ۇلتتىق اكادەميالىق كىتاپحانا ءبىلىم كۇنى ءوز وقىرماندارىن جاعىمدى جاڭالىقتارىمەن ءتانتى ەتتى. كىتاپحانا ۇجىمىنىڭ وسى كۇنگە ورايلاستىرعان شارالارى ادەتتەگى قالىپتاسقان داستۇردەن وزگەشەلىگىمەن ەرەكشەلەندى.
شارالار لەگى عيماراتتىڭ الدىنداعى الاڭدا باستالدى. اشىق اسپان استىندا كىتاپحانانىڭ باسپالداعىنا القا-قوتان جايعاسقان جاستار مەملەكەتتىك ستيپەنديانىڭ لاۋرەاتى, «شابىت» جاستار شىعارماشىلىعىنىڭ حالىقارالىق فەستيۆالىنىڭ گران-پري يەگەرى اقىن ەرلان ءجۇنىس جۇرگىزگەن پوەتيكالىق جارىسقا قاتىستى. ولار ارنايى اشىلعان «KiتاپGift» اللەياسىنىڭ كورمەسىندە باسپا الەمىندەگى جاڭا باسىلىمدارمەن تانىسىپ, قالاعان كىتابىن سىيلىققا الدى. مۇندا تانىمال اۆتورلاردىڭ جيناقتارىمەن بىرگە شەتەل, ورىس, قازاق ادەبيەتى كلاسسيكتەرىنىڭ شىعارمالارى, عىلىمي-تەحنيكالىق, تانىمدىق دۇنيەلەر دە وقۋشىلارىن تاپتى. كورمەگە قويىلعان ماعىنالى ءماتىندى CD-ديسكىلەر دە كوپشىلىكتىڭ قىزىعۋشىلىعىن تۋدىردى.
سونىمەن بىرگە, استانالىق كىتاپقۇمارلارعا قازىرگى تاڭدا كەڭ تاراپ كەلە جاتقان بۋككروسسينگ شاراسى تانىستىرىلدى. «ءوزىڭ وقى دا, وزگەگە بەر!» دەيتىن ۇرانمەن قارۋلانعان جاستار كىتاپتىڭ ەرەكشە «اينالىمىن» ىسكە قوسپاق. ونىڭ تيىمدىلىگى الەمدە دالەلدەنىپتى. ەندى وقىرماندار وزدەرى وقىعان كىتاپتاردى دوستارىمەن ءبولىسىپ, جاڭا باسىلىمدارمەن وسى كىتاپحانادا تانىساتىن بولادى.
وسى كۇنى رەسپۋبليكاعا ەڭبەگى سىڭگەن مادەنيەت قايراتكەرى, كىتاپحانانىڭ باس ديرەكتورى ءۇمىتحان مۇڭالباەۆانىڭ باستاماسىمەن بالالار شىعارماشىلىعىنىڭ ورتالىعى اشىلدى. ەلوردالىق كىتاپحانالاردىڭ تاجىريبەسىندە بۇرىن-سوڭدى بولماعان مۇنداي ورتالىقتىڭ اشىلۋىنا بىرنەشە جايت سەبەپ بولىپتى. ۇلتتىق اكادەميالىق كىتاپحانا وقىرماندارىنىڭ جاسى دا, الەۋمەتتىك جاعدايى دا ءارتۇرلى. كەيدە بالالارىن جەتەكتەپ اتا-انالار, نەمەرەلەرىن ەرتىپ اتا-اجەلەر كەلەدى. ەرەسەكتەر جاعى كىتاپ, گازەت-جۋرنال, دەرەكتەر قورىن قاراپ, ەندى ءبىرى ينتەرنەتتە جۇمىس ىستەۋگە اينالعاندا, بالالارى زەرىگىپ تەككە وتىرادى. ودان قالدى سول جاعالاۋداعى ەڭ ءىرى مادەني وشاقتىڭ جۇمىسىمەن تانىسۋعا اۋلەتىمەن ەكسكۋرسياعا كەلەتىن قالا تۇرعىندارى مەن قوناقتارى تاعى بار. سول سەبەپتى, سابيلەردىڭ العاشقى قادامىن كىتاپ پەن بىلىمگە باستار «جول اشار» ەتۋ ءۇشىن بالالار شىعارماشىلىعىنىڭ ورتالىعىن اشۋدى ءجون كورىپتى.
– ورتالىقتىڭ نەگىزگى مىندەتتەرى – بالالاردىڭ رۋحاني جەتىلۋى مەن تاربيەسىنە بارىنشا مۇمكىندىك جاساۋ, ولاردى كىتاپ وقۋعا باۋلۋ. ويتكەنى, بالالار – بۇل ءبىزدىڭ بولاشاق وقىرماندارىمىز! كىتاپحانامىزدىڭ ەڭ جارىق زالىن بالالاردىڭ يگىلىگىنە ءبولىپ, ونىڭ جوعارى تالعاممەن بەزەندىرىلۋىنە ءمان بەردىك. كەڭ زال شارتتى تۇردە ءۇش ايماققا ءبولىندى: شىعارماشىلىق, دەمالىس جانە اقپاراتتىق ايماق. ولاردىڭ ارقايسىسىنا كوركەم بەزەندىرىلگەن كىتاپتار مەن ءتۇرلى-ءتۇستى جۋرنالدار جانە ويىنشىقتار, جازىپ-سىزىپ وينايتىن قالام-قاعازدار قويىلدى. ياعني, كەلگەندەردىڭ ءبارى جاس ەرەكشەلىكتەرىنە قاراي ەركىن تاڭداۋ جاساي الادى, – دەدى ءۇمىتحان داۋرەنبەكقىزى ورتالىقتىڭ اشىلۋ سالتاناتىندا سويلەگەن سوزىندە.
بۇل ورتالىقتىڭ ماماندارى بالالارعا ارناپ ءتۇرلى كەزدەسۋلەر, «ۇلتتىق كىتاپحانانىڭ وقىرمانى قاتارىنا قابىلداۋ» مەرەكەسىن وتكىزەدى.
اشىلۋ سالتاناتىنا بالالارىن ەرتە كەلگەن اتا-انالار رۋحاني كەمەلدىكتىڭ كىلتىن وسى جەردە تاباتىنىنا سەنىم ءبىلدىرىپ جاتتى. ال, 2005 جىلدان بەرى كىتاپحانانىڭ تۇراقتى وقىرمانى قاجەك ەسىلبەكۇلى جاڭا رۋحانيات مۇيىسىنە قۇتتى بولسىن ايتىپ, ونىڭ جاستاردى تاربيەلەۋدە جاقسى امال ەكەنىن اتاپ ءوتتى.
رۋحانيات ورداسىندا وتكەن مەرەكەلىك شارالاردىڭ سوڭىندا اقىن, دراماتۋرگ, ماناسشى, كينورەجيسسەر, اكتەر بايانعالي ءالىمجانوۆ «انا ءتىلىم – دانا ءتىلىم» شەبەرلىك ساباعىن وتكىزدى.
ۇجىم قىزمەتكەرلەرى كىتاپقۇمار قاۋىمنىڭ قاتارىن كوبەيتىپ, كىتاپحانا جۇمىسىن جانداندىراتىن شارالار لەگى جىل بويىنا جالعاساتىنىن ايتادى.
ايگۇل ۋايسوۆا
