نۇر-سۇلتان قالاسى تىلدەردى دامىتۋ جانە ارحيۆ ءىسى باسقارماسىنا قاراستى «رۋحانيات» كوممۋنالدىق مەكەمەسىنىڭ ۇيىمداستىرۋىمەن قاسىم امانجولوۆتىڭ 110 جىلدىعىنا وراي «تاكاپپار ۇلى دۇنيە! قازاق دەگەن – مەن دەيمىن…» اتتى ونلاين دوڭگەلەك ۇستەل ءماجىلىسى ءوتتى.
جيىندى تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ اشىپ, كونفەرەنتسيانىڭ ماقساتى مەن ماڭىزىن اتاپ ءوتتى. ءىس-شارادا اقىننىڭ ادەبي مۇراسى, شىعارماشىلىعىنىڭ قازىرگى رۋحاني جاڭعىرۋ ۇردىسىندەگى ماڭىزى تالقىلاندى.
ە.بوكەتوۆ اتىنداعى قاراعاندى ۋنيۆەرسيتەتىنىڭ فيلولوگيا فاكۋلتەتىنىڭ دەكانى, دوتسەنت ەلدوس ەرعازىۇلى, باتىس قازاقستان وبلىسى بايتەرەك اۋدانىنداعى ق.امانجولوۆ اتىنداعى جالپى ورتا مەكتەبىنىڭ ديرەكتورى روزا تولەۋقىزى, قاسىمتانۋشى ساۋلە قايىربەك, قازاق ۇلتتىق ونەر ۋنيۆەرسيتەتىنىڭ وقىتۋشىسى, ق.امانجولوۆ پەن ونىڭ ولەڭدەرىنە جازىلعان اندەردى نوتاعا تۇسىرگەن ونەرتانۋشى قايرات ايتباەۆ, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وقىتۋشىسى, «قاسىم» سەرياسىمەن جارىق كورگەن ءتورت كىتاپتىڭ قۇراستىرۋشىسى الماس مىرزاحمەت, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى قازاق ادەبيەتى كافەدراسىنىڭ مەڭگەرۋشىسى, فيلولوگيا عىلىمدارىنىڭ كانديداتى قايىربەك كەمەڭگەر بايانداما جاسادى.
جيىندا كوركەم ءسوزدىڭ حاس شەبەرى, سىرلى ءسوزدىڭ وركەن جايۋىنا ەرەكشە اسەر ەتكەن اقىن قاسىم امانجولوۆتىڭ قازاق رۋحانياتىنداعى ورنى, شىعارماشىلىق ەرەكشەلىگى, اسىل مۇراسىن قازىرگى ادەبيەتتانۋداعى جاڭا عىلىمي ىزدەنىستەرمەن ساباقتاستىرۋ ماسەلەلەرى تارقاتىلدى. ونلاين-كونفەرەنتسياعا مودەراتور بولعان فيلولوگيا عىلىمدارىنىڭ دوكتورى ساعىمباي جۇماعۇل قاسىم امانجولوۆتىڭ ادەبي مۇراسىن ساقتاۋعا, ونى ناسيحاتتاۋعا باعىتتالعان ءىس-شارالارعا ەرەكشە توقتالىپ ءوتتى.
