«استانا وپەرا» تەاترىنىڭ جەتەكشى ءسوليسى سۇندەت بايعوجين يتاليانىڭ Arena di Verona تەاترىندا تىڭداۋدان ءوتتى. ول گاەتانو دونيتسەتتيدىڭ «ليۋچيا دي لاممەرمۋر» وپەراسىنداعى ەنريكونىڭ پارتياسىنان ۇمىتكەرلەردىڭ ءبىرى بولاتىن. بايعوجيننىڭ الەمدىك وپەرانىڭ ايگىلى انشىلەرى ونەر كورسەتەتىن ءتورى – Arena di Verona بەدەلدى تەاترىندا بىردەن ءۇش پارتيانى ورىنداۋ مۇمكىندىگىنە قول جەتكىزۋى – ۇلكەن جەتىستىك.
وسىلايشا, ءانشى «دون جۋان» وپەراسىندا مازەتتو پارتياسىن, ال 2015 جىلى دج. ءروسسينيدىڭ «سەۆيلسكي تسيريۋلنيك» وپەراسىنداعى فيگارونى جانە گ.دونيتسەتتيدىڭ «ليۋچيا دي لاممەرمۋر» وپەراسىنداعى ەنريكو پارتيالارىن ورىندايتىن بولدى.
«ءوز ەلىمنىڭ اتىن لايىقتى قورعاي العانىما قۋانىشتىمىن. قانشاما وپەرا ءانشىسىنىڭ ارمانى – Arena di Verona تەاترىندا ونەر كورسەتۋ. وسى مۇمكىندىككە يە بولعانىمدى ماقتان تۇتامىن» دەيدى وپەرا ءانشىسى. ول – Arena di Verona تەاترىندا شىرقايتىن تۇڭعىش قازاقستاندىق وپەرا ءانشىسى. بۇل قازاقستاننىڭ مادەني ومىرىندە ەلەۋلى وقيعا ەكەنى ءسوزسىز. مۇنداي تىڭدالىمعا الەمنىڭ تۇكپىر-تۇكپىرىنەن كەلگەن ساحنا ساڭلاقتارى قاتىسادى. سول سەبەپتى باستى پارتيانى ورىنداۋ مۇمكىندىگى ەكىنىڭ بىرىنە بۇيىرا بەرمەيدى.
تاعى ءبىر ايتا كەتەرلىگى, وتكەن جىلدىڭ قاراشا ايىندا سۇندەت بايعوجين يتالياداعى وپەرا انشىلەرىنىڭ حالىقارالىق كونكۋرسىنا قاتىسىپ, ءوز نوميناتسياسى بويىنشا ءبىرىنشى ورىندى يەلەندى. بۇل جەڭىس وعان دج.ءپۋچچينيدىڭ «بوگەما» وپەراسىندا باستى پارتيانى ورىنداۋ قۇقىعىن بەردى.
ەركەجان ساتىمبەك
