قر مادەنيەت جانە سپورت ءمينيسترىنىڭ قر ۇكىمەتىنىڭ جانىنداعى رەسپۋبليكالىق ونوماستيكا كوميسسياسىنىڭ وتىرىسىندا نۇر-سۇلتان قالاسىنىڭ كوشەلەرىنىڭ بىرىنە جوشى حاننىڭ ەسىمى بەرىلدى.
كوميسسيا مۇشەلەرى ءبىراۋىزدان وسى تاريحي ماڭىزى بار يگى باستامانى قولدادى.
جوشى حان كوشەسى كەرەي, جانىبەك حاندار كوشەسىنەن باستالىپ, ءا.كەكىلباي, ف.وڭعارسىنوۆا كوشەلەرىمەن قيىلىسادى. جوشى حان – (1187-1227) شىڭعىس حاننىڭ ۇلكەن ۇلى, التىن وردا مەملەكەتىنىڭ نەگىزىن قالاعان تانىمال تۇلعا. قازاق حاندىعىنىڭ نەگىزىن قالاۋشى حاندار – كەرەي مەن جانىبەك حاندار وسى جوشى اۋلەتىنەن شىققان.
مەملەكەت باسشىسى توقاەۆ ۇلىتاۋ وڭىرىنە جاساعان ساپارىندا التىن وردانىڭ نەگىزىن قالاعان جوشى حان ەسىمىن ۇلىقتاۋ ماسەلەسىنە باسا نازار اۋدارعان ەدى. «جوشى حاننىڭ تاريحي تۇلعاسىنا الەمنىڭ نازارىن اۋدارىپ, كەسەنەسىن مادەني تۋريزم نىسانىنا اينالدىرۋ – وتە ماڭىزدى مىندەت» دەپ ۇلى حاننىڭ قازاق ەلى تاريحىنداعى ورنىن ايشىقتاپ بەرگەن بولاتىن. وسىدان كەيىن ەلىمىزدە ۇلىق ۇلىس قاعاناتىنىڭ 750 جىلدىعىن اتاپ وتىلگەن ەدى. ەندى, مىنە, ۇلى حاننىڭ اتىنا باس قالادان كوشە بەرىلدى.
