قىتايدان جاقىن-جۇراعاتتار كەلىپ جاتىر. ءبىرىنىڭ سوڭىنان ءبىرى ەرىپ, تىمپىڭداپ جۇرگەن بالالارىمىزعا قاراپ, ءسۇيسىندى. قازاقستانداعى ايەلدەر قاۋىمىنىڭ ۇرپاق ءوربىتىپ, بالا سۇيۋگە دەگەن قۇلشىنىسىنا تاڭداندى.
وزدەرىندە, ارينە, بالا تۋعا شەك قويىلعان.
بىرنەشە جىلدار بويى «ءبىر وتباسى – ءبىر بالا» ساياساتىن ۇستانعان قىتاي بۇگىندە تۇساۋدى ەپتەپ كەڭگە ساپ, ەكى بالا سۇيۋگە رۇقسات ەتە باستاعان. ويتپەسكە امالى قالماعان سياقتى. قىتايدا ايەلدەر ازايىپ كەتكەن. تىزگىن ۇستار ۇل سۇيگىسى كەلگەندەر قۇرساققا بىتكەن نارەستە قىز بالا بولسا, ەرتەرەك جولىن كەسىپ وتىرىپتى. بۇل ەل تۇرعىندارى اراسىندا ەر ادامدار سانىنىڭ كۇرت ءوسىپ, ايەلدەردىڭ ازايۋىنا اكەلىپ سوقتى. تەپە-تەڭدىك بۇزىلدى.
شەك قويعانداعى تاعى ءبىر ماسەلە – حالىق قارتايىپ شىعا كەلىپتى. ياعني, بالا از تۋىلعاندىقتان, جاستار سانى تومەندەپ, قارت كىسىلەردىڭ قاتارى كوبەيىپ كەتكەن.
حوش. ءسابي سۇيۋگە شەك قويمايتىن قازاقستانىمىزدا, ءوز ەلىمىزدە ءومىر ءسۇرىپ جاتقانىمىز قانداي باقىت دەپ ويلادىق ءبىز. بالا كۇتىمىنە بايلانىستى ءۇش جىل دەمالىستا وتىرساڭ دا, ەشكىم ورنىڭدى تارتىپ المايدى. ومىراۋداعى كىشكەنتايىڭ باردا جۇمىسقا شىقساڭ, ءاربىر ەكى ساعات سايىن بالاڭدى ەمىزىپ كەلۋگە تاعى دا رۇقسات ەتىلەدى. زاڭ بويىنشا. ءبىر جىل بويى قىزمەت ورنىڭداعى ەڭبەكاقىڭنىڭ 40 پايىزىن الىپ وتىراسىڭ. ايتەۋىر, از دا بولسا, ءسابي كۇتىمى ءۇشىن جاردەماقى بەرىلەدى.
ال قىتايدا… بالا تۋعا شەك قويىلعانىمەن قويماي, ومىرگە ءسابي اكەلگەن ايەلدەر ءارى كەتكەندە ءۇش ايدان سوڭ جۇمىسقا شىعادى ەكەن!
جازدىگۇنى تاڭعى 7-30-دا باستالاتىن جۇمىس, كەشكى 18.30-دا اياقتالادى. ال بالالى ايەلدەرگە جاسالاتىن جەڭىلدىك: جازدا تاڭعى 8.00-دە كەلىپ, كەشكى 18.00-دە قايتۋعا رۇقسات ەتىلەدى. تاڭەرتەڭگە دەيىنگى ۋاقىتتا جارتى ساعات پەن كەشكى ۋاقىتتاعى جارتى ساعاتقا عانا كەشىرىم جاسالادى. (البەتتە, تەمىردەي ءتارتىبى بولماسا, ءبىر جارىم ميلليون حالقى بار ەل بۇگىنگىدەي ءسان-سالتانات قۇرا الار ما ەدى؟..)
راسىندا, ءبىز, ءوز اتامەكەنىمىزدەگى, تۋعان وتانىمىزداعى قىز-كەلىنشەكتەر باقىتتى ەكەنبىز عوي دەپ ويلادىم مەن. دەنساۋلىعىمىز جار بەرسە, ءسابي قۇشىپ, ەمىرەنىپ, انالىق ماحابباتىمىزدى شالقىتىپ, انا باقىتىن سەزىنۋگە مۇمكىندىگىمىز بار.
ءار ساعات سايىن ەلىمىزدە 40-تان استام ءسابي دۇنيەگە كەلىپ جاتاتىنى دا سوندىقتان.
دەسەك تە… قىتايمەن سانىمىز سالىستىرۋعا كەلمەيدى. ول ەلدە حالقىنىڭ كوپتىگى ماشاقات تۋدىرسا, بىزدەگى قاۋىپ – ازدىعىمىزدان.
ەندەشە, ەلىمىزدى سۇيەتىنىمىز, ۇلتىمىزدىڭ بولاشاعىنا الاڭدايتىنىمىز راس بولسا, ءبىز, قازاق ايەلدەرى, بالا تابۋعا جانە جاقسى ۇرپاق تاربيەلەۋگە مىندەتتىمىز دەپ سەزىنەمىز.
لايىم قازىرگى جولىمىزدان جاڭىلدىرماعاي!
ءنازيرا بايىربەك
n.bairbek@astana-akshamy.kz
