سوعىس جىلدارى ءبىر بوزبالالار قارۋ اسىنىپ, مايدانعا اتتانسا, ەندى ءبىرى ورىمدەي كەزىنەن تىلدا جۇمىس ىستەپ, جەڭىستى جاقىنداتۋعا ۇلەس قوستى. سونداي تىل ارداگەرلەرى – رامازان ەسماعامبەتوۆ پەن كارىم سادىقوۆ.
رامازان ەسماعامبەتوۆ 1934 جىلى 21 قاراشادا سولتۇستىك قازاقستان وبلىسىندا دۇنيەگە كەلگەن. 1958 جىلى ءال-فارابي اتىنداعى (بۇرىنعا كيروۆ) قازاق مەملەكەتتىك ۋنيۆەرسيتەتىنىڭ زاڭ فاكۋلتەتىن بىتىرگەن. 1968-1974 جىلدارى سولتۇستىك قازاقستان وبلىستىق سوتىنىڭ مۇشەسى. 1974 جىلى اتىراۋ (بۇرىنعى گۋرەۆ) وبلىستىق سوتىنىڭ توراعاسىنىڭ ورىنباسارى بولىپ تاعايىندالعان. 1976 جىلى قازاق كسر جوعارعى سوتىنىڭ القا مۇشەسى, 1981 جىلى قازاق كسر جوعارعى كەڭەسى پرەزيديۋمىنىڭ راقىمشىلىق دەپارتامەنتىنىڭ باسشىسى بولعان. 1986 جىلدان قازاقستان رەسپۋبليكاسى جوعارعى سوتىنىڭ القا مۇشەسى. 1996 جىلى سوت سالاسىنان قۇرمەتتى دەمالىسقا شىققان.
ول كىسى «تىڭ جانە تىڭايعان جەرلەردى يگەرۋ ءۇشىن», «ۇلى وتان سوعىسىنداعى ەرەن ەڭبەگى ءۇشىن», «ەڭبەك ارداگەرى», «ۇلى وتان سوعىسىنداعى جەڭىستىڭ قىرىق جىلدىعى», «جەڭىستىڭ ەلۋ جىلدىعى», «جەڭىستىڭ 60 جىلدىعى», «سوت جۇيەسىنىڭ ارداگەرى» مەدالدارىمەن جانە 1996 جىلى قازاق كسر جوعارعى كەڭەسىنىڭ پرەزيديۋمىنىڭ قۇرمەت گراموتاسىمەن ماراپاتتالعان.
قاريا رامازان ەسماعامبەتۇلى بيىل 82 جاسقا شىقتى. ول كىسىنىڭ عيبراتتى سوزىنەن تاۋەلسىزدىكتى باعالاۋ, ەلگە ادال, ءارى قورعان, ەل بيلەگەن ەلباسىنا ادال بولۋ ءبىزدىڭ پارىزىمىز ەكەنىن ۇقتىق.
ءبىز «اتا ءسىزدىڭ ارمانىڭىز بار ما, نە ارماندايسىز, شەتەل ارالاپ, دۇنيەنىڭ كەرەمەتىن كورگىڭىز كەلە مە؟» دەپ سۇرادىق. «قاراعىم-اي, مەنىڭ بار بايلىعىم, باقىتىم – تۋعان حالقىم, وتاننىڭ تىنىشتىعى. باقىت بايلىقپەن ولشەنبەيدى. ادال ەڭبەگىمنىڭ جەمىسىن, بەينەتتىڭ زەينەتىن, نەمەرەلەرىمنىڭ قىزىعىن, ەلدىڭ باقىتتى ءومىرىن كورۋدەن ارتىق ارمان بولا ما؟» دەدى. جەڭىستى جاقىنداتۋ ءۇشىن جان اياماي تەر توككەن, ەلىمىزدىڭ بەرىك قورعانى بولعان ارداگەرلەرىمىزدىڭ الدىندا بۇگىنگى ۇرپاق ماڭگى قارىزدار.
تاعى ءبىر قازىنالى قاريالارىمىزدىڭ ءبىرى – كارىم سادىقوۆ. 1928 جىلى كوكشەتاۋدىڭ بۋراباي قالاسىندا ءدۇنيەگە كەلگەن كارىم اقساقال بيىل 88 جاسقا شىقتى. 1967 جىلى قورعالجىن اۋداندىق حالىق سوتىنا مۇشە بولىپ تاعايىندالىپ, 1990 جىلى ءدال وسى سوتتان زەينەتكە شىققان.
تىل ارداگەرلەرى ماڭدايدان تەر توكتى, جوقشىلىقتىڭ زاردابىن تارتتى, تالاي انا مەن بالانىڭ كوز جاسىن كوردى, قاسىرەتتەن كوزدەرى جاسقا, جاندارى ازاپقا ءتۇستى.
4 جىل! 1418 كۇن مەن ءتۇن. 34 000 مىڭ ساعات. 20 ميللوننان استام ادامنىڭ وشكەن ءومىرى. ءبىز ءۇشىن ارداگەرلەرىمىزدىڭ جەڭىس جولىنداعى ەرلىگى باتىلدىقتىڭ, اسقاق قاھارماندىقتىڭ ولشەمى بولىپ قالا بەرمەك.
بۇگىنگى مامىراجاي بەيبىت ءومىر ەرلىكپەن ەل قورعاعان وسى قاريالارىمىزدىڭ ارقاسى. ءومىر وتكەلدەرىنەن قايىسپاي, بار قيىندىقتى جەڭە بىلگەن اتا-اجەلەرىمىزدىڭ شەجىرەلى ءومىر جولى بۇگىنگى ۇرپاققا ۇلگى ونەگە, وتانعا دەگەن ادالدىقتىڭ, حالقىنا دەگەن قۇرمەتتىڭ بيىك ولشەمى بولىپ قالا بەرمەك.
قىمبات توقتامۇرات
