جاقىندا ەلوردادا «دالا داۋىسى» راديوفەستيۆالىنىڭ گالا كونتسەرتى ءوتتى. مۇندا مۋزىكا ارقىلى قازاق ءتىلى دۇنيەجۇزىنە ناسيحاتتالدى.
فەستيۆالدا شەت ەلدىك ۇمىتكەرگە قازاق ءانىن ورىنداۋ نەمەسە ءوز حالقىنىڭ ءانىن قازاق تىلىندە ورىنداۋ تالابى قويىلعان. ونداعى وي – قازاق ءانىن شەتەلدىكتەرگە ورىنداتۋ ارقىلى ۇلتتىق مۋزىكالىق جانە پوەتيكالىق ءتىلدىڭ ءورىسىن كەڭەيتۋ. «دالا داۋىسى» – تەك قانا راديوفەستيۆال ەمەس, بەدەلدى مۋزىكالىق شەرۋ. قازاق راديوسىنىڭ ميلليونداعان تىڭدارماندارى ينتەرنەت ارقىلى سۇيىكتى اندەرىنە داۋىس بەرىپ, جەڭىمپازدار انىقتالدى.
2012 جىلعى ءبىرىنشى «دالا داۋىسىنا» ەكى مىڭداي ادام سايت ارقىلى داۋىس بەرسە, 2013 جىلى ەلۋ ءتورت مەملەكەتتەن ميلليونعا جۋىق تىڭدارمان داۋىس بەرگەن. وتكەن ەكى جىلدا حالىقارالىق «دالا داۋىسى» راديوفەستيۆالىنە قازاقستان, تۇركيا, قىتاي, موڭعوليا, رەسەي, قىرعىزستاننان ەكى جۇزدەن اسا ءانشى قاتىسىپ, لاۋرەت اتاندى.
بيىلعى «دالا داۋىسىنا» قاتىسۋعا نيەت بىلدىرگەن ورىنداۋشىلاردىڭ قاتارىندا رەسەي, قىتاي, ارمەنيا, لاتۆيا, بەلارۋس, قىرعىزستان مەملەكەتتەرىمەن قاتار, وتاندىق تانىمال انشىلەر مارجان اراپباەۆا, قايرات باەكەنوۆ, قۇرماش ماحانوۆ, شاحيريزات سەيداحمەت, ءالي وقاپوۆ, نۇرعالي تۇرلىبەكوۆ, گۇلمارس امانباەۆا, ارداق يساتاەۆا جانە «فورمات» پەن «زامان» توپتارى سىندى ۇمىتكەرلەر جانە بىرقاتار جاڭا ەسىمدەر بولدى.
جوباعا قاتىسۋعا نيەت بىلدىرگەن ءجۇز ورىنداۋشىدان جيىرما ءانشى «دالا داۋىسى» ءىىى حالىقارالىق راديوفەستيۆالىنىڭ لاۋرەاتى اتاندى.
راديوفەستيۆال جەڭىمپازدارى «ءداستۇرلى ءان» جانە «اكادەميالىق ورىنداۋشى», «ەسترادالىق ءان جانە ەتنوەسترادالىق ءان», «جاڭا ەسىم» اتالىمدارى بويىنشا ماراپاتتالىپ, ولارعا «دالا داۋىسىنىڭ» ارناۋلى ستاتۋەتكاسى مەن ديپلومىن ەلىمىزدىڭ ونەر جانە مادەنيەت, قوعام قايراتكەرلەرى تابىستادى.
جۇما عازيەۆ
