۋ ءۇشىن قاجەت بىرقاتار ءىرى جوبا قۇرىلىسىن جۇرگىزەمىز. وسىعان وراي ساۋدا جەلىلەرىنىڭ, بازارلاردىڭ, ءونىم وندىرۋشىلەردىڭ وكىلدەرىمەن كەزدەستىم» دەدى التاي كولگىنوۆ.
«بىرىنشىدەن, «اينالىم تەتىگى» جوباسى اياسىندا ازىق-تۇلىك ساتىپ الۋعا جەلى ساتۋشىلارىنا 2,7 ميلليارد تەڭگە بولىنەدى. جوباعا «Magnum», «انۆار», «استىقجان», «كەڭمارت», «ۆكۋس مارت», «ايان», «اقمول», «شاپاعات», «Small», «سارىارقا» بازارلارى مەن بىرقاتار دۇكەن قاتىسادى. ول ءۇشىن جىل سايىن قارجىلاندىرۋ كولەمى دە ارتادى. ەكىنشىدەن, ەت, كوكونىس, باكالەيا جانە ءسۇت ونىمدەرى بويىنشا بىرقاتار وندىرۋشىلەرمەن, تاۋار جەتكىزۋشىلەرمەن شارتتار جاساستىق. سونداي-اق شامامەن 14 مىڭ توننا كوكونىسكە كەلىسىمشارت جاسالدى. كوكونىستەردى, ۇندى, سيىر ەتىن جانە تاعى باسقا ونىمدەردى قوسىمشا ساتىپ الۋ ماسەلەسىن پىسىقتاپ جاتىرمىز. ۇشىنشىدەن, اۋىل شارۋاشىلىعى جارمەڭكەلەرىن ءجيى وتكىزۋ باعانى ۇستاپ تۇرۋعا, نارىقتاعى باعادان ارزان ساتىلاتىن ءونىمدى ۇسىنۋعا, نارىقتى ونىمدەرمەن قامتاماسىز ەتۋگە كومەكتەسەدى. ەل وڭىرلەرىنىڭ قاتىسۋىمەن جارمەڭكە 22 تامىزدا باستالىپ, قازان ايىنىڭ سوڭىنا دەيىن جالعاسادى. وتكەن جارمەڭكەلەردە 2 مىڭ توننادان استام ءونىم ساتىلدى. تورتىنشىدەن, جەكە ينۆەستيتسيالار ەسەبىنەن ازىق-تۇلىكتى قامتاماسىز ەتۋ ءۇشىن بىرقاتار ءىرى, ماڭىزدى جوبالاردىڭ قۇرىلىسى ءجۇرىپ جاتىر. ولاردىڭ قاتارىندا ءۇش كوتەرمە-تاراتۋ ورتالىعى, ەكى جىلىجاي كەشەنى, نانتوقاش كومبيناتى بار. سونىمەن قاتار ءسۇت وڭدەۋ زاۋىتى, نان-توقاش كومبيناتى, كوكونىس قويماسى سياقتى وندىرىستىك-تاماق كەشەندەرىنىڭ قۇرىلىسىنا قولداۋ كورسەتىلدى» دەپ اتاپ ءوتتى ەلوردا اكىمى.
قورىتا ايتقاندا, بۇل شارالار ازىق-تۇلىك قاۋىپسىزدىگىن جانە نارىقتى جەرگىلىكتى تاۋارمەن قامتاماسىز ەتۋگە, الەۋمەتتىك ماڭىزى بار ونىمدەردىڭ باعاسىن ۇستاپ تۇرۋعا مۇمكىندىك بەرەدى.
