استاناداعى «Qazaqstan» جەڭىل اتلەتيكا سپورت كەشەنىندە قازاقستاندىق اۋىر اتلەت, ءتورت دۇركىن الەم چەمپيونى يليا ءيليننىڭ باستاماسىمەن كۇشتىك سپورت تۇرلەرىنەن «ILYIN IRON CUP» دەمونستراتسيالىق ءتۋرنيرى جالاۋىن كوتەردى.
ءتۋرنيردىڭ اشىلۋ سالتاناتىنا پارلامەنت سەناتىنىڭ توراعاسى ماۋلەن اشىمباەۆ, مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى سامات ەرعاليەۆ, استانا قالاسى اكىمىنىڭ ورىنباسارى ەرلان بەكمۋرزاەۆ قاتىستى.
– مەملەكەت باسشىسى قاسىم-جومارت توقاەۆ ۇلت دەنساۋلىعىنا ەرەكشە كوڭىل ءبولىپ, وسى سالانى دامىتۋدى ايرىقشا نازاردا ۇستاپ كەلەدى. بۇل رەتتە بۇقارالىق سپورتقا, دەنە شىنىقتىرۋعا جانە بالالار سپورتىنا باسىمدىق بەرۋ ماڭىزدى. پرەزيدەنت ءوزىنىڭ سايلاۋ الدىنداعى باعدارلاماسىندا ءار وقۋشى ءۇشىن سپورت ۇيىرمەلەرىنە تەگىن بارۋدى قولجەتىمدى ەتۋ مىندەتىن جۇكتەدى. ازاماتتارىمىز سپورتتىڭ كەز كەلگەن تۇرىمەن ەركىن اينالىسۋى ءۇشىن مەملەكەت سپورت نىساندارىن سالۋدا. وسى رەتتە بۇگىنگى سايىس بۇقارالىق سپورتتى دامىتۋ جانە دارىپتەۋ تۇرعىسىنان ەرەكشە مانگە يە. مۇنداي باستامالار جاس بۋىننىڭ ەرىك-جىگەرى مەن رۋحىن شىڭداي تۇسەدى.
كۇشتىك سپورت تۇرلەرىن ناسيحاتتاۋ قاجەت. ول, ەڭ الدىمەن, دەنساۋلىعىمىز ءۇشىن وتە پايدالى, ادامنىڭ مىنەز-قۇلقىن قالىپتاستىرادى دەسە دە بولادى. وسى ءبىر سپورت تۇرىنە كەلگەندەر كوپتەگەن قيىندىقتى ەڭسەرۋگە بولاتىنىن تۇسىنەدى, – دەدى ماۋلەن اشىمباەۆ.
يليا يلين ءتۋرنيردىڭ باستى ماقساتى ەلىمىزدە بۇقارالىق سپورتتى ناسيحاتتاۋ ەكەنىن اتاپ ءوتتى. سايىسقا وليمپيادا چەمپيوندارى سەرىك ساپيەۆ, ولگا رىپاكوۆا جانە تاعى باسقا سپورتشىلار مەن سپورت سالاسىنىڭ تانىمال وكىلدەرى قولداۋ ءبىلدىردى.
قازاقستان رەسپۋبليكاسىنىڭ دەنە شىنىقتىرۋ مەن سپورتتى دامىتۋ تۇجىرىمداماسى اياسىندا استانا قالاسى اكىمدىگىنىڭ, مادەنيەت جانە سپورت مينيسترلىگىنىڭ قولداۋىمەن وتكىزىلىپ جاتقان «ILYIN IRON CUP» تۋرنيرىنە ەلىمىزدەن جانە جاقىن شەت ەلدەردەن 200-گە جۋىق كاسىبي اتلەت قاتىسىپ جاتىر. ولار اۋىر اتلەتيكا, پاۋەرليفتينگ, ارمرەستلينگ, كروسسفيت, ماس-رەستلينگ, گىر سپورتى, ارمليفتينگ, ۆوركاۋت جانە سترونگمەن سايىس تۇرلەرى بويىنشا باق سىنايدى. تۋرنير ەكى كۇنگە جالعاسادى.
