استانادا قالا كۇنىنىڭ قۇرمەتىنە وراي ءار جەرلەردە مادەني ءىس-شارالار ۇيىمداستىرىلىپ جاتىر. كەشە كەشكىسىن «بايتەرەك» مونۋمەنتىنىڭ الدىنداعى الاڭدا امەريكالىق جانە ەلوردالىق 80 ءارتىستىڭ قاتىسۋىمەن الەمدىك كلاسسيكاعا اينالعان برودۆەيلىك ميۋزيكلدەن ۇزىندىلەر قويىلدى.
اتاقتى حورەوگراف پول ەمەرسون باستاعان ۇزدىك امەريكالىق بي ۇجىمىنىڭ قاتىسۋىمەن وتكەن بۇل شارا استانا قالاسىنىڭ – 18, سونداي-اق, قازاقستان رەسپۋبليكاسى مەن امەريكا قۇراما شتاتتارىنىڭ اراسىنداعى ىنتىماقتاستىقتىڭ 25 جىلدىعىنا ورايلاستىرىلىپ وتىر. «امەريكالىق جانە جەرگىلىكتى ارتىستەردىڭ قاتىسۋىمەن وسىنداي ميۋزيكل استانادا العاش رەت قويىلىپ وتىر. بۇگىن امەريكالىق برودۆەيدىڭ كەڭىنەن تانىمال ۇزىندىلەرىن ورىندادىق. اپتا بويى امەريكالىق ارتىستەر ەلوردالىق بي ۇجىمىمەن, وركەسترمەن جانە حورمەن بىرگە دايىندالدى. قوناقتار ءبارىن جەرگىلىكتى بيشىلەرگە ۇيرەتتى, ولار تەز قاعىپ الدى. بولاشاقتا استانادا برودۆەيلىك شوۋدى تولىق قويۋدى جوسپارلاپ وتىرمىز. امەريكادا بۇل سالا فولكلور بولىپ سانالادى. نيۋ-يوركتەگى قويىلىمداردى تاماشالاۋ ءۇشىن ادامدار الەمنىڭ تۇكپىر-تۇكپىرىنەن كەلىپ جاتادى, – دەيدى اقش ەلشىلىگىنىڭ مادەنيەت جونىندەگى اتتاشەسىنىڭ ورىنباسارى مەتيۋ ۆيلسون.
كورەرمەندەرگە ەرەكشە كوڭىل-كۇي سىيلاعان عاجايىپ قويىلىمعا وتاندىق ارتىستەرمەن قاتار, فرەنك مارتين, گەيۆين ستيۋارت, اميكاەلا گاستون, ۆانەسسا وۋەن, كاترين پيلكينگتون سەكىلدى شەتەلدىك جۇلدىزدار قاتىستى. 6 شىلدە كۇنى ساعات 17.00 بەيبىتشىلىك جانە كەلىسىم سارايىندا تاعى دا ءبىر برودۆەيلىك ميۋزيكل كەشى وتەدى.
ميۋزيكل جانرى العاش رەت اقش-تا پايدا بولدى. 1866 جىلى نيۋ-يورك قالاسىندا «Black سrook» اتتى ميۋزيكلى كورەرمەن نازارىنا ۇسىنىلدى. الايدا, ۇزاق جىلدار بويى تەاتر ونەرىنىڭ ءبىر جانرى رەتىندە مويىندالا قويمادى. كەيىن برودۆەيلىك ميۋزيكل ومىرگە كەلگەن سوڭ بۇل جانردىڭ باعى اشىلىپ, بۇكىل الەمگە ايگىلى بولدى. ميۋزيكل – قويۋشى-رەجيسسەرمەن قوسا, بالەتمەيستەر, ۆوكالدان ساباق بەرەتىن پەداگوگ, حورەوگراف بىرىگىپ جۇمىس ىستەيتىن كوپ سالالى ءارى اۋىر جانر ءتۇرى. بۇل جانر بۇگىندە وپەرەتتانىڭ ءبىر ءتۇرى دەپ تە ەسەپتەلەدى.
بۇركىت نۇراسىل
