مەملەكەت باسشىسى ن.ءا.نازارباەۆتىڭ ستراتەگيالىق ماقساتتارىن جۇزەگە اسىرۋداعى تۇعىرلى تىرەگى – «نۇر وتان» حالىقتىق دەموكراتيالىق پارتياسىنىڭ ەلىمىزدىڭ جانە استانامىزدىڭ مادەني-رۋحاني, ساياسي-ەكونوميكالىق دامۋىنا قوسقان ۇلەسى از ەمەس.
2013 جىلعى 1 شىلدەدەگى مالىمەتتەرگە سايكەس, پارتيانىڭ استانا قالالىق فيليالىندا 322 باستاۋىش پارتيا ۇيىمى, 96 پارتيالىق باقىلاۋ بەكەتى,
26 قوعامدىق قابىلداۋ ءبولىمى بار. بەدەلى كۇننەن-كۇنگە ارتىپ كەلە جاتقان «نۇر وتان» حدپ بيىلعى جىلى پارتيا مۇشەلەرىن ەسەپكە الۋ, ەلەكتروندىق قوعامدىق قابىلداۋ ۇردىستەرىن جەتىلدىرۋ ماقساتىندا ورتالىقتاندىرىلعان دەرەكتەر بازاسىن قۇردى. وسى باعىتتا قالالىق باستاۋىش ۇيىمدارىندا پارتيا مۇشەلەرىنىڭ ءتىزىمى قايتا جاڭارتىلىپ, ولاردىڭ ساپالىق قۇرامىنا كوڭىل بولىنە باستادى. بۇگىندە استانا قالاسى بويىنشا نۇروتاندىقتار سانى 37 مىڭ ادامدى قۇرايدى. جىل باسىنان بەرى ەلوردالىق پارتيا ۇيىمىنىڭ توراعاسى, استانا قالاسىنىڭ اكىمى يمانعالي تاسماعامبەتوۆتىڭ جەتەكشىلىگىمەن «نۇر وتان» حدپ استانا قالالىق فيليالىندا ءىس-قاعازدار جۇرگىزۋ تولىعىمەن مەملەكەتتىك تىلگە كوشتى. بۇل باستاما ەلباسى جولداۋىنداعى «قازاق ءتىلىن كەڭىنەن قولدانۋ جونىندەگى كەشەندى شارالاردى جۇزەگە اسىرۋدى جالعاستىرۋ كەرەك» دەگەن ناقتى تاپسىرماسىنا ساي جۇرگىزىلىپ وتىر. ياعني, العاشقى جارتىجىلدىق پارتيانىڭ قالالىق فيليالى ءۇشىن تىڭ باستامالارعا تولى بولدى.
نۇروتاندىقتار قالا دامۋىنىڭ بارلىق سالاسىنا قاتىسا وتىرىپ, مەملەكەتتىك جانە پارتيالىق باعدارلامالاردى ءتيىمدى جۇزەگە اسىرۋدا. بيىل «نۇر وتان» حدپ توراعاسىنىڭ نۇسقاۋىنا سايكەس, «قازاقستان. 2017 ماقساتتارى. ۇلتتىق ءىس-قيمىل جوسپارى» اتتى سايلاۋالدى تۇعىرناماسىن جۇزەگە اسىرۋ بويىنشا بيلىكتىڭ اتقارۋشى ورگاندارىنا پارتيالىق باقىلاۋدى كۇشەيتۋ جۇمىستارى قولعا الىندى. سونىمەن قاتار, ءۇيدمب, «بالاپان», «اق بۇلاق», «100 مەكتەپ, 100 اۋرۋحانا», تۇرعىن ءۇي شارۋاشىلىعىن جاڭعىرتۋ, «قولجەتىمدى باسپانا», «حالىقتىق IPO», «بيزنەستىڭ جول كارتاسى – 2020» سىندى الەۋمەتتىك-ەكونوميكالىق باعدارلامالار بويىنشا اقپاراتتى جيناۋ جانە سۇرىپتاۋ جۇرگىزىلىپ, باعدارلامانى جۇزەگە اسىرۋعا بولىنگەن قاراجاتتىڭ ماقساتتى جۇمسالۋى ءجىتى باقىلانۋدا.
قوعامدىق قابىلداۋ جۇمىستارى – پارتيا قىزمەتىنىڭ ماڭىزدى بولىگى. «نۇر وتان» حدپ استانا قالالىق فيليالى مەملەكەتتىك جانە جەرگىلىكتى اتقارۋشى ورگانداردىڭ قاتىسۋىمەن ەلوردانىڭ بارلىق اۋداندارىندا قوعامدىق قابىلداۋلار وتكىزىپ كەلەدى. قازىرگى ۋاقىتتا پارتيا فيليالى جانىندا ءبىر قوعامدىق قابىلداۋ ءبولىمى جانە استانا قالاسى ءماسليحاتى دەپۋتاتتارىنىڭ وكرۋگتەرىندە ءدال وسىنداي 25 ءبولىم جۇمىس ىستەيدى. بيىل قاڭتار-مامىر ايلارىندا بارلىعى 4390 ازامات جەكە ماسەلەلەرى بويىنشا قابىلداندى. ولاردىڭ 4193-ىنە اۋىزشا قۇقىقتىق كەڭەستەر بەرىلسە, 197-سىنە جازباشا جاۋاپ قايتارىلدى. وتىنىشتەردىڭ باسىم كوپشىلىگى الەۋمەتتىك ماڭىزدى ماسەلەلەرگە بايلانىستى ەكەنىن اڭعارۋعا بولادى. اتاپ ايتار بولساق, 1268-ءى – جۇمىسقا ورنالاسۋ, 1082-ءسى – قۇقىقتىق كەڭەس بەرۋ, 802-ءسى – تۇرعىن ءۇي-كوممۋنالدىق شارۋاشىلىق, 174-ءى – ءبىلىم بەرۋ, 124-ءى – دەنساۋلىق ساقتاۋ سالاسىنا قاتىستى. پارتيا ءاربىر ءوتىنىشتى نازاردان تىس قالدىرماي, ءتيىستى مەملەكەتتىك ورگانداردى جۇمىلدىرۋ ارقىلى ازاماتتارعا جان-جاقتى قولداۋ كورسەتۋدى ماقسات ەتەدى.
