«استانا» ايلاسىن اسىردى

قازاقستان حالقىنىڭ بىرلىگى كۇنى – 1 مامىردا «استانا ارەنا» ستاديو-نىندا قازاقستاندىق جانكۇيەرلەردىڭ قىزىعا تاماشالاعان فۋتبول باسەكەسىنە كۋا بولدىق.

«استانا» مەن «قايرات» كوماندالارى اراسىنداعى ويىن قاشاندا تارتىستى ءارى قىزىقتى وتەتىنى بەلگىلى. بىرنەشە جىلدان بەرى وسى ەكى كوماندا ۇلتتىق بىرىنشىلىكتىڭ التىن جۇلدەسى ءۇشىن ەڭ باس-تى قارسىلاس بولىپ كەلە جاتقانى سول شىنايى باسەكەلەستىكتىڭ كورىنىسى بولسا كەرەك. بىلايشا ايتقاندا, «استانا» مەن «قايرات» ماتچى جىل وتكەن سايىن يسپانيا بىرىنشىلىگىندەگى «بارسەلونا» مەن «رەال», انگليا چەمپيوناتىنداعى «مانچەستەر يۋنايتەد» پەن «ارسەنال», يتاليا دوداسىنداعى «يۋۆەنتۋس» پەن «ميلان», رەسەي پرەمەر-ليگاسىنداعى «زەنيت» پەن تسسكا كوماندالارى سەكىلدى ەل ىشىندەگى ايتۋلى دەربيگە اينالىپ بارادى.
سونىمەن كەزەكتى دەربي دە ءوتتى. بۇل ماتچتى 11 مىڭ جانكۇيەر تاماشالادى.
ويىن باستالعان ساتتەن ەكى جاق تا قورعانىسقا اسا ماڭىز بەرەتىنى اڭعارىلدى. الايدا, الاڭ يەلەرىنىڭ العاشقى شابۋىلى ناتيجەلى اياقتالدى. قوناقتاردىڭ ويىن ءتارتىبىن بۇزعانى ءۇشىن تورەشى سول قاپتالدان ايىپ دوبىن بەلگىلەدى. «قايرات» قاقپاسىنا دەيىن 35-40 مەتر شاماسىنان استانالىق جارتىلاي قورعاۋشى سەرىكجان مۋجيكوۆ اۋەلەتىپ سوققى جاساعان ەدى. قاقپا الدىنا قاراي باعىتتالعان دوپتى كۇتكەن ويىنشىلاردىڭ اراسىنان نەمانيا ماكسيموۆيچ وق بويى وزا سەكىرىپ, الا دوپتى پلوتنيكوۆ قاقپاسىنا تۋلاتىپ ءتۇسىردى. «استانا» ساپىنداعى سەربيالىق فۋتبولشىنىڭ باسپەن ۇرعان سوققىسىنا قوناقتار قاقپاشىسى ەشقانداي قاۋقار كورسەتە المادى. وسىلايشا, ەسەپ اشىلىپ, تابلودا 1:0 كورسەتكىشى جارق ەتتى.
مۇنداي جاعدايدى كۇتپەگەن «قايرات» فۋتبولشىلارى ويىندى الاڭ ورتاسىنان باستاۋعا ءماجبۇر بولدى. وسى ويىنعا الماتىدان دا ەداۋىر جانكۇيەرلەر كەلگەنى بايقالدى. ولاردىڭ وكىنىشتى ايقايى قامشىلاسا كەرەك, «قايرات» فۋتبولشىلارى العا ۇمتىلدى. ەرمەك قۋانتاەۆ ەسەپتى تەڭەستىرۋگە شاق قالدى. الايدا, ونىڭ سوققان دوبى ەريچ قاقپاسىنىڭ ماڭدايشاسىن جاناپ ءوتتى. ويىننىڭ 28-ءىنشى مينۋتىندا «استانا» كاپيتانى تانات نوسەرباەۆ ەسەپتى ەسەلەۋگە كەرەمەت مۇمكىندىك العان ەدى. دميتري شومكونىڭ الىستان جولداعان پاسىن جاقسى يگەرىپ العان استانالىق شابۋىلشىنىڭ باعىتتاعان دوبى ءدال «توعىزدىققا» تۇسە جازدادى. وكىنىشكە قاراي, الا دوپ قاقپانىڭ ءۇشبۇرىشىنان كەرى قايتتى.
ويىننىڭ ەكىنشى تايمىن الماتىلىقتار شيراق باستادى. ارينە, ول تۇسىنىكتى ەدى. «قايراتتىڭ» تەك جەڭىس ءۇشىن كەلگەنى بەلگىلى-ءتىن. ويتكەنى, الماتى كومانداسى بيىلعى چەمپيوناتتى ءساتسىز باستاعان ەدى. ونىڭ ۇستىنە باس باپكەرلەرى اۋىسىپ ۇلگەردى. دەگەنمەن, ارشاۆين, تيموششۋك سەكىلدى اتى اڭىزعا اينالعان فۋتبولشىلارى, يسلامحان, باكاەۆ, يساەل سياقتى شەبەر ويىنشىلارى بار كوماندا ويىن سوڭىنا دەيىن بارىن سالىپ باقتى. بىراق, ستانيمير ستويلوۆ باپتايتىن «استانا» ويىنشىلارى وتە سالقىنقاندىلىق تانىتىپ, الاڭنىڭ ءار بولشەگىندە وزدەرىنە جۇكتەلگەن مىندەتتەردى ويداعىداي ورىنداي ءبىلدى.
سونىمەن, كوپشىلىك اسىعا كۇتكەن «استانا» – «قايرات» ماتچى 1:0 ەسەبىمەن اياقتالدى.
تۋردىڭ باسقا ويىندارىندا مىناداي ناتيجەلەر تىركەلدى: «توبىل» – «تاراز» 1:0, «ورداباسى» – «اقجايىق» 1:0, «اقتوبە» – «وقجەتپەس» 1:0, «شاحتەر» – «اتىراۋ» 0:0, «جەتىسۋ» – «ەرتىس» 0:3.
«استانا» كەلەسى ويىنىن بۇگىن كوكشەتاۋدا جەرگىلىكتى «وقجەتپەس» كومانداسىنا قارسى وتكىزەدى.

عالىم قوجابەكوۆ