ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ قازاق وركەسترى كومپوزيتورلار ايتقالي جايىموۆ پەن ارمان جايىمنىڭ ەكى اكتىلى «بەيبارىس» وپەراسىنىڭ پرەمەراسىن ۇسىندى. قىپشاق دالاسىندا تۇتقىنعا الىنىپ, جات جەردە ەرەكشە ەرلىگىمەن, اسقان تالانتىمەن قۇلدىقتان قايراتكەرلىككە دەيىن كوتەرىلگەن داڭقتى بەيبارىس سۇلتان تۋرالى جازىلعان دۇنيەلەر, مۋزىكالىق شىعارمالار كوپ. استانادا وتكەن پرەمەرا – سونىڭ بىرەگەيى.
قازاق دالاسىنىڭ ۇلى پەرزەنتى, 1260-1277 جىلدارى مىسىر مەن سيريانى بيلەگەن اتاقتى قولباسشى, كورنەكتى مەملەكەت قايراتكەرى سۇلتان بەيبارىس تۋرالى وپەرانىڭ كونتسەرتتىك پرەمەراسىن ەلوردانىڭ مادەني ومىرىندەگى جارقىن وقيعا دەپ اتاۋعا بولادى. وپەرا جاساۋ يدەياسىن 2003 جىلى كومپوزيتور ايتقالي جايىموۆ ۇسىندى. سول كەزدە كونسەرۆاتوريانى بىتىرگەن ارمان جايىم قاتىسقان العاشقى نۇسقاسى 2007 جىلى شىقتى. ماتەريال
بويىنشا جۇمىس كەيىنگى جىلدارى دا جالعاستى. 2013 جىلى قازاق فيلارمونياسى وركەسترىنىڭ ورىنداۋىنداعى كونتسەرتتىك نۇسقاسى شىقتى. وتكەن جىلى اۆتورلار بۇل تاقىرىپقا قايتا ورالىپ, بۇرىنعى جاساعانىن قايتا وڭدەپ, قازاق وركەسترىنە ارنايى جازىلعان شىعارما ە.راحماديەۆ اتىنداعى مەملەكەتتىك اكادەميالىق فيلارمونيانىڭ ساحناسىندا باس ديريجەر, قازاقستاننىڭ ەڭبەك سىڭىرگەن قايراتكەرى, پروفەسسور ايتقالي جايىموۆتىڭ كوركەمدىك جەتەكشىلىگىمەن كورەرمەن نازارىنا ۇسىنىلدى.
ليبرەتتو اۆتورلارى – كورنەكتى اقىن, مەملەكەتتىك سىيلىقتىڭ لاۋرەاتى ۇلىقبەك ەسداۋلەت پەن قازاقستاننىڭ ەڭبەك سىڭىرگەن قايراتكەرى ايتقالي جايىموۆ.
وپەرانىڭ كونتسەرتتىك نۇسقاسىن شىعارۋعا كامەرالىق حور (كوركەمدىك جەتەكشىسى جانە باس ديريجەرى – قازاقستان رەسپۋبليكاسىنىڭ ەڭبەك سىڭىرگەن قايراتكەرى, پروفەسسور گۇلميرا قۇتتىباداموۆا), «شالقىما» حالىق بي ءانسامبلى (كوركەمدىك جەتەكشىسى – قازاقستاننىڭ ەڭبەك سىڭىرگەن قايراتكەرى ءابدىراسۋل ەسەكەەۆ), ۇلتتىق ۇلان ءان-بي ءانسامبلىنىڭ بي توبى (كوركەمدىك جەتەكشىسى – ەلميرا باققالي) مەن قورعانىس مينيسترلىگى ۇلتتىق اسكەري-پاتريوتتىق ورتالىعىنىڭ بي توبى (كوركەمدىك جەتەكشىسى – كىشى سەرجانت الىشەر مۇحاتاەۆ), كلاسسيكالىق ۆوكال ءبولىمى (كوركەمدىك جەتەكشىسى – مادەنيەت سالاسىنىڭ ۇزدىگى روزا شوتقاليەۆا) قاتىستى.
وپەرا پارتيالارىن فيلارمونيانىڭ كلاسسيكالىق ۆوكال ءبولىمىنىڭ سوليستەرى ورىندادى, بەيبارىستى – التىنبەك ءابىلدا, ليۋدوۆيكتى – نۇرسات الماس, ايدانانى – شاحريزادا تىنىشتىق, قالاۋىندى التىنبەك ارىستانبەك سومداسا, كۇندىك رولىندە تالعات اللابيرينوۆ وينادى.