«نۇر وتان» حدپ انا مەن بالا ساياساتى, وتباسى قۇندىلىقتارى, سالاۋاتتى ءومىر سالتى, سىبايلاس جەمقورلىققا قارسى كۇرەس جانە ت.ب. الەۋمەتتىك باعىتتاعى عىلىمي-تاجىريبەلىك كونفەرەنتسيالاردىڭ ۇيىتقىسى بولىپ كەلەدى. وسى ورايدا, پارتيا رەسپۋبليكالىق جانە جەرگىلىكتى باسقارۋشى ورگانداردى, مەملەكەتتىك قىزمەتكەرلەردى, قۇقىق قورعاۋ ورگاندارىن, ۇكىمەتتىك ەمەس ۇيىم وكىلدەرىن قوعامداعى وزەكتى ماسەلەلەردى تالقىلاۋ ماقساتىندا ءبىر ارناعا توعىستىرادى.
پارتيانىڭ حالىقارالىق ىنتىماقتاستىق سالاسىنداعى جەتىستىكتەرى دە جوق ەمەس. 2013 جىلى 2-5 شىلدە ارالىعىندا پارتياارالىق بايلانىستى نىعايتۋ ماقساتىندا قىتاي كوممۋنيستىك پارتياسىنىڭ دەلەگاتسياسى ىسساپارمەن استانا قالاسىنا كەلدى. دەلەگاتسيا مۇشەلەرى «نۇر وتان» حدپ باسشىلارىمەن كەزدەسىپ, پارتيا جۇمىسىمەن تانىستى. بۇل كەزدەسۋ مەملەكەتارالىق قالىپتاسقان دوستىق, تاتۋ كورشىلىك قارىم-قاتىناستى دامىتۋ, پارتياارالىق تاجىريبە الماسۋدا ماڭىزدى ورىن الدى.
بۇگىندە «نۇر وتان» پارتياسى قاراپايىم ازاماتتاردان باستاپ, جوعارعى مەملەكەتتىك ورگاندارعا دەيىن تۇتاس حالىقتى ورتاق مۇراتقا بىرىكتىرۋشى, قوعامنىڭ بىردەن-ءبىر قوزعاۋشى كۇشىنە اينالىپ ۇلگەردى. پارتيا مەملەكەتتىك ورگانداردى الەۋمەتتىك-ساياسي ماڭىزدى ماسەلەلەردى تالقىلاۋعا, قوعامدىق ءىس-شارالارعا قاتىسۋعا, حالىقپەن تىعىز بايلانىس ورناتۋعا شاقىرادى.
بيىلعى جىل – ەلوردامىز استانا قالاسىنىڭ 15 جىلدىق مەرەيتويىنىڭ اتاپ وتىلۋىمەن ەرەكشە. ەلىمىز ءتاۋ ەتكەن تاۋەلسىزدىگىن الەمگە ايگىلەگەننەن باستاپ ءوزىن ايماقتىق كوشباسشى رەتىندە تانىتىپ, الەۋمەتتىك-ەكونوميكالىق جانە ساياسي رەفورمالاردى قارقىندى جۇرگىزۋ ارقىلى حالىقارالىق قاۋىمداستىقتىڭ بەلدى مۇشەسىنە اينالدى. تاۋەلسىز قازاقستاننىڭ سارا جولىن دارا استانانىڭ قالىپتاسۋىنسىز ەلەستەتۋ مۇمكىن ەمەس. پرەزيدەنت ءوز ماقالاسىندا ايتقانداي: «استانا – قازاقستاندى الەمگە تانىتقان, دامۋدىڭ جاڭا بيىكتەرىنە باستاعان, حالىقتى توپتاستىرعان ءبىزدىڭ بۇكىلقازاقستاندىق جالپىۇلتتىق يدەيا». ال, ەلباسى تىزگىنىن ۇستاعان «نۇر وتان» حالىقتىق دەموكراتيالىق پارتياسى ەلوردا دامۋىنىڭ ماڭىزدى تەتىگىنە اينالعانىنا كوز جەتكىزىپ وتىرمىز. 2017 جىلى استانا قالاسىندا تاريحي ماڭىزدى وقيعا – «EXPO 2017» كورمەسى, سونىمەن قاتار, مەملەكەتتىك ماڭىزدى ءىس-شارا – كەزەكتى پارلامەنتتىك سايلاۋ وتەدى. سوندىقتان پارتيا فيليالى اتقاراتىن اۋقىمدى شارالار ءالى الدا دەپ بىلەمىز.
ولجاس بەيسەنباەۆ,
«نۇر وتان» حدپ استانا قالالىق فيليالىنىڭ كەڭەسشىسى
